UN ព្រមានថាការកាត់ផ្ដាច់ជំនួយកំពុងគំរាមកំហែងដល់ភាពរីកចម្រើន ក្នុងការកាត់បន្ថយអត្រាស្លាប់របស់ស្ត្រីអំឡុងពេលមានផ្ទៃពោះ និងសម្រាលកូន

បរទេស៖​ អង្គការសហប្រជាជាតិ (UN) បានព្រមានថាការកាត់ផ្ដាច់ជំនួយកំពុងគំរាមកំហែងដល់ភាពរីកចម្រើនជាច្រើនឆ្នាំមកនេះ ក្នុងការកាត់បន្ថយអត្រាស្លាប់របស់ស្ត្រីអំឡុងពេលមានផ្ទៃពោះ និងសម្រាលកូន ហើយអាចនឹងនាំឱ្យអត្រាស្លាប់កើនឡើងផងដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

របាយការណ៍មួយចេញផ្សាយដោយទីភ្នាក់ងារជាច្រើនរបស់ UN ក្នុងនោះរួមមានទាំងអង្គការសុខភាពពិភពលោក WHO បានបង្ហាញនៅថ្ងៃចន្ទ ទី៧ ខែមេសា ថានៅជុំវិញពិភពលោក អត្រាស្លាប់ក្នុងពេលពពោះ និងសម្រាលកូនរបស់ស្ត្រី បានធ្លាក់ចុះ ៤០ភាគរយ ចន្លោះពីឆ្នាំ២០០០ ដល់ឆ្នាំ២០២៣ មួយផ្នែកធំដោយសារតែលក្ខណៈអំណោយផលក្នុងការស្វែងរក និងទទួលបានសេវាសុខភិបាលដ៏ល្អប្រសើរ។

ប៉ុន្តែ WHO បានព្រមានថាអត្រាអ្នកស្លាប់អាចនឹងកើនឡើង​ ជាពិសេសក្រោយការកាត់ផ្ដាច់ជំនួយ។ WHO មិនបានលើកឡើងចំៗពីការផ្ដាច់ជំនួយណាមួយទេ តែការចេញផ្សាយរបាយការណ៍ខាងលើកើតមានឡើងចំពេល រដ្ឋបាលរបស់លោកប្រធានាធិបតីអាមេរិក ដូណាល់ ត្រាំ បង្កកជំនួយនៅក្រៅប្រទេស និងកំពុងកាត់ផ្ដាច់ជំនួយតាមរយៈអង្គការ USAID សម្រាប់កម្មវិធីជាច្រើន។

គួរបញ្ជាក់ថា បើតាម WHO ការកាត់ផ្ដាច់ជំនួយ បានបង្កផលប៉ះពាល់រួចទៅហើយដល់ការគាំទ្រលើសេវាសំខាន់ៗសម្រាប់កម្មវិធីសុខភាពរបស់ម្ដាយ ទារក និងកុមារ នៅតាមបណ្ដាប្រទេសជាច្រើន ក្នុងនោះរួម មានការកាត់បន្ថយបុគ្គលិកជាដើម។ មិនតែប៉ុណ្ណោះ ការផ្ដាច់ជំនួយដល់កម្មវិធីមួយចំនួនទៀត ដូចជាការប្រយុទ្ធប្រឆាំងនឹងជំងឺគ្រុនចាញ់ និងការព្យាបាលអ្នកឆ្លងមេរោគអេដស៍ ក៏អាចនឹងបង្កផលប៉ះពាល់ដល់ អត្រាសង្ឃឹមរស់របស់ស្ត្រីក្នុងពេលពពោះ និងសម្រាលកូនផងដែរ។