ចិនមិនបញ្ជូនរដ្ឋមន្ត្រីការពារជាតិ ទៅចូលរួមកិច្ចប្រជុំកំពូលសន្តិសុខអាស៊ី ឬហៅថា កិច្ចសន្ទនាសាំងហ្គី្រឡា នៅសិង្ហបុរី
ប៉េកាំង៖ ប្រទេសចិន នឹងមិនបញ្ជូនរដ្ឋមន្ត្រីការពារជាតិចិន លោក ដុង ជុន ទៅចូលរួមកិច្ចប្រជុំកំពូលសន្តិសុខអាស៊ី ឬហៅម្យ៉ាងទៀតថា កិច្ចសន្ទនាសាំងហ្គី្រឡា (Shangri-La Dialogue) នៅឯប្រទេសសិង្ហបុរី នាចុងសប្តាហ៍នេះ ខណៈដែលរដ្ឋមន្ត្រីការពារជាតិអាម៉េរិក លោក ភីត ហេគសេត (Pete Hegseth) នឹងបង្ហាញខ្លួនជាលើកដំបូង។
គណៈប្រតិភូមកពីសាកលវិទ្យាល័យការពារជាតិរបស់កងទ័ពរំដោះប្រជាជនចិន នឹងចូលរួមកិច្ចសន្ទនាសាំងហ្គី្រឡានៅប្រទេសសិង្ហបុរី ចាប់ពីថ្ងៃទី២៩ ខែឧសភា ដល់ថ្ងៃទី២ ខែមិថុនា។ អ្នកនាំពាក្យជាន់ខ្ពស់ក្រសួងការពារជាតិ លោក ចាង ស៊ាវហ្គាង បានឱ្យដឹងនៅក្នុងសន្និសីទសារព័ត៌មានមួយ។
លោក ចាង មិនបានបញ្ជាក់លម្អិតអំពីការសម្រេចចិត្តនោះទេ។ កាលពីឆ្នាំមុន ចិនបានបញ្ជូនរដ្ឋមន្ត្រីការពារជាតិរបស់ខ្លួនទៅចូលរួមកិច្ចប្រជុំកំពូល ដែលជាធម្មតាត្រូវបានចូលរួមដោយរដ្ឋមន្ត្រីការពារជាតិ មន្ត្រីជាន់ខ្ពស់យោធា និងសន្តិសុខ និងអ្នកការទូតមកពីជុំវិញពិភពលោក។
ព្រឹត្តិការណ៍កាលពីឆ្នាំមុនបានបណ្ដាលឱ្យមានកិច្ចប្រជុំទ្វេភាគីរវាងលោក ដុង និងរដ្ឋមន្ត្រីការពារជាតិសហរដ្ឋអាម៉េរិកនាពេលនោះ គឺលោក ឡយ អូស្ទីន (Lloyd Austin)។ ប៉ុន្តែ ក្រោយមកលោក ដុង បានបដិសេធមិនជួបជាមួយប្រធានមន្ទីរបញ្ចកោណ នៅពេលដែលពួកគេស្ថិតនៅក្នុងប្រទេសឡាវ កាលពីខែវិច្ឆិកាឆ្នាំមុន។ នៅពេលសួរអំពីលទ្ធភាពនៃការជួបគណៈប្រតិភូអាម៉េរិកក្នុងឆ្នាំនេះ លោក ចាង មិនបានបញ្ជាក់ទេ។ ទំនាក់ទំនងយោធារវាងអាម៉េរិក និងចិន កាន់តែអាក្រក់ឡើងក្នុងប៉ុន្មានខែថ្មីៗនេះ ដោយបណ្តាញសន្ទនាយោធាកម្រិតការងារជាច្រើន ត្រូវបានបង្កើតឡើងក្នុងអំឡុងពេលរដ្ឋបាលលោក ចូ បៃឌិន ត្រូវបានផ្អាកចាប់តាំងពីលោក ត្រាំ ចូលកាន់តំណែង។
យ៉ាងណាមិញ លោក ចាង បានលើកឡើងថា៖«ចិនផ្តល់សារសំខាន់យ៉ាងខ្លាំងលើទំនាក់ទំនងយោធារវាងសហរដ្ឋអាម៉េរិក និងចិន ហើយបើកចំហសម្រាប់ការទំនាក់ទំនងក្នុងកម្រិតផ្សេងៗគ្នា។ យើង សង្ឃឹមថា សហរដ្ឋអាម៉េរិកនឹងគោរពយ៉ាងស្មោះស្ម័គ្រ ចំពោះផលប្រយោជន៍ស្នូល និងកង្វល់សំខាន់ៗរបស់យើង ធ្វើការជាមួយយើងក្នុងទិសដៅដូចគ្នា និងលើកកម្ពស់ការអភិវឌ្ឍប្រកបដោយស្ថិរភាព និងរឹងមាំនៃទំនាក់ទំនងយោធា និងយោធា»។
រដ្ឋមន្ត្រីការពារជាតិអាម៉េរិក លោក ហេគសេត នឹងថ្លែងសុន្ទរកថា នៅក្នុងប្រទេសសិង្ហបុរីនៅថ្ងៃសៅរ៍ អំពីគោលនយោបាយការពារជាតិរបស់សហរដ្ឋអាម៉េរិក នៅឥណ្ឌូប៉ាស៊ីហ្វិក។ សុន្ទរកថារបស់ប្រមុខការពារជាតិប្រទេសមហាអំណាចនេះ នឹងត្រូវបានឃ្លាំមើលយ៉ាងដិតដល់ដោយសម្ព័ន្ធមិត្តអាស៊ី ចំពោះរបៀបដែលរដ្ឋបាលលោក ត្រាំ យល់ឃើញពីការគំរាមកំហែងនៃទំនើបកម្មយោធារបស់ចិន និងភាពតានតឹងដែលកំពុងកើតមាននៅក្នុងដែនទឹកមានជម្លោះនៅទូទាំងអាស៊ីបូព៌ា និងអាស៊ីអាគ្នេយ៍។ លោក ហេគសេត នឹងព្យាយាមបញ្ចុះបញ្ចូលសម្ព័ន្ធមិត្តអាស៊ី ថារដ្ឋធានីវ៉ាស៊ីនតោន គឺជាដៃគូល្អជាងរដ្ឋធានីប៉េកាំង។
ចាប់តាំងពីចូលកាន់តំណែង លោក ហេគសេត បានសន្យាថា នឹងយកមកវិញនូវព្រែកជីកប៉ាណាម៉ាពីឥទ្ធិពលរបស់ចិន ហើយបានពណ៌កំលុងនៅប្រទេសជប៉ុនថា ជាដៃគូមិនអាចខ្វះបាន សម្រាប់ដោះស្រាយការឈ្លានពានរបស់យោធាចិន នៅក្នុងតំបន់។ គួរជម្រាបថា ចិនមានជម្លោះដែនសមុទ្ទជាបន្តជាមួយហ្វីលីពីន នៅសមុទ្ទចិនខាងត្បូង ដែលក៏ត្រូវបានប្រទេសមួយចំនួនទៀតក្នុងតំបន់ទាមទារដែរ។ ក្នុងរយៈពេលប៉ុន្មានខែថ្មីៗ កូរ៉េខាងត្បូង និងជប៉ុន បានសម្ដែងការព្រួយបារម្ភជាសាធារណៈ អំពីរចនាសម្ព័ន្ធសាងសង់ដោយមហាយក្សចិន និងវត្តមានយោធានៅក្នុងសមុទ្ទលឿង និងសមុទ្ទចិនខាងកើត៕
