សហរដ្ឋអាមេរិក សម្រេចផ្តល់ពេលវេលា២សប្តាហ៍សម្រាប់ការចរចាជាមួយអុីរ៉ង់ ខណៈស្ថានភាពតានតឹងបន្តកើនឡើង

(បរទេស)÷ ថ្ងៃសុក្រ ទី២០ ខែមិថុនា ឆ្នាំ២០២៥ ប្រធានាធិបតីដូណាល់ ត្រាំ បានសម្រេចផ្តល់ពេលវេលា ២ សប្តាហ៍សម្រាប់ការចរចាទៅកាន់អុីរ៉ង់ មុននឹងសម្រេចចិត្តអំពីការវាយប្រហារយោធា ដោយមានគោលបំណងជំរុញដល់ដំណោះស្រាយការទូត។ ការសម្រេចចិត្តនេះកើតឡើង ខណៈអុីស្រាអែលបន្តវាយប្រហារលើអុីរ៉ង់ បង្កឱ្យស្ថានភាពតំបន់កាន់តែតានតឹង។

លោក ត្រាំ និងអ្នកប្រឹក្សារបស់គាត់សង្ឃឹមថា អុីរ៉ង់ដែលរងការខូចខាតពីការវាយប្រហារ អាចនឹងព្រមលើការផ្អាកការបំលែងយូរ៉ានីញ(uranium) ដើម្បីចូលរួមចរចាថ្មី។ ទោះបីជាមុននេះ លោក ត្រាំបង្ហាញសញ្ញាដែលបង្ហាញពីការរំពឹងវាយប្រហារ ខណៈនេះគាត់កំពុងពិចារណាដំណោះស្រាយសន្តិវិធី ដោយចង់ជៀសវាងសង្គ្រាមប្រវត្តិសាស្ត្រដែលអាចឈានទៅយូរឆ្នាំ។

អុីរ៉ង់បន្តជំរុញថា ពួកគេនឹងមិនចូលរួមចរចាជាមួយសហរដ្ឋអាមេរិកទេ ដលើកលែងតែអុីស្រាអែលបញ្ឈប់ការវាយប្រហារ។ បច្ចុប្បន្ន គ្មានកិច្ចចរចាផ្លូវការណាមួយកំពុងពិភាក្សារវាងអុីរ៉ង់ និងសហរដ្ឋអាមេរិកទេ។

មន្រ្តីបរទេសអង់គ្លេស អាល្លឺម៉ង់ និងបារាំង បានធ្វើដំណើរទៅកាន់ទីក្រុងហ្សឺណែវ ដើម្បីពិភាក្សាជាមួយអុីរ៉ង់ ដោយសង្ឃឹមអាចជួយរួមដោះស្រាយវិបត្តិនេះ។ ទោះបីជាអ្នកបម្រើការផ្នែកការទូតអាមេរិកជាច្រើនមិនទទួលបានសេចក្តីណែនាំច្បាស់លាស់ពីសេតវិមានទេ ប៉ុន្តែគាត់ Steve Witkoff តំណាងសេតវិមានក៏បន្តរក្សាសារជាផ្លូវការជាមួយអុីរ៉ង់តាមរយៈទូត។

លោក ត្រាំកំពុងទទួលសេចក្តីជូនដំណឹងជាប្រចាំពីមន្រ្តីអាមេរិក ហើយពិចារណាលើជម្រើសយោធា រួមទាំងការវាយប្រហារលើប៉ុស្តិ៍នុយក្លេអ៊ែរផ្ទៃដីរបស់អុីរ៉ង់។ មានមន្រ្តីជាន់ខ្ពស់ជារបស់អុីស្រាអែលមួយចំនួនបានបង្ហាញការមិនពេញចិត្តចំពោះការពន្យារដំណើរការ នេះ។ ទោះយ៉ាងណា មន្រ្តីអឺរ៉ុបសង្ឃឹមថា វិស័យការទូតអាចជួយបង្កើតផ្លូវទៅរកដំណោះស្រាយ។

អត្ថបទពីកញ្ញា ហេង គីមជូ