នាយករដ្ឋមន្ត្រីអ៉ីស្រាអែល សម្ដែងការអបសាទរដែលហុងគ្រីសម្រេចចិត្តដកខ្លួនចេញពីតុលាការព្រហ្មទណ្ឌអន្តរជាតិ ICC

ប៊ុយដាប៉ែស៖ បើតាមការចេញផ្សាយដោយទីភ្នាក់ងារសារព័ត៌មាន Reuters នាយករដ្ឋមន្ត្រីអ៉ីស្រាអែល លោក Benjamin Netanyahu បានសម្ដែងការអបសាទរដែលហុងគ្រីបានសម្រេចចិត្តដកខ្លួនចេញពីតុលាការព្រហ្មទណ្ឌអន្តរជាតិ ICC ខណៈ រូបលោកបំពេញទស្សនកិច្ចនៅទីក្រុងប៊ុយដាប៉ែស កាលពីថ្ងៃព្រហស្បតិ៍ ទី៣ ខែមេសា ដែលជាទស្សនកិច្ចនៅក្រៅប្រទេសដ៏កម្រមួយដោយមិនខ្វល់ឡើយពីដីកាចាប់ខ្លួនរបស់ ICC។

លោក Netanyahu ដែលបានធ្វើទស្សនកិច្ចទៅកាន់ទីក្រុងប៊ុយដាប៉ែស តបតាមការអញ្ជើញរបស់នាយករដ្ឋមន្ត្រីហុងគ្រី លោក Viktor Orban កំពុងប្រឈមមុខនឹងដីកាចាប់ខ្លួនរបស់ ICC ជុំវិញការចោទប្រកាន់ពីបទឧក្រិដ្ឋកម្មសង្រ្គាមនៅក្នុងតំបន់ហ្កាហ្សា។ ប៉ុន្តែ ហុងគ្រីដែលជាសមាជិក ICC បានបដិសេធអនុវត្តដីកាចាប់ខ្លួន លោក Netanyahu ហើយថែមទាំងផ្គើនបបួល មេដឹកនាំអ៉ីស្រាអែលរូបនេះធ្វើទស្សនកិច្ចនៅក្នុងប្រទេសរបស់ខ្លួនទៀតផង។ មិនតែប៉ុណ្ណោះ នៅពេលប្រកាសពីដំណើរមកដល់របស់លោក Netanyahu លោក Orban បានប្រកាសកាលពី ថ្ងៃព្រហស្បតិ៍ថាហុងគ្រីនឹងដកខ្លួនទាំងស្រុងចេញពី ICC ដែលជាតុលាការអន្តរជាតិមួយត្រូវបានបង្កើតឡើងដើម្បីកាត់ទោសជនជាប់ចោទប្រព្រឹត្តឧក្រិដ្ឋកម្មសង្រ្គាម អំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ។

ឆ្លើយតបទៅនឹងការប្រកាសរបស់លោក Orban លោក Netanyahu បាននិយាយថា «អ្នក (ហុងគ្រី) គាំទ្រពួកយើងនៅឯសហភាពអឺរ៉ុប អ្នកគាំទ្រយើងនៅឯអង្គការសហប្រជាជាតិ ហើយ អ្នកបានប្រកាន់យកជំហរយ៉ាងម៉ឺងម៉ាត់ចំពោះ ICC…នេះជារឿងដ៏សំខាន់បំផុតដែលប្រទេសប្រជាធិបតេយ្យទាំងអស់ត្រូវតែក្រោកឈរឡើងប្រឆាំងស្ថាប័នដ៏ពុករលួយមួយនេះ»។

គួរបញ្ជាក់ថា លោក Orban បានអញ្ជើញលោក Netanyahu បំពេញទស្សនកិច្ចនៅហុងគ្រី កាលពីខែវិច្ឆិកា ឆ្នាំ២០២៤ តែមួយថ្ងៃប៉ុណ្ណោះបន្ទាប់ពីតុលាការ ICC ចេញដីកាចាប់ខ្លួន មេដឹកនាំអ៉ីស្រាអែលរូបនេះ ជុំវិញការចោទប្រកាន់ពីឧក្រិដ្ឋកម្មសង្រ្គាមនៅហ្កាហ្សា៕