ភ្នំពេញ៖ អធិការដ្ឋាននគរបាលក្រុង ស្រុក ខណ្ឌ ស្ថិតនៅក្រោមឱវាទអភិបាល នៃគណៈអភិបាលក្រុង ស្រុក ខណ្ឌ និងស្ថិតក្រោមការដឹកនាំណែនាំជំនាញរបស់ស្នងការដ្ឋាននគរបាលរាជធានី-ខេត្ត។ អធិការដ្ឋាន មានសមត្ថកិច្ចថែរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋនៅក្នុងក្រុង ស្រុក ខណ្ឌ។ នេះបើយោងតាមប្រកាស ស្តីពី តួនាទី ភារកិច្ច និងរចនាសម្ព័ន្ធរបស់អធិការដ្ឋាននគរបាលក្រុង ស្រុក ខណ្ឌ។
បើតាមប្រការ២ អធិការដ្ឋាននគរបាលក្រុង ស្រុក ខណ្ឌ មានភារកិច្ចជាច្រើន រួមមាន អនុវត្តការងាររក្សាសន្តិសុខ សុវត្ថិភាពក្នុងមូលដ្ឋាន ការពារអាយុជីវិត សិទ្ធិសេរីភាព ទ្រព្យសម្បត្តិ និងផលប្រយោជន៍ស្របច្បាប់របស់ប្រជាពលរដ្ឋក្នុងមូលដ្ឋាន ការពារសន្តិសុខសុវត្ថិភាពប្រតិភូជាតិ-អន្តរជាតិ ភ្ញៀវទេសចរណ៍ និងទេសចរ ការពារសម្បត្តិវប្បធម៌បេតិកភណ្ឌជាតិ សម្បត្តិសាធារណៈ គោលដៅសំខាន់ៗ និងរៀបចំសណ្តាប់ធ្នាប់សាធារណៈ សណ្តាប់ធ្នាប់ចរាចរណ៍ផ្លូវគោក ទឹក ដែក ក្នុងភូមសាស្រ្តទទួលខុសត្រូវ។
ទន្ទឹមនេះ អធិការដ្ឋាន មានភារកិច្ចចាត់វិធានការបង្ការ ទប់ស្កាត់ និងបង្ក្រាបឧក្រិដ្ឋកម្មឆ្លងដែន បទល្មើសព្រហ្មទណ្ឌ និងបទល្មើសផ្សេងៗទៀតដែលប្រឆាំងសន្តិសុខជាតិ និងសណ្តាប់ធ្នាប់សង្គម ការកត់ត្រាស្ថិតិអាជីវកម្ម សិប្បកម្ម និងមុខរបរដែលងាយប៉ះពាល់ដល់សន្តិសុខ សុវត្ថិភាពប្រជាពលរដ្ឋ ចាត់វិធានការការពារពិនិត្យកន្លែងកើតហេតុ ប្រមូលវត្ថុតាងបម្រើការងារស៊ើបអង្កេត និងគ្រប់គ្រងការចុះបញ្ជីស្ថិតិអាវុធ គ្រឿងផ្ទុះ ជាតិងាយឆេះ ជាតិពុល និងអាស៊ីដខ្លាំង។ល។
អធិការដ្ឋាននគរបាលក្រុង ស្រុក ខណ្ឌ ក៏មានភារកិច្ចស្រាវជ្រាវ ប្រមូលព័ត៌មាន បង្ការ ទប់ស្កាត់ និងបង្ក្រាបសកម្មភាពបង្កចលាចលសង្គម និងសកម្មភាពភេរវកម្ម ចាប់ខ្លួន ឃាត់ខ្លួន និងកសាងសំណុំរឿងបញ្ជូនទៅស្ថាប័នអយ្យការ និងតុលាការតាមនីតិវិធី អនុវត្ត និងសហការអនុវត្តសាលដីកា និងដីកានានារបស់ស្ថាប័នអយ្យការ និងតុលាការ ពិសេសគឺអន្តរាគមន៍សង្គ្រោះអាយុជីវិត និងទ្រព្យសម្បត្តិប្រជាពលរដ្ឋពេលមានគ្រោះមហន្តរាយនានាកើតឡើង។
ក្រៅពីនេះ អធិការដ្ឋាន ក៏មានភារកិច្ច គ្រប់គ្រងការចុះបញ្ជីស្ថិតិប្រជាពលរដ្ឋ និងការងារផ្តល់អត្តសញ្ញាណប័ណ្ណ គ្រប់គ្រងជនបរទេសក្នុងភូមិសាស្ត្រទទួលខុសត្រូវ ស្រាវជ្រាវរកមនុស្សបាត់ខ្លួន គ្រប់គ្រង បញ្ជាដឹកនាំប៉ុស្តិ៍នគរបាលរដ្ឋបាលក្រោមឱវាទ រៀបចំបញ្ជីសារពើភ័ណ្ឌ កាន់កាប់ ប្រើប្រាស់ និងថែរក្សាទ្រព្យសម្បត្តិរដ្ឋរបស់អង្គភាព ធ្វើការងាររដ្ឋបាល បុគ្គលិក ភស្តុភារ និងគណនេយ្យរបស់អធិការដ្ឋានជាដើម។
អធិការដ្ឋាននគរបាលក្រុង ស្រុក ខណ្ឌ ដឹកនាំដោយអធិការ១រូប និងអធិការរងមួយចំនួនតាមការកំណត់ ដោយមានរចនាសម្ព័ន្ធចំនួន១០ រួមមាន ១-ផ្នែកសេនាធិការ ២-ផ្នែកកិច្ចការប៉ុស្តិ៍នគរបាលរដ្ឋបាល ៣-ផ្នែកសន្តិសុខ ៤-ផ្នែកនគរបាលយុត្តិធម៌ ៥-ផ្នែកពិនិត្យវិភាគកន្លែងកើតហេតុ ៦-ផ្នែកប្រឆាំងគ្រឿងញៀន ៧-ផ្នែកសណ្តាប់ធ្នាប់សាធារណៈ ៨-ផ្នែកអត្តសញ្ញាណកម្ម ៩-ផ្នែកគ្រប់គ្រងជនបរទេស (មាននៅក្រុង ស្រុក ខណ្ឌ មួយចំនួន) ១០-ផ្នែកការពារ និងអន្តរាគមន៍ (មាននៅរាជធានីភ្នំពេញ និងក្រុងសៀមរាប នៃខេត្តសៀមរាប)៕
