ភ្នំពេញ៖ រសៀលថ្ងៃទី២៣ ខែឧសភា ឆ្នាំ២០២៥ នៅសាកលវិទ្យាល័យភូមិន្ទភ្នំពេញមានរៀបចំកម្មវិធីផ្សព្វផ្សាយសៀវភៅរបស់លោក ស៊ូ ថុង ដែលមានចំណងជើងថា «អាកាសធាតុល្អ» និង «ម៉ាល់ទីម៉ែត្រ» ក្រោមកិច្ចសហការរវាងទីភ្នាក់ងារបោះពុម្ពផ្សាយអក្សរសាស្រ្តនិងសិល្បៈPHOENIXខេត្តជាំងស៊ូ និងគ្រឹះស្ថានបោះពុម្ពខ្មែរ។
លោកបណ្ឌិត ឈុន ហុក សាកលវិទ្យាធិការនៃសាកលវិទ្យាល័យភូមិន្ទភ្នំពេញបានរំលេចពីការគាំទ្រយ៉ាងពេញទំហឹងពីសំណាក់សាកលវិទ្យាល័យភូមិន្ទភ្នំពេញលើបេសកកម្មរបស់ទីភ្នាក់ងារបោះពុម្ពផ្សាយអក្សរសាស្រ្តនិងសិល្បៈPHOENIXខេត្តជាំងស៊ូ និងគ្រឹះស្ថានបោះពុម្ពខ្មែរក្នុងការរៀបចំព្រឹត្តិការណ៍នាថ្ងៃនេះ ដើម្បីលើកកម្ពស់អំណានឱ្យកាន់តែប្រសើរ និងឈ្វេងយល់ពីជម្រៅនៃខ្លឹមសាររបស់អ្នកនិពន្ធគឺលោក ស៊ូ ថុង ដែលមានភាពល្បីល្បាញក្នុងការតែងនិពន្ធប្រលោមលោក និងស្នាដៃអក្សរសិល្ប៍ជាច្រើនក្នុងការលើកកម្ពស់អំណាន និងលើកទឹកចិត្តដល់ការសិក្សាស្រាវជ្រាវបែបវិទ្យាសាស្រ្តដល់យុវជន។ តាមរយៈស្នាដៃ«អាកាសធាតុល្អ» និង «ម៉ាល់ទីម៉ែត្រ» ជាខេមរភាសានឹងផ្តល់កម្លាំងចិត្តកាន់តែប្រពៃដល់និស្សិតកម្ពុជាអាចទាញបានទ្រឹស្តីល្អពីអ្នកនិពន្ធល្បីឈ្មោះរបស់ប្រទេសចិន។
លោក Zhang Chaoyang អគ្គនាយកទីភ្នាក់ងារបោះពុម្ពផ្សាយអក្សរសាស្រ្តនិងសិល្បៈPHOENIXខេត្តជាំងស៊ូ បានថ្លែងថា «ការផ្សព្វផ្សាយអក្សរសិល្ប៍ចិននៅក្រៅប្រទេសមិនត្រឹមតែទាមទារនូវស្នាដៃដែលមានខ្លឹមសារល្អប្រពៃប៉ុណ្ណោះទេ ថែមទាំងត្រូវមានយន្តការកិច្ចសហប្រតិបត្តិការពហុភាសាដើម្បីបកប្រែខ្លឹមសារនៃអត្ថបទអក្សរសិល្ប៍ចិនស្របនឹងភាសាផ្លូវការរបស់ជនបរទេស ហើយនាំយកខ្លឹមសារទាំងនោះជាស្ពាន ជាពុទ្ធិ និងជាបទពិសោធន៍របស់ប្រទេសចិនចាក់បញ្ចូលបន្ស៊ីជាមួយនិងស្ថានភាពជាក់ស្តែងនៅបរទេស»។ បន្ថែមពីលើនេះ លោកអគ្គនាយកក៏បានរំលេចពីបុរេសកម្មរបស់ខេត្តជាំងស៊ូនៅក្នុងការរួមចំណែកអភិវឌ្ឍសេដ្ឋកិច្ចកម្ពុជា ដូចជាតំបន់សេដ្ឋកិច្ចពិសេសខេត្តព្រះសីហនុដែលមានក្រុមហ៊ុនចំនួន២០០ និងកម្មវិធីបើកឆ្នាំទេសចរណ៍កម្ពុជា-ចិន ២០២៥ជាដើម។
លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជាបានវាយតម្លៃខ្ពស់ចំពោះព្រឹត្តិការណ៍នេះ ហើយបានកោតសរសើរចំពោះនិស្សិតទាំងអស់ដែលបានចូលរួមក្នុងពិធីផ្សព្វផ្សាយសៀវភៅនេះបានយល់យ៉ាងស៊ីជម្រៅពីខ្លឹមសារគោលរបស់អ្នកនិពន្ធ។ លោកបណ្ឌិតបានចាត់ទុកព្រឹត្តិការណ៍នេះជាគីឡូម៉ែត្រចេញដំណើរដ៏ប្រពៃនៃវប្បធម៌អំណានរវាងកម្ពុជានិងចិន ដោយបានលើកទឹកចិត្តដល់ទីភ្នាក់ងារបោះពុម្ពផ្សាយអក្សរសាស្រ្តនិងសិល្បៈPHOENIXខេត្តជាំងស៊ូពិនិត្យលទ្ធភាពបកប្រែទៅជាភាសាចិននូវអត្ថបទអក្សរសិល្ប៍ខ្មែរដើម្បីចែកជូនដល់មិត្តចិនយល់កាន់តែស៊ីជម្រៅពីកម្ពុជា។ លោកបណ្ឌិតយល់ថា «អំណានជាឆ្អឹងខ្នងនៃការអភិវឌ្ឍពុទ្ធិនិងបទពិសោធន៍» ហេតុនេះទើបរយៈពេល១០ឆ្នាំមកនេះ លោកបណ្ឌិតបានស្វះស្វែងរកមូលនិធិពីមិត្តចិនក្នុងការកែលម្អសោភណភាពបណ្ណាល័យនៅតាមសាលាបឋមសិក្សាចំនួន១៧ក្នុងប្រទេសកម្ពុជា។ បន្ថែមពីលើនេះ លោកបណ្ឌិតក៏បានថ្លែងអំណរគុណដល់សង្គមស៊ីវិលចិនក្នុងខេត្តជាំងស៊ូដែលបានផ្តល់មូលនិធិកាលពីចុងឆ្នាំ២០២៤ដល់សមាគមក្នុងការដាក់អំពូលបំភ្លឺផ្លូវប្រើថាមពលពន្លឺព្រះអាទិត្យជូនដល់រដ្ឋបាលក្រុងរុនតាឯកតេជោសែនថែមទៀតផង។
គួរបញ្ជាក់ផងដែរថា ព្រឹត្តិការណ៍នៃផ្សព្វផ្សាយសៀវភៅរបស់លោក ស៊ូ ថុង នេះមានគោលបំណងសំខាន់ចំនួន៤គឺ៖ ១-លើកទឹកចិត្តដល់អ្នកអាននៅកម្ពុជាបានយល់ពីស្នាដៃអក្សរសិល្ប៍ចិនដែលបានបកប្រែជាខេមរភាសា ២-ចងស្ពានមេត្រីភាពជាមួយគ្រឹះស្ថាននានាក្នុងប្រទេសកម្ពុជាក្នុងការបោះពុម្ពផ្សាយនូវសៀវភៅដែលទាក់ទងនឹងមិត្តភាពរវាងកម្ពុជានិងចិន ៣-លើកកម្ពស់អំណានដើម្បីស្វ័យភាពនៃពុទ្ធិរបស់និស្សិត និង៤-រួមចំណែកអបអរសាទរពិធីបើកឆ្នាំទេសចរណ៍កម្ពុជា-ចិន ២០២៥៕
