នាយករដ្ឋមន្ត្រីជប៉ុន កំពុងស្វែងរកលទ្ធភាពនៃការសន្ទនាតាមទូរស័ព្ទ ជាមួយលោក ដូណាល់ ត្រាំ ពាក់ព័ន្ធនិងការដាក់ពន្ធគយ

លោក Shigeru Ishiba នាយករដ្ឋមន្ត្រីជប៉ុនបានឲ្យដឹងថា លោកកំពុងស្វែងរកលទ្ធភាពនៃការសន្ទនាតាមទូរស័ព្ទ ជាមួយប្រធានាធិបតីអាមេរិកលោក ដូណាល់ ត្រាំ ដោយហៅការដាក់ពន្ធគយទៅវិញទៅមក របស់លោកថាជា “វិបត្តិជាតិ” ដែលទាមទារឱ្យមានការឆ្លើយតប “ដែលមិនធ្លាប់មានពីមុនមក” ។

លោក Ishiba បានប្រាប់សភាថា រដ្ឋាភិបាលគួរតែកំណត់ការឆ្លើយតប ប្រកបដោយប្រសិទ្ធភាពបំផុតចំពោះផែនការយកពន្ធ ២៤ ភាគរយលើទំនិញជប៉ុន ដោយទុកទ្វារបើកចំហសម្រាប់ជំហានសងសឹក ដែលអាចកើតមាន ឬយកបញ្ហានេះទៅអង្គការពាណិជ្ជកម្មពិភពលោក។

សមាជិកសភាបានឲ្យដឹងថា ក្នុងអំឡុងពេលនៃកិច្ចប្រជុំរួមគ្នាដ៏កម្ររបស់ពួកគេ មេដឹកនាំប្រឆាំងបានជំរុញឱ្យលោក Ishiba ធ្វើដំណើរទៅកាន់សហរដ្ឋអាមេរិក ហើយស្នើឱ្យលោក ត្រាំ ផ្លាស់ប្តូរការសម្រេចចិត្តរបស់គាត់ដោយផ្ទាល់។

លោក Ishiba បានលើកឡើងថា លោកកំពុងស្វែងរកកិច្ចសហប្រតិបត្តិការ ក្នុងការកែសម្រួលកាលវិភាគសភា ប្រសិនបើគាត់ ឬគណៈរដ្ឋមន្ត្រីណាមួយរបស់គាត់ ទៅសហរដ្ឋអាមេរិក លើបញ្ហានេះ។

លោក Ishiba បានប្រាប់អ្នកយកព័ត៌មានថា “វាជាការល្អបំផុតដែលខ្ញុំធ្វើដំណើរទៅកាន់សហរដ្ឋអាមេរិក និងធ្វើការពិភាក្សាដោយផ្ទាល់” ជាមួយលោក ត្រាំ លោក Ishiba បានប្រាប់អ្នកយកព័ត៌មានដោយកត់សម្គាល់ថា កាលវិភាគរបស់ទាំងសភា និងភាគីសហរដ្ឋអាមេរិកត្រូវតែមានការសម្របសម្រួល។

លោកបានបន្ថែមថា “មុនពេលនោះ យើងកំពុងព្យាយាមរៀបចំការសន្ទនាតាមទូរស័ព្ទ (ជាមួយប្រធានាធិបតីសហរដ្ឋអាមេរិក) ក្នុងពេលជាមួយគ្នារៀបចំនូវអ្វី ដែលគួរត្រូវបានបញ្ជូន”៕