សហរដ្ឋអាម៉េរិក ដាក់ទណ្ឌកម្មលើមន្ត្រីជាន់ខ្ពស់ចិន និងហុងកុងចំនួន៦រូប ជុំវិញការគាបសង្កត់ឆ្លងប្រទេស និងសកម្មភាពបំផ្លាញស្វ័យភាពរបស់ហុងកុង
វ៉ាស៊ីនតោន៖ កាលថ្ងៃចន្ទទី