ចំនួនអ្នកធ្វើអត្តឃាតសរុបមាន៣១៤នាក់ ត្រូវបានរាយការណ៍នៅក្នុងប្រទេសសិង្ហបុរី ក្នុងឆ្នាំ២០២៤

សិង្ហបូរី៖ សេវាកម្មសុខភាពផ្លូវចិត្តនៅសិង្ហបុរី Samaritans of Singapore ឬហៅកាត់ថា SOS បានបង្ហាញនៅថ្ងៃសៅរ៍ទី១៩កក្កដានេះថា ចំនួនអ្នកធ្វើអត្តឃាតសរុបមាន៣១៤នាក់ ត្រូវបានរាយការណ៍នៅក្នុងប្រទេសសិង្ហបុរីក្នុងឆ្នាំ២០២៤។

យោងតាមទិន្នន័យបណ្តោះអាសន្នពីមជ្ឈមណ្ឌលបង្ការការធ្វើអត្តឃាត ការកើនឡើងខ្ពស់បំផុតនៃការធ្វើអត្តឃាត ត្រូវបានគេសង្កេតឃើញក្នុងចំណោមមនុស្សពេញវ័យដែលមានអាយុចន្លោះពី៣០ទៅ៣៩ឆ្នាំ។

SOS បានបង្ហាញថា បុគ្គលនៅក្នុងក្រុមអាយុនេះ ជួបប្រទះនូវសម្ពាធដ៏ស្មុគស្មាញជាច្រើនដែលភ្ជាប់ទៅនឹងបញ្ហាគ្រួសារ ស្ថិរភាពការងារ និងបញ្ហាប្រឈមសុខភាពផ្លូវចិត្ត។ ក្នុងចំណោម៣១៤នាក់ដែលត្រូវបានរាយការណ៍ ថាស្លាប់ដោយការធ្វើអត្តឃាត២០២នាក់ ឬ៦៤,៣ភាគរយជាបុរស ខណៈដែល១១២នាក់ ឬ៣៥,៧ភាគរយទៀតជាស្ត្រី។

សម្រាប់រយៈពេលប្រាំមួយឆ្នាំជាប់គ្នា ការធ្វើអត្តឃាតនៅតែជាមូលហេតុនាំមុខគេ នៃការស្លាប់ក្នុងចំណោមយុវជនដែលមានអាយុពី១០ទៅ២៩ឆ្នាំ។ ផ្អែកលើទិន្នន័យបណ្តោះអាសន្ន ចំនួនអ្នកធ្វើអត្តឃាតក្នុងឆ្នាំ២០២៤ បានថយចុះ២,៥ភាគរយ បើធៀបនឹងឆ្នាំ២០២៣។

ទោះជាយ៉ាងណាក៏ដោយ ចំនួនសរុបនៃការស្លាប់ដោយការធ្វើអត្តឃាតនៅឆ្នាំ២០២៣ ត្រូវបានធ្វើបច្ចុប្បន្នភាពជាបន្តបន្ទាប់ទៅ៤៣៤នាក់ ដោយអាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យ (ICA) ដែលឆ្លុះបញ្ចាំងពីការកើនឡើង៣៤,៨ ភាគរយពីតួលេខដំបូងដែលមានចំនួន៣២២នាក់៕