អភិបាលខេត្តកែប ចុះសួរសុខទុក្ខ និងចែកអំណោយជូនដល់ប្រជាពលរដ្ឋរងគ្រោះដោយខ្យល់កន្ត្រាក់ ក្នុងស្រុកដំណាក់ចង្អើរ

កែប៖នៅថ្ងៃអង្គារ ទី២២ ខែកក្កដា ឆ្នាំ២០២៥ ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តកែប បានអញ្ជើញចុះសួរសុខទុក្ខប្រជាពលរដ្ឋ និងចែកអំណោយដល់ប្រជាពលរដ្ឋរងគ្រោះ នៅស្រុកដំណាក់ចង្អើរ ខេត្តកែប ដែលត្រូវបានទទួលរងផលប៉ះពាល់ដោយសារខ្យល់កន្ត្រាក់។

ការចុះសួរសុខទុក្ខ និងការចុះចែកអំណោយនេះធ្វើឡើង បន្ទាប់ទទួលបានព័ត៌មានពីអាជ្ញាធរមូលដ្ឋានភ្លាមៗកាលពីល្ងាចថ្ងៃច័ន្ទ ទី២១ ខែកក្កដា ឆ្នាំ២០២៥ ដែលមានបាតុភូតខ្យល់កន្ត្រាក់បង្កភាពខូចខាតដល់លំឋានរបស់ប្រជាពលរដ្ឋសរុប ២៩ខ្នង ក្នុងមូលដ្ឋានស្រុកដំណាក់ចង្អើរ ខេត្តកែប។

ថ្លែងនៅក្នុងឱកាសនោះ ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប បានពាំនាំការនូវការផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចជាកាលសម្តេចតែងតែគិតគូរអំពីសុខទុក្ខ និងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋគ្រប់ពេលវេលា និងគ្រប់កាលៈទេសៈ ។

ជាមួយនេះ ឯកឧត្តម ក៏បានបន្ថែមទៀតថា ការចុះសួរសុខទុក និងការជួយសង្គ្រោះនេះគឺជាការឆ្លើយតបភ្លាមបន្ទាប់ពីបងប្អូនជួបគ្រាមានអាសន្ន ដើម្បីធានាបាននូវសុវត្ថិភាពរស់នៅប្រចាំថ្ងៃឱ្យមានភាពកក់ក្តៅ ហើយក្នុងនាមរដ្ឋបាលខេត្តកែប ឯកឧត្តមនឹងនៅតែបន្តតាមដាន និងណែនាំដល់មន្ទីរ អង្គភាព និងអាជ្ញាធរគ្រប់មូលដ្ឋាន ត្រូវធ្វើការជួយសង្គ្រោះ និងសម្រាលទុក្ខលំបាករបស់ប្រជាពលរដ្ឋគ្រប់ៗរូបឱ្យបានទាន់ពេលវេលាប្រកបដោយប្រសិទ្ធភាព។ សូមបញ្ជាក់ថា ករណីខ្យល់កន្ត្រាក់បានជះឥទ្ធិផលផលប៉ះពាល់នៅភូមិសាស្ត្រដូចជា ភូមិរនេស ឃុំពងទឹក និងភូមិទួលសាងាំ ភូមិអំពេង និងភូមិអង្កោល ក្នុងឃុំអង្កោល។

អំណោយដែល ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្ត បានដឹកនាំចុះផ្ទាល់ដល់ទីតាំងកើតហេតុ ដើម្បីចែកជូនគ្រួសារដែលរងគ្រោះរួមមានដូចជា៖ ស័ង្កសី, អង្ករ ២៥ គីឡូក្រាម, មី ១ កេស, ត្រីខ ៤ កំប៉ុង, ប្រេងឆា ១ ដប, ប៊ីចេង ១ កញ្ចប់ ឃីតសង្គ្រោះ (សារុង១ មុង១ ភួយ១ កន្ទេល១)។

តាមរយៈការចុះជួប និងចែកអំណោយដោយផ្ទាល់ភ្លាមៗនេះ ប្រជាពលរដ្ឋជាច្រើនបានសប្បាយរីករាយ និងថ្លែងអំណរគុណយ៉ាងខ្លាំងដល់ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប ដែលបានយកចិត្តទុកដាក់ និងជួយឧបត្ថម្ភបានទាន់ពេលវេលា និងទាន់ហេតុការណ៍៕