(ប៉េកាំង)៖ ថ្ងៃពុធ ទី០២ ខែកក្កដា ឆ្នាំ២០២៥ ទស្សនាវដ្តីដ៏មានឥទ្ធិពលមួយរបស់បក្សកុម្មុយនីស្តចិនឈ្មោះ Qiushi បានចេញអត្ថបទដ៏តឹងរ៉ឹងនៅថ្ងៃអង្គារ ទាមទារឱ្យមានវិធានការថ្នាក់ជាតិក្នុងការបង្រ្កាប «សង្គ្រាមតម្លៃ» ដែលកំពុងធ្វើឱ្យសេដ្ឋកិច្ចអស់ធនធាន ខ្ចីប្រាក់ដើម្បីប្រកួតប្រជែង និងប៉ះពាល់ដល់កំណើនយ៉ាងយូរអង្វែង។ នេះបើយោងតាមការចេញផ្សាយរបស់សារព័ត៌មានReuters
អត្ថបទបានលើកឡើងអំពីការប្រកួតប្រជែងខ្លាំងជាពិសេសក្នុងវិស័យផលិតថាមពលពន្លឺថ្ងៃ (សូឡា), ឡានអគ្គិសនី, ថ្មលីទ្យូម និងវេទិកាពាណិជ្ជកម្មអេឡិចត្រូនិក។ វាបានរិះគន់ឱ្យឃើញថា ក្រុមហ៊ុនធំៗ និងរដ្ឋបាលមូលដ្ឋានមួយចំនួន កំពុងប្រើនយោបាយថោកៗ ដូចជាបញ្ចុះតម្លៃក្រោមថ្លៃដើម និងបង្ខំឱ្យលក់ក្រោមថ្លៃ ដើម្បីដណ្តើមយកទីផ្សារ។
អត្ថបទបានបង្ហាញក្តីព្រួយបារម្ភអំពីការខាតបង់ចំណូលរបស់ក្រុមហ៊ុន ការបាត់បង់គុណភាពផលិតផល ការកាត់បន្ថយការវិនិយោគក្នុងការស្រាវជ្រាវ និងបង្កើនភាពហានិភ័យលើបំណុល។
ក្រៅពីនេះ ទស្សនាវដ្តីបានចាត់ទោសមន្រ្តីមូលដ្ឋានមួយចំនួនដែលបង្កើត «តំបន់គោរពពន្ធ» ដោយប្រើអត្ថប្រយោជន៍ពន្ធ ឧបត្ថម្ភ និងដីធ្លី ដើម្បីទាក់ទាញវិនិយោគ ដោយមិនគិតលើផលប៉ះពាល់ជាបណ្ដោះអាសន្ន ឬរយៈវែង។
អ្នកវិភាគសេដ្ឋកិច្ចព្រមានថា ម៉ូឌែលសេដ្ឋកិច្ចស្ថិតនៅលើវិនិយោគរដ្ឋ និងតម្រូវការផ្ទៃក្នុងខ្សោយ បានធ្វើឱ្យចិនពឹងផ្អែកលើការនាំចេញ ហើយបង្កហានិភ័យដូចជាបំណុល និងដើមតម្លៃធ្លាក់ ដូចជាអំពីបទពិសោធន៍របស់ជប៉ុននៅទសវត្សរ៍ ១៩៩០។
អត្ថបទនេះបានអំពាវនាវឱ្យមានការកែប្រែផ្នែកផ្គត់ផ្គង់ និងបង្កើនតម្រូវការផ្ទៃក្នុង ដើម្បីធ្វើឱ្យសេដ្ឋកិច្ចមានស្ថិរភាពប្រកបដោយប្រសិទ្ធភាព។ ប៉ុន្តែវាក៏បានសម្ដែងថា បញ្ហានេះ «ស្មុគស្មាញ» ហើយមិនអាចដោះស្រាយបានក្នុងពេលខ្លី ឬតែមួយជំហានទេ។
អត្ថបទពីកញ្ញា ហេង គីមជូ
