ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា រាជរដ្ឋាភិបាលចង់ឱ្យ «មនុស្ស» ទៅរស់នៅ, ប៉ុន្តែប្រជាជនដែលទៅនៅមិនអាចនៅយូរអង្វែង បានដោយសារគ្មាន «ចរន្តសេដ្ឋកិច្ច» ហើយនៅពេលដែលចង់ជំរុញឱ្យមាន «ចរន្តសេដ្ឋកិច្ច», វិនិយោគិន ក៏នឹងត្អូញថា លំបាកលើ «ភាពតភ្ជាប់» ទៅនឹងទីផ្សារជាដើម ដែលជាភាពប្រទាក់ក្រឡានៃទិដ្ឋភាពទាំង៣។ «ភាពតភ្ជាប់» គឺជាចំណោទនៃកត្តាភូមិសាស្ត្រដ៏លំបាកមួយ។
ក្នុងឱកាសអញ្ជើញប្រកាសជាផ្លូវការដាក់ឱ្យអនុវត្តនូវ «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា ឆ្នាំ២០២៥-២០២៨» នៅព្រឹកថ្ងៃទី០៩ ខែមេសា ឆ្នាំ២០២៥នេះ សម្តេចបវរធិបតី ហ៊ុន ម៉ាណែត បានមានប្រសាសន៍ថា ការអភិវឌ្ឍនៅភាគឦសាន មានទិដ្ឋភាព៣ ដែលត្រូវគិតគូរព្រមគ្នា ពោលគឺ មនុស្ស, ចរន្តសេដ្ឋកិច្ច និងភាពតភ្ជាប់ ដែលពិបាកនឹងខ្វះខាតចំណុចណាមួយបាន។
សម្តេចបវរធិបតី នាយករដ្ឋមន្ត្រី បានបញ្ជាក់ថា ការគិតគូរពីការកសាងហេដ្ឋារចនាសម្ព័ន្ធរូបវ័ន្ត គឺជាការងារដែលធ្វើឡើងឥតដាច់បន្តពីមួយអាណត្តិ ទៅមួយអាណត្តិ ដោយប្រើប្រាស់គ្រប់មធ្យោបាយ និងធនធានទាំងថវិកាជាតិ ហិរញ្ញប្បទានគាំទ្រពីដៃគូអភិវឌ្ឍ និងការចូលរួមចំណែកពីប្រជាជន និងវិស័យឯកជន ៕
