ឯកឧត្តម ប៉ុញ សច្ចៈ ទទួលជួបពិភាក្សាការងារជាមួយប្រតិភូសាជីវកម្មសហគមន៍ជនបទប្រទេសកូរ៉េ (KRC)

ភ្នំពេញ៖នាព្រឹកថ្ងៃពុធ ១៣រោច ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៣ ខែកក្កដា ឆ្នាំ២០២៥ នេះ ឯកឧត្តម ប៉ុញ សច្ចៈ រដ្ឋលេខាធិការ និងជានាយកគម្រោងដែលទទួលហិរញ្ញប្បទានពីសាធារណរដ្ឋកូរ៉េ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអនុញ្ញាតឱ្យប្រតិភូសាជីវកម្មសហគមន៍ជនបទកូរ៉េ (KRC) ដឹកនាំដោយលោក គីម ជុង គ្យុង ចូលជួបពិភាក្សាការងារពាក់ព័ន្ធវិស័យធនធានទឹក នៅទីស្ដីការក្រសួងធនធានទឹក និងឧតុនិយម។

សូមជម្រាបថា សាជីវកម្មសហគមន៍ជនបទកូរ៉េ(KRC) មានបទពិសាធន៍ធ្វើការគ្រប់គ្រងបែងចែកទឹកក្នុងប្រពន្ធ័ធារាសាស្ត្រ និងអភិវឌ្ឍលើវិស័យធនធានទឹកនៅក្នុងប្រទេសកូរ៉េប្រមាណជាង ១០០ឆ្នាំមកហើយ ក៏ដូចជានៅតាមបណ្តាប្រទេសកំពុងអភិវឌ្ឍន៍រួមទាំងប្រទេសកម្ពុជាផងដែរ។ ផ្អែកលើភាពរីកចម្រើននៃបច្ចេកវិទ្យាទំនើបនាពេលបច្ចុប្បន្ន សាជីវកម្មសហគមន៍ជនបទកូរ៉េ មានបំណងចង់ជួយអភិវឌ្ឍលើវិស័យធនធានទឹក និងឧតុនិយមនៅកម្ពុជា ដែលពាក់ព័ន្ធនឹងជំនួយអភិវឌ្ឍន៍ផ្លូវការពីរដ្ឋាភិបាលកូរ៉េ។

ក្នុងកិច្ចជំនួប ឯកឧត្តមរដ្ឋលេខាធិការ បានជម្រាបជូនប្រតិភូកូរ៉េអំពីរចនាសម្ព័ន្ធការងាររបស់ក្រសួង និងបេសកកម្មដែលកំពុងអនុវត្តបច្ចុប្បន្នលើវិស័យធនធានទឹក និងឧតុនិយម ដោយបានសង្ខេបប្រាប់អំពីបែបបទការងារសហប្រតិបត្តិការជាមួយដៃគូអភិវឌ្ឍន៍នានា ព្រមទាំងកិច្ចសហប្រតិបត្តិការជាមួយប្រទេសកូរ៉េ និងផែនការអភិវឌ្ឍន៍បន្តនាពេលខាងមុខ ដូចបានលើកឡើងនៅក្នុងផែនការយុទ្ធសាស្ត្ររបស់ក្រសួង។

ជាមួយគ្នានេះ ឯកឧត្តមរដ្ឋលេខាធិការ តាមរយៈប្រតិភូកូរ៉េ បានថ្លែងអំណរគុណដល់ឯកឧត្តម ប្រធានស្ថាប័នសាជីវកម្មសហគមន៍ជនបទកូរ៉េ(KRC) និងជូនពរឱ្យទទួលបានភាពជោគជ័យក្នុងការសហប្រតិបត្តិការជាមួយគ្នានាថ្ងៃអនាគត៕