ជំងឺកូវីដ-១៩ បានលេចឡើងវិញដោយស្ងាត់ៗ ដែលបង្កក្ដីបារម្ភកាន់តែខ្លាំងឡើងនៅក្នុងតំបន់អាស៊ី
បរទេស៖ ជំងឺកូវីដ-១៩ បានលេចឡើងវិញដោយស្ងាត់ៗ ដែលបង្កក្ដីបារម្ភកាន់តែខ្លាំងឡើងនៅក្នុងតំបន់អាស៊ី ជាពិសេសទីក្រុងហុងកុង សិង្ហបុរី ចិន និងថៃ ជាមួយការកើនឡើងនៃការឆ្លង និងអាការជំងឺធ្ងន់ធ្ងរ។
ស្ថានភាពកូវីដ-១៩ នៅក្នុងទីក្រុងហុងកុងជាថ្មីម្ដងទៀត ស្ថិតនៅក្រោមការត្រួតពិនិត្យយ៉ាងជិតស្និទ្ធ។ មជ្ឈមណ្ឌលការពារសុខភាពបានរាយការណ៍ថា អត្រានៃលទ្ធផលវិជ្ជមានជំងឺកូវដី-១៩ បានឈានដល់កម្រិតខ្ពស់បំផុតក្នុងរយៈពេលជាងមួយឆ្នាំ។ ក្នុងសប្តាហ៍ដែលបញ្ចប់នៅថ្ងៃទី៣ ខែឧសភា មានករណីឆ្លងជំងឺធ្ងន់ធ្ងរចំនួន៣១ ត្រូវបានរាយការណ៍។ នេះជាកម្រិតខ្ពស់បំផុតរយៈពេល១២ខែ។ លើសពីនេះទៀត ការឃ្លាំមើលទឹកសំណល់បានបង្ហាញពីការកើនឡើងគួរឱ្យកត់សម្គាល់នៃការប្រមូលផ្តុំមេរោគ ដែលបង្ហាញថា ការបញ្ជូនសហគមន៍កំពុងពង្រីក។ លើសពីប្រព័ន្ធថែទាំសុខភាព ឧស្សាហកម្មកម្សាន្ត ក៏កំពុងទទួលរងឥទ្ធិពលនៃរលកឆ្លងថ្មីនេះផងដែរ។
តារាចម្រៀងហុងកុងល្បី អ៊ីសុន ចាន់ (Eason Chan) បានលុបចោលការប្រគំតន្ត្រីរបស់គាត់នៅតៃវ៉ាន់ បន្ទាប់ពីឆ្លងកូវីដ-១៩ ដោយបង្កើនការយល់ដឹងជាសាធារណៈបន្ថែមទៀត អំពីហានិភ័យដែលកំពុងបន្តកើតមាន និងសារសំខាន់នៃការរក្សាការប្រុងប្រយ័ត្នសុខភាពជាបន្តបន្ទាប់។
នៅប្រទេសសិង្ហបុរី ក្រសួងសុខាភិបាលបានបង្ហាញថា ករណីឆ្លងជំងឺកូវីដ-១៩ ក្នុងសប្តាហ៍បញ្ចប់ថ្ងៃទី៣ឧសភា បានកើនឡើង២៨ភាគរយ ដល់ប្រមាណ១៤២០០ករណី។ ការចូលមន្ទីរពេទ្យដោយសារតែជំងឺនេះ កើនឡើងប្រហែល៣០ភាគរយដែរ។ គួរកត់សម្គាល់ថា នេះជាលើកដំបូងក្នុងរយៈពេលជិតមួយឆ្នាំដែលរដ្ឋាភិបាលសិង្ហបុរី បញ្ចេញតួលេខផ្លូវការ។ ទោះបីជាមានការកើនឡើងនៃករណីឆ្លងក៏ដោយ ក៏សិង្ហបុរីមិនបានកំណត់អត្តសញ្ញាណមេរោគប្រភេទថ្មី និងធ្ងន់ធ្ងរជាងនេះដែរ។ អាជ្ញាធរជឿថា មូលហេតុចម្បងនៃការកើនឡើងករណីឆ្លង គឺការថយចុះភាពស៊ាំក្នុងចំណោមប្រជាជន បន្ទាប់ពីរយៈពេលដ៏យូរដោយគ្មានការចាក់វ៉ាក់សាំង ឬការប៉ះពាល់នឹងវីរុស។
ជាលទ្ធផល រដ្ឋាភិបាលបានណែនាំជាបន្ទាន់ដល់ក្រុមដែលមានហានិភ័យខ្ពស់ ជាពិសេសមនុស្សចាស់ និងអ្នកមានបញ្ហាសុខភាព ឱ្យទៅទទួលវ៉ាក់សាំងឱ្យបានឆាប់តាមដែលអាចធ្វើទៅបាន។ និន្នាការស្រដៀងគ្នានេះ ត្រូវបានគេសង្កេតឃើញនៅក្នុងប្រទេសចិន និងប្រទេសថៃ។ មជ្ឈមណ្ឌលគ្រប់គ្រង និងបង្ការជំងឺរបស់ចិន បានរាយការណ៍ថា អត្រាធ្វើតេស្តវិជ្ជមាននៅក្នុងមន្ទីរពេទ្យបានកើនឡើងជាងពីរដងក្នុងរយៈពេល៥សប្តាហ៍ឈានទៅដល់ថ្ងៃទី៤ ខែឧសភា។ នេះត្រូវបានចាត់ទុកថា ជាសញ្ញាព្រមានមួយ។
នៅក្នុងប្រទេសថៃឯណោះវិញ ការផ្ទុះឡើងនៃជំងឺកូវីដ-១៩ បានកើតឡើងបន្ទាប់ពីពិធីសង្ក្រាន្តក្នុងខែមេសា។ នាយកដ្ឋានប្រយុទ្ធនឹងជំងឺបានបញ្ជាក់ថា ប្រទេសនេះ បានជួបប្រទះនឹងការផ្ទុះឡើងយ៉ាងខ្លាំងចំនួនពីរ ក្នុងរយៈពេលតែប៉ុន្មានខែក្នុងឆ្នាំនេះ។ ករណីឆ្លងជំងឺកូវីដ-១៩ ចាប់ពីថ្ងៃទី១១ដល់១៧ឧសភា ត្រូវបានរាយការណ៍នៅក្នុងប្រទេសថៃបានកើនឡើងដល់៣៣០៣០ករណី កាលពីសប្តាហ៍មុនដោយយ៉ាងហោចណាស់មាន៦០០០ករណីនៅរាជធានីបាងកក។ អាស្រ័យហេតុនេះ អាជ្ញាធរសុខាភិបាលសាធារណៈរបស់ប្រទេសថៃ ពេលនេះ កំពុងជំរុញប្រជាជន ជាពិសេសក្រុមដែលមានហានិភ័យខ្ពស់ ទទួលការចាក់វ៉ាក់សាំងបង្ការដោយមិនបង្អង់យូរ។
ទន្ទឹមនឹងនេះ ឥណ្ឌាមិនទាន់បង្ហាញសញ្ញានៃការផ្ទុះឡើងថ្មីនៅឡើយ។ ក្រសួងសុខាភិបាល និងសុខុមាលភាពគ្រួសារបានរាយការណ៍ថា មានករណីសកម្មចំនួន៩៣ ប៉ុណ្ណោះនៅទូទាំងប្រទេស។ ទោះជាយ៉ាងណា អ្នកជំនាញផ្នែកសុខភាពសាធារណៈរបស់ឥណ្ឌា កំពុងតាមដានស្ថានការណ៍យ៉ាងដិតដល់ ដោយកត់សម្គាល់ថា ការផ្ទុះឡើងនៅក្នុងបណ្តាប្រទេសអាស៊ីជិតខាង ជាការរំលឹកថា ការបន្ធូរបន្ថយវិធានការហួសហេតុអាចនាំឱ្យមានការផ្លាស់ប្ដូរស្ថានភាពយ៉ាងឆាប់រហ័ស។
