ស្អែកនេះ! បណ្ណាល័យARDB, មជ្ឈមណ្ឌលស្រាវជ្រាវ អគ្គបណ្ឌិតសភាចារ្យ អូន ព័ន្ធមុនីរ័ត្ន និង APRACA Center of Excellence នឹងសម្ពោធដាក់ឲ្យប្រេីប្រាស់ជាផ្លូវការ
ភ្នំពេញ៖ នៅថ្ងៃទី១៨ ខែមេសា ឆ្នាំ២០២៥ ស្អែកនេះ បណ្ណាល័យARDB, មជ្ឈមណ្ឌលស្រាវជ្រាវ អគ្គបណ្ឌិតសភាចារ្យ អូន ព័ន្ធមុនីរ័ត្ន និង APRACA Center of Excellence នឹងសម្ពោធដាក់ឲ្យប្រេីប្រាស់ជាផ្លូវការ។
សូមជម្រាបថា៖ ការបង្កើតបណ្ណាល័យ និងស្ថាប័នស្រាវជ្រាវទាំង២នេះ ក្នុងគោលបំណង លេីកកម្ពស់ការស្រាវជ្រាវ និងអភិវឌ្ឍន៍ (R&D) ក៏ដូចជា ប្រមូលផ្តុំ និងចងក្រងឯកសារទុកសម្រាប់កូនខ្មែរជំនាន់ក្រោយៗ សិក្សាស្វែងយល់អំពីបទពិសោធន៍របស់កូនខ្មែរជំនាន់មុន។
ជាទស្សន:ផ្ទាល់ខ្លួន របស់ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) សង្កេតឃេីញថា ខ្មែរយេីងហាក់ដូចជាបាត់ទម្លាប់កត់ត្រាឯកសារទុក ចាប់ពីក្រោយការដួលរលំសម័យអង្គរដ៏រុងរឿងមក រហូតដល់សម័យបារាំងចូលស្រុកឆ្នាំ១៨៦៣ បារាំងបានជួយកត់ត្រាឯកសារទុកអោយ ក្រៅអំពីការកត់ត្រាក្នុងស្ត្រាស្លឹករឹតបន្តិចបន្តួចប៉ុណ្ណោះ។
ជាមួយគ្នានេះ ខ្មែរយេីងជួបគ្រោះមហន្តរាយបត់បង់ឯកសារ២លេីកធំៗ គឺ៖ (១). សម័យលង្វែក-ប្រាក់ដួង និង(២). សម័យប៉ុលពតដ័ខ្មៅងងឹត ដែលពួកគេកម្ទេចទាំងឯកសារមានជីវិត (គ្រូបង្រៀន គ្រូពេទ្យ វិស្វករ..) និងឯកសារផ្សេងៗ ជាពិសេស ច្បាប់ បញ្ញត្តិ វប្បធម៌ខ្មែរ សាសនា…។
ឯកឧត្តមបណ្ឌិត កៅ ថាច ក៏សូមអំពាវនាវ ដល់បងប្អូនខ្មែរ ចូលរួមស្រាវជ្រាវ ចងក្រងឯកសារទុកអោយបានសម្បូណ៌បែប សម្រាប់អ្នកជំនាន់ក្រោយយេីង អភិវឌ្ឍខ្លួន និងជាតិ អោយថ្កុំថ្កេីងរុងរឿងតរៀងទៅហ្នង។
បណ្ណាល័យ ARDB បេីកអោយប្រេីប្រាស់ជាសាធារណ: ជាពិសេសប្អូននិស្សិត អាចមកចូលអាន និងស្រាវជ្រាវផ្ទាល់ គ្រប់ពេល ដោយមានភ្ជាប់ប្រព័ន្ធអុីនធេីណែតល្បឿនលឿន។
ឯកឧត្តមបណ្ឌិតអគ្គនាយក បានអំពាវដល់សប្បុរសជនមេត្តាផ្តល់ជូនជាសៀវភៅ និងឯកសារស្រាវជ្រាវផ្សេងៗ មកតម្តល់ទុកជាប្រយោជន៍សាធារណ:នៅបណ្ណាល័យ ARDB ៕
