ក្រសួងសុខាភិបាលថៃ ប្រាប់ប្រជាជនដែលកំពុងធ្វើដំណើរទៅកាន់ប្រទេសអារ៉ាប៊ីសាអូឌីតអោយមានការប្រុងប្រយ័ត្នបន្ថែម បន្ទាប់ពីការផ្ទុះឡើងនៃជំងឺផ្លូវដង្ហើមមជ្ឈិមបូព៌ា
បរទេស៖ ក្រសួងសុខាភិបាលថៃ បានជំរុញឱ្យប្រជាជនដែលកំពុងធ្វើដំណើរទៅកាន់ប្រទេសអារ៉ាប៊ីសាអូឌីត ដើម្បីធ្វើធម្មយាត្រា Hajj ឱ្យមានការប្រុងប្រយ័ត្នបន្ថែម បន្ទាប់ពីការផ្ទុះឡើងនៃជំងឺផ្លូវដង្ហើមមជ្ឈិមបូព៌ា (Mers) នៅក្នុងប្រទេសនេះ ដោយបានឆក់យកជីវិតមនុស្សពីរនាក់ហើយមកទល់ពេលបច្ចុប្បន្ន។ ទន្ទឹមនឹងជំងឺផ្លូវដង្ហើមស្រួចស្រាវមួយទៀត គឺកូវីដ-១៩ បំប្លែងប្រភេទថ្មី ដែលកំពុងរាលដាលខ្លាំង។
អង្គការសុខភាពពិភពលោក (WHO) បង្ហាញថា ករណីឆ្លងជំងឺផ្លូវដង្ហើមមជ្ឈិមបូព៌ាចំនួន៩ ត្រូវបានរកឃើញនៅក្នុងប្រទេសចន្លោះពីថ្ងៃទី១ ខែមីនា ដល់ថ្ងៃទី២១ ខែមេសា ដោយយ៉ាងហោចណាស់មានអ្នកស្លាប់ចំនួន២នាក់ ត្រូវបានរាយការណ៍។
លោកវេជ្ជបណ្ឌិត អូផាស ការ្យកាវីនភុង លេខាធិការអចិន្ត្រៃយ៍នៃក្រសួងសុខាភិបាលថៃ បាននិយាយថា មឺស (Mers) គឺជាជំងឺដែលជះឥទ្ធិពលជាចម្បងទៅលើប្រព័ន្ធដកដង្ហើម និងប្រព័ន្ធរំលាយអាហារ ហើយរោគសញ្ញាអាចរួមមាន៖ គ្រុនក្ដៅ ក្អក និងដង្ហើមខ្លី។ ករណីធ្ងន់ធ្ងរអាចនាំឱ្យមានជំងឺរលាកសួត ខ្សោយតម្រងនោម និងអាចស្លាប់បាន ជាពិសេសក្នុងចំណោមបុគ្គលដែលមានជំងឺរ៉ាំរ៉ៃ។
ក្នុងចំណោមករណីថ្មីៗចំនួនប្រាំបួននៅក្នុងប្រទេសអារ៉ាប៊ីសាអូឌីត មាន៨ករណីត្រូវបានរាយការណ៍នៅរាជធានីរីយ៉ាដ និងមួយករណីនៅទីក្រុងហាអ៊ីល ។
ករណីចំនួន៦ នៃរាជធានីរីយ៉ាដ ពាក់ព័ន្ធនឹងបុគ្គលិកថែទាំសុខភាពដែលបានឆ្លងជំងឺ ខណៈកំពុងព្យាបាលអ្នកជំងឺ។ បួននាក់ក្នុងចំណោមពួកគេ មានរោគសញ្ញា ខណៈពីរនាក់ទៀតមានរោគសញ្ញាស្រាល ដែលជាមេរោគឆ្លងមកមនុស្សពីសត្វអូដ្ឋ។ យ៉ាងណាមិញ របៀបបញ្ជូនមេរោគចម្លងពិតប្រាកដនៅតែមិនច្បាស់លាស់ ប៉ុន្តែវាអាចពាក់ព័ន្ធនឹងការទទួលទានទឹកដោះអូដ្ឋដែលមិនបានចម្អិន ឬសាច់អូដ្ឋមិនទាន់ចម្អិនឱ្យបានល្អ។ លោកវេជ្ជបណ្ឌិត អូផាស និយាយថា ការឆ្លងពីមនុស្សទៅមនុស្សកើតឡើងតាមរយៈដំណក់ទឹកផ្លូវដង្ហើម ឬទឹកមាត់របស់បុគ្គលដែលមានមេរោគ។
ចាប់តាំងពីករណីដំបូងនៃជំងឺមឺស ត្រូវបានរកឃើញក្នុងឆ្នាំ២០១២ មានករណីឆ្លងចំនួន២៦២៧នៅទូទាំង២៧ប្រទេស ដោយ៨៤ភាគរយមានប្រភពមកពីប្រទេសអារ៉ាប៊ីសាអូឌីត។ គ្មានករណីឆ្លងណាមួយត្រូវបានរាយការណ៍នៅខាងក្រៅមជ្ឈិមបូព៌ាចាប់តាំងពីឆ្នាំ២០១៩មក។ ដើម្បីការពារអ្នកធ្វើធម្មយាត្រាថៃក្នុងពិធីបុណ្យ Hajj ឆ្នាំនេះ ដែលនឹងប្រព្រឹត្តទៅចាប់ពីថ្ងៃទី៤ ដល់ថ្ងៃទី៩ ខែមិថុនា ក្រសួងបានបញ្ជូនក្រុមគ្រូពេទ្យទៅកាន់ប្រទេសអារ៉ាប៊ីសាអូឌីត។
ឆ្នាំនេះ អ្នកធ្វើធម្មយាត្រា៦៦០៣នាក់មកពីប្រទេសថៃ នឹងចូលរួមក្នុងពិធីសាសនាប្រចាំឆ្នាំ។ អ្នកធ្វើធម្មយាត្រា ត្រូវបានណែនាំឱ្យជៀសវាងការប៉ះពាល់ជាមួយសត្វអូដ្ឋ និងការទៅមន្ទីរពេទ្យដែលមិនចាំបាច់ ឬទៅកាន់មន្ទីរពេទ្យក្នុងតំបន់ដែលមានជំងឺរាតត្បាត ក៏ដូចជា លាងដៃឱ្យបានញឹកញាប់ ពាក់ម៉ាស និងរក្សាចម្ងាយឆ្ងាយពីអ្នកជំងឺ។
យោងតាមលោកវេជ្ជបណ្ឌិត អូផាស សុខភាពរបស់អ្នកធ្វើធម្មយាត្រានឹងត្រូវបានត្រួតពិនិត្យដោយអាជ្ញាធរសុខាភិបាលរយៈពេល១៤ថ្ងៃ បន្ទាប់ពីពួកគេត្រឡប់ទៅប្រទេសថៃវិញ។
គួរជម្រាបជូនថា ករណីឆ្លងជំងឺកូវីដ-១៩ បានកើនឡើងនៅក្នុងប្រទេសថៃ ដោយមានអ្នកឆ្លងសរុបចំនួន៧១០៦៧នាក់ និងមានអ្នកស្លាប់ចំនួន១៩នាក់ ត្រូវបានរាយការណ៍នៅចន្លោះថ្ងៃទី១ ខែមករា ដល់ថ្ងៃទី១៤ ខែឧសភា ឆ្នាំ២០២៥។ នេះបើយោងតាមមជ្ឈមណ្ឌលព័ត៌មានកូវីដ-១៩ របស់រាជរដ្ឋាភិបាល៕
