កម្រិតទឹកទាបក្នុងទន្លេDanube បង្កការរាំងខ្ទប់ដំណើរការដឹកជញ្ជូន ខណៈដែលកម្តៅឡើងខ្ពស់វាយប្រហារលើប្រទេសហុងគ្រី

(បរទេស)៖ ថ្ងៃសុក្រ ទី០៤ ខែកក្កដា ឆ្នាំ២០២៥ កម្រិតទឹកនៅក្នុងទន្លេDanube បានធ្លាក់ចុះយ៉ាងខ្លាំង ដោយសារកម្តៅខ្ពស់ដែលវាយប្រហារលើប្រទេសហុងគ្រី បង្កឲ្យដំណើរការដឹកជញ្ជូន កសិកម្ម និងបរិស្ថានជិតទន្លេប្រឈមនឹងការរំខានយ៉ាងខ្លាំង។ នៅទីក្រុងប៊ុយដាបែស (Budapest) សីតុណ្ហភាពបានកើនដល់ ៣៥ អង្សាសេ។ នេះបើយោងតាមការចេញផ្សាយរបស់សារព័ត៌មាន Reuters

នាវាដឹកទំនិញនៅលើទន្លេអាចដឹកបានតែ ៣០% ទៅ ៤០% នៃសមត្ថភាពទាំងមូល បណ្តាលឲ្យថ្លៃដឹកជញ្ជូនអាចកើនឡើងដល់ ១០០%។ ប៉ុន្មានកម្រិតទឹកទាបបែបនេះធ្លាប់មាននៅខែសីហា ប៉ុន្តែឆ្នាំនេះកើតឡើងពីខែមិថុនា។

ស្ថានីយ៍អាកាសធាតុ HungaroMet របស់រដ្ឋបានប្រកាសថា ខែមិថុនាឆ្នាំនេះមានភ្លៀងតែ ១៧% ប៉ុណ្ណោះ ប្រសិនបើប្រៀបធៀបទៅនឹងមធ្យមភ្លៀងនៃខែនេះ និងជាខែមិថុនាដែលស្ងួតជាងគេចាប់តាំងពីឆ្នាំ ១៩០១ មក។

រណ្តៅទន្លេផ្សេងទៀតនៅអឺរ៉ុបក៏រងផលប៉ះពាល់ដូចគ្នា ដូចជា ទន្លេវីស្ទូឡា (Vistula) នៅ Warsaw និងទន្លេរ៉ាញ៍ (Rhine) នៅអាល្លឺម៉ង់។ ទន្លេវីស្ទូឡានៅប្រទេសប៉ូឡូញធ្លាក់ចុះដល់កម្រិតទាបបំផុតគឺ ១៩សង់ទីម៉ែត្រ ហើយមានការរំពឹងថានឹងបន្តធ្លាក់បន្ថែមទៀត។

អត្ថបទពីកញ្ញា ហេង គីមជូ