ពាក់ព័ន្ធនឹងព្រំដែន កម្ពុជា-វៀតណាម សម្ដេចតេជោ ជំរុញឲ្យមានការព្រមព្រៀងគ្នា និងជំរុញបន្ថែមទៀតក្នុងការបោះបង្គោលព្រំដែនដែលនៅសេសសល់ឲ្យបានឆាប់
ភ្នំពេញ៖ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានលើកឡើងថា ពាក់ព័ន្ធទៅនឹងព្រំដែន កម្ពុជា-វៀតណាមជាពិសេសទាក់ទងទៅនឹងការបោះបង្គោលព្រំដែនដែលនៅសេសសល់ ១៦%ទៀត ដោយសម្ដេចបានជំរុញឲ្យ មានការព្រមព្រៀងគ្នា និងជំរុញបន្ថែមទៀតក្នុងការបោះបង្គោលព្រំដែនដែលនៅសេសសល់ឲ្យបានឆាប់នាពេលខាងមុខផងដែរ។
ការជំរុញរបស់សម្ដេចតេជោ ហ៊ុន សែន ធ្វើឡើងក្នុងឳកាសអនុញ្ញាតឲ្យនាយឧត្ដមសេនីយ៍ ង្វៀន តិន គឿង(Nguyen Tan Cuong) អនុរដ្ឋមន្ត្រីក្រសួងការពារប្រទេសវៀតណាម អគ្គសេនាធិការកងទ័ពប្រជាជនវៀតណាម ចូលសម្ដែងការគួរសម និងពិភាក្សាការងារ នៅវិមាន៧មករា នាព្រឹកថ្ងៃទី៤ ខែមិថុនា ឆ្នាំ២០២៥។
ក្នុងឱកាសនោះផងដែរ សម្ដេចតេជោបានមានប្រសាសន៍លើកឡើងផងដែរអំពីកិច្ចសហប្រតិបត្តិការ ជាពិសេសក្នុងវិស័យកងទ័ព ដោយកិច្ចសហប្រតិបត្តិការរវាងកងទ័ពនៃប្រទេសទាំងពីរ មានភាពស្អិតរមួត ហើយក៏ជាផ្នែកមួយនៃការជំរុញបន្ថែមទៀត ដើម្បីជំរុញទំនាក់ទំនងពាណិជ្ជកម្ម និងវិនិយោគ រវាងប្រទេសទាំងពីរឲ្យកាន់តែរឹងមាំបន្ថែមទៀត៕