ដោយឡែក ក្រសួងសុខាភិបាលកម្ពុជា កាលពីថ្ងៃទី១៩ឧសភា ក៏បានណែនាំដល់មន្ទីរ អង្គភាពពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ត្រូវជំរុញការចាក់វ៉ាក់សាំងរំឭកដល់ពលរដ្ឋ ដែលមានអាយុចាប់ពី១២ឆ្នាំឡើង។ ក្រសួងសុខាភិបាលបញ្ជាក់ថា ដោយរកឃើញមានការឆ្លងដោយកន្លែងនៃជំងឺកូវីដ-១៩ ថ្មី (JN.1 lineages) (Covid-19 Omicron) កន្លងមក។ ដូចនេះ ដើម្បីបង្ការជាមុនសំដៅធានាភាពស៊ាំសហគមន៍ និងទប់ស្កាត់ការរីករាលដាលនៃជំងឺកូវីដ-១៩ថ្មី ក្រសួងណែនាំដល់នាយកមន្ទីរពេទ្យជាតិ និងប្រធានមន្ទីរសុខាភិបាលនៃរដ្ឋបាលរាជធានី-ខេត្ត និងផ្នែកពាក់ព័ន្ធ ជំរុញការចាក់វ៉ាក់សាំងកូវីដ-១៩ រំឭកដល់ប្រជាជនអាយុចាប់ពី១២ឆ្នាំឡើង រាល់៦ខែម្ដង តាមយុទ្ធសាស្ត្រនៃការចាក់រំឭកវ៉ាក់សាំងកូវីដ-១៩ ជាពិសេស ត្រូវលើកទឹកចិត្តដល់ពលរដ្ឋដែលមានវ័យចាស់ជរា អ្នកមានជំងឺរ៉ាំរ៉ៃ និងមានភាពស៊ាំថយចុះ ឱ្យមកទទួលវ៉ាក់សាំងដើម្បីការពារជំងឺកូវីដ-១៩ថ្មី។
ការងើបឡើងវិញនៃជំងឺរាតត្បាតកូវីដ-១៩ ក្នុងអំឡុងពេលរដូវក្ដៅ គឺជាមូលហេតុនៃការព្រួយបារម្ភខ្លាំង ព្រោះវាផ្ទុយនឹងការសន្មតពីមុនដែលថាវីរុសស្រដៀងគ្នាទៅនឹង ជំងឺគ្រុនផ្តាសាយតាមរដូវដែល ជាធម្មតាថយចុះនៅក្នុងខែក្ដៅ។ ការកើនឡើងចំនួនករណីឆ្លងនៅហុងកុង សិង្ហបុរី ចិន និងថៃ បង្ហាញថា ជំងឺរាតត្បាតមិនទាន់ចប់ទេ។ កូវីដ-១៩ នៅបន្តគំរាមកំហែងដល់ប្រព័ន្ធសុខភាពសាធារណៈ ប្រសិនបើវិធានការបង្ការត្រូវបានបន្ធូរបន្ថយ។ ជាការឆ្លើយតប ប្រទេសមួយចំនួនឥឡូវនេះ កំពុងបង្កើតឡើងវិញនូវការអនុវត្តការចែករំលែកទិន្នន័យយ៉ាងជិតស្និទ្ធការពង្រឹងទំនាក់ទំនង សុខភាពសាធារណៈ និងការពង្រឹងយុទ្ធនាការ ដើម្បីធានាបាននូវការចាក់វ៉ាក់សាំងដ៏ទូលំទូលាយក្នុងគោលបំណងទប់ស្កាត់ការរីករាលដាលកាន់តែទូលំទូលាយ៕
