ភ្នំពេញ៖ នៅក្នុងឱកាសអញ្ជើញចូលរួមសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នារសៀលថ្ងៃទី២៩ ខែកក្កដា ឆ្នាំ២០២៥ ឯកឧត្ដម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានបញ្ជាក់ថា កម្ពុជាច្រានចោលព័ត៌មានទាំងឡាយណា ដែលថា កម្ពុជារំលោភបំពានបទឈប់បាញ់ ខណៈដែលកម្ពុជាបានចាត់ទុកថា បទឈប់បាញ់នេះ សំខាន់ណាស់សម្រាប់សន្តិភាពសម្រាប់កម្ពុជា និងក្នុងតំបន់។
ឯកឧត្ដម ប៉ែន បូណា បញ្ជាក់ថា “ខ្ញុំសូមបញ្ជាក់ជូនអំពីគោលជំហដ៏ម៉ឺងម៉ាត់ របស់រាជរដ្ឋាភិបាលកម្ពុជា ក្នុងការគោរពកិច្ចព្រមព្រៀង ឈប់បាញ់គ្នាជាបន្ទាន់ ហើយនិងគ្មានលាក់ខណ្ឌ ដែលបានសម្រេចកាលពីថ្ងៃទី២៨ ខែកក្កដា ឆ្នាំ២០២៥ ក្នុងកិច្ចប្រជុំពិសេស នៅប្រទេសម៉ាឡេស៊ី ហើយបានចូលជាធរមាន កាលពីពាក់កណ្តាលអាធ្រាត ម៉ោង២៤ យប់មិញនេះ”។
ឯកឧត្ដម ប៉ែន បូណា បន្តថា រាជរដ្ឋាភិបាលកម្ពុជា ចាត់ទុកកិច្ចព្រមព្រៀងនេះ មានតម្លៃជាសារវន្ដ សម្រាប់ការថែរក្សាសន្ដិភាពរវាងប្រទេសទាំងពីរ កម្ពុជា-ថៃ ក៏ដូចជាសន្ដិភាព ស្ថេរភាព នៅក្នុងតំបន់។
បន្ថែមពីនោះទៀត អ្នកនាំពាក្យរាជរដ្ឋាភិបាលកម្ពុជា បានឲ្យដឹងថា ក្នុងនាមជាប្រទេសដែលស្រលាញ់សន្ដិភាព និងគោរពច្បាប់អន្ដរជាតិ រាជរដ្ឋាភិបាលកម្ពុជា បានគោរពកិច្ចព្រមព្រៀងនេះ យ៉ាងខ្ជាប់ខ្ជួន និងបានណែនាំឲ្យកងកម្លាំងប្រដាក់អាវុធជួរមុខទាំងអស់ស្ងប់ស្ងាត់ និងអន់ធ្មន់ខ្ពស់បំផុត។
អ្នកនាំពាក្យរាជរដ្ឋាភិបាលកម្ពុជា សូមបដិសេធចំពោះរាល់ព័ត៌មានទាំងឡាញណា ដែលចោទប្រកាន់កម្ពុជាថា បានបំពានបទឈប់បាញ់ និងចាត់ទុកព័ត៌មានទាំងនោះថា ជាព័ត៌មានមិនពិត ប្រឌិត ចោទប្រកាន់ ដែលមិនផ្ដល់ផលចំណេញ ទៅដល់ការថែរក្សាកិច្ចព្រមព្រៀងឈប់បាញ់ ដែល កម្ពុជា-ថៃ បានព្រមព្រៀងគ្នានោះឡើយ។
ឯកឧត្ដម ប៉ែន បូណា បានលើកឡើងថា រាជរដ្ឋាភិបាលកម្ពុជា ចាត់ទុកកិច្ចព្រមព្រៀងឈប់បាញ់គ្នា ពិតជាមានសារសំខាន់ណាស់ ដែលត្រូវអនុវត្ដឲ្យមានប្រសិទ្ធភាព ពីព្រោះវាមិនត្រឹមតែ ដើម្បីរក្សាសុខសន្ដិភាពរវាងប្រទេសទាំងពីរ កម្ពុជា-ថៃ តែប៉ុណ្ណោះទេ ក៏ប៉ុន្ដែក៏ដើម្បីធានានិរន្ដរភាព នៃសុខសន្ដិភាពក្នុងតំបន់ឲ្យបានយូរអង្វែងផងដែរ៕
