ឯកឧត្តមបណ្ឌិត គឹម សន្តិភាព អញ្ជើញដឹកនាំកិច្ចប្រជុំត្រួតពិនិត្យ និងពង្រឹងអំពីលំហូរប្រតិបត្តិការសេវាថ្កោលទោស
ភ្នំពេញ៖ នៅទីស្តីការក្រសួងយុត្តិធម៌ នារសៀលថ្ងៃសុក្រ ១៣កើត ខែពិសាខ ឆ្នាំម្សាញ់ សប្តស័ក ព.ស.២៥៦៨ ត្រូវនឹងថ្ងៃទី៩ ខែឧសភា ឆ្នាំ២០២៥ ឯកឧត្តមបណ្ឌិត គឹម សន្តិភាព រដ្ឋលេខាធិការ ទទួលបន្ទុកអគ្គនាយកដ្ឋានកិច្ចការទោសព្រហ្មទណ្ឌនៃក្រសួងយុត្តិធម៌ បានអញ្ជើញដឹកនាំកិច្ចប្រជុំត្រួតពិនិត្យ និងពង្រឹងអំពីលំហូរប្រតិបត្តិការសេវាថ្កោលទោសជាមួយថ្នាក់ដឹកនាំនៃនាយកដ្ឋានកិច្ចការថ្កោលទោសដែលជាអ្នកទទួលខុសត្រូវក្នុងការរៀបចំព្រឹត្តបត្រថ្កោលទោសជូនដល់ប្រជាពលរដ្ឋដែលមានតម្រូវការ ដោយមានការអញ្ជើញចូលរួមពី ឯកឧត្តម ជាម សត្យា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការទោសព្រហ្មទណ្ឌក្រសួងយុត្តិធម៌។
កិច្ចប្រជុំនេះ មានគោលបំណងដើម្បីពិនិត្យឡើងវិញនូវលំហូរប្រតិបត្តិការនៃការផ្តល់សេវាថ្កោលទោស ដោយបានសម្រេចកាត់បន្ថយលំហូរការងាររៀបចំឯកសារណាដែលពុំចាំបាច់ ដើម្បីពន្លឿនរយៈពេលនៃការផ្តល់សេវានេះថែមមួយកម្រិតទៀតជូនដល់ប្រជាពលរដ្ឋ ៕
