វ៉ាស៉ីនតោន៖ តំណាងពាណិជ្ជកម្មអាមេរិក លោក Jamieson Greer បាននិយាយថា ប្រធានាធិបតី លោក ដូណាល់ ត្រាំ គ្មានគម្រោងផ្តល់ ការលើកលែងដល់ប្រទេសណាមួយឡើយ ក្នុងរយៈពេលខ្លីខាងមុខ ពាក់ព័ន្ធវិធានការពន្ធគយជាសកលរបស់សហរដ្ឋអាមេរិក។ នេះបើតាមការចេញផ្សាយដោយ របស់ទីភ្នាក់ងារព័ត៌មាន Reuters ថាកាលពីថ្ងៃអង្គារ ទី៨ ខែមេសា។
លោក Greer គណៈកម្មាធិការហិរញ្ញវត្ថុនៃព្រឹទ្ធសភាអាមេរិក បានលើកឡើងដូច្នេះថ្លែងប្រាប់ថា «លោកប្រធានាធិបតី បានបញ្ជាក់ច្បាស់ណាស់ថា រូបលោកគ្មានបំណងផ្តល់ ការលើកលែងពិសេស ឬការយោគយល់ណាមួយឡើយ ក្នុងរយៈពេលខ្លីខាងមុខ»។ អ្នកតំណាងពាណិជ្ជកម្មអាមេរិករូបនេះ បាននិយាយថា ការអនុញ្ញាតឱ្យមានចន្លោះប្រហោងលើកលែង ក្នុងដំណើរការនេះ នឹងធ្វើឱ្យប៉ះពាល់កម្មវត្ថុនៃវិធានការពាណិជ្ជកម្មស្មើភាពគ្នា។ បើតាមលោក Greer ដំណើរការចរចាជុំវិញបញ្ហាពាណិជ្ជកម្ម គឺមិនមានកំណត់ពេលវេលាជាក់លាក់នោះទេ។
គួរបញ្ជាក់ថា នៅថ្ងៃពុធនេះ ចំណាត់ការដំឡើងពន្ធថ្មី ដែលភាគច្រើនចន្លោះចាប់ពី១១ភាគរយ ដល់៥០ភាគរយ របស់លោក ត្រាំ ប្រឆាំងនឹងដៃគូពាណិជ្ជកម្មរបស់សហរដ្ឋអាមេរិក សរុបជិត ៦០ប្រទេស បានចូលជាធរមានជាផ្លូវការ ប៉ុន្តែទន្ទឹមគ្នានេះ ដោយសារតែការដំឡើងពន្ធសងសឹកតបតទៅវិញរបស់ទីក្រុងប៉េកាំង ប្រទេសចិន ត្រូវទទួលរងការយកពន្ធក្នុងអត្រា សរុបយ៉ាងហោចរហូតដល់១០៤ភាគរយ ពីអាមេរិកទៅលើទំនិញរបស់ខ្លួន។ រីឯកាលពីថ្ងៃសៅរ៍សប្តាហ៍មុន ការកំណត់ពន្ធគយក្នុងអត្រាគោល ១០ភាគរយ លើប្រទេសដទៃទៀត ក៏បានចូលជាធរមានផងដែរ។
ដោយឡែកនៅបណ្តាលអាស៊ានយើងវិញមិនមានការលើកលែងណាមួយឡើយដោយពន្ធចូលជាផ្លូវការក្នុងបណ្តាលប្រទេសអាស៊ានរួមមាន៖ កម្ពុជា៖ ៤៩ភាគរយ, ឡាវ៖ ៤៨ភាគរយ, វៀតណាម៖ ៤៦ភាគរយ, មីយ៉ាន់ម៉ា៖ ៤៤ភាគរយ, ថៃ៖ ៣៦ភាគរយ, ឥណ្ឌូណេស៊ី៖ ៣២ភាគរយ, ម៉ាឡេស៊ី៖ ២៤ភាគរយ, ហ្វីលីពីន៖ ១៧ភាគរយ, សិង្ហបុរី៖ ១០ភាគរយ និងប្រុយណេ៖ ២៤ភាគរយ។
