សម្ដេចធិបតី ព្រមានដល់ក្រុមជនល្មើសនេសាទលើផ្ទៃបឹងទន្លេសាប កុំប្រើហិង្សាលើកងកម្លាំងដែលចុះបង្ក្រាប ខណៈសម្ដេចអនុញ្ញាតឱ្យប្រើវិធានការការពារខ្លួន

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានព្រមានដល់ក្រុមជនល្មើសនេសាទលើផ្ទៃបឹងទន្លេសាប កុំប្រើហិង្សាលើកងកម្លាំងដែលចុះបង្ក្រាប សម្រាប់ជនល្មើសប្រើហិង្សាលើកងកម្លាំង សម្តេចអនុញ្ញាតឱ្យប្រើវិធានការការពារខ្លួន។

ក្នុងឱកាសអញ្ជើញសម្ពោធ ដាក់ឱ្យដំណើរការខ្សែច្រវាក់ផលិតកម្មថ្មី និងរោងចក្រ ដំឡើង គ្រឿង បង្គុំរថយន្ត Ford របស់ក្រុមហ៊ុនRMA Cambodia ស្ថិតនៅក្នុងស្រុកក្រគរ ខេត្តពោធិ៍សាត់ នៅព្រឹកថ្ងៃទី២២ ខែមេសា ឆ្នាំ២០២៥នេះ សម្ដេចធិបតី បានថ្លែងថា រាជរដ្ឋាភិបាលនឹងអនុវត្តន៍ដោយម៉ឺងម៉ាត់បំផុត ក្នុងកិច្ចការពារធនធានធម្មជាតិ រួមទាំងដីព្រៃ និងត្រីក្នុងបឹងទន្លេសាប។ ជាមួយគ្នានេះសម្តេចបានបង្ហើបពីការធ្វើច្បាប់ឡើងវិញ ពាក់ព័ន្ធការប្រើប្រាស់ឧបករណ៍នេសាទផងដែរ។

ទន្ទឹមនិងនេះ សម្តេចនាយករដ្ឋមន្ត្រី ក៏បានអំពាវនាវឱ្យរួមគ្នាការពារធនធានមច្ឆជាតិ ដោយបញ្ឈប់ការនេសាទល្មើសច្បាប់។ មានត្រីច្រើន តម្លៃថោក ប្រសើរជាងអត់មានត្រី ហើយត្រីថ្លៃ៕