ឯកឧត្តម សួស ប្រាថ្នា អញ្ជើញចូលរួមកិច្ចប្រជុំការដកពិសោធន៍លើការងារដឹកនាំដោះស្រាយបញ្ហាប្រឈមពាក់ព័ន្ធសង្គ្រាមឈ្លានពានរបស់កងទ័ពថៃនៅតំបន់ព្រំដែនកម្ពុជា-ថៃ ក្នុងក្របខ័ណ្ឌក្រសួងមហាផ្ទៃ

ភ្នំពេញ៖ នាព្រឹកថ្ងៃទី៧ ខែសីហា ឆ្នាំ២០២៥នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានអញ្ជើញចូលរួមកិច្ចប្រជុំការដកពិសោធន៍លើការងារដឹកនាំដោះស្រាយបញ្ហាប្រឈមពាក់ព័ន្ធសង្គ្រាមឈ្លានពានរបស់កងទ័ពថៃនៅតំបន់ព្រំដែនកម្ពុជា-ថៃ ក្នុងក្របខ័ណ្ឌក្រសួងមហាផ្ទៃ នៅទីស្ដីការក្រសួងមហាផ្ទៃ។

កិច្ចប្រជុំនេះ ប្រព្រឹត្តទៅក្រោមអធិបតីភាពឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការក្រសួងមហាផ្ទៃ និងមានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គលេខាធិការ អគ្គនាយករង ព្រមទាំងមន្រ្តីពាក់ព័ន្ធជាច្រើនរូប។

ក្នុងឱកាសនោះដែរ ឯកឧត្តម សួស ប្រាថ្នា បានគោរពរាយការណ៍ដោយសង្ខេបអំពីការដកបទពិសោធដឹកនាំដោះស្រាយបញ្ហាប្រឈមនៃសង្គ្រាមឈ្លានពានពីភាគីថៃមកលើដែនអធិបតេយ្យនិងបូរណភាពទឹកដីនៃព្រះរាជាណាចក្រកម្ពុជា នូវសំណុចសំខាន់ៗមានជាអាទិ៍ ស្ថានភាពទូទៅនៃសង្គ្រាមឈ្លានពាន, គោលការណ៍ណែនាំដែលរៀបចំដាក់ចេញ, ការសម្របសម្រួលដោះស្រាយបញ្ហាប្រឈមនៅជួរមុខ, បញ្ហាប្រឈមនិងហានិភ័យនានា និង គំនិតផ្តួចផ្តើមជាយុទ្ធសាស្ត្រដើម្បីដោះស្រាយបញ្ហាប្រឈម៕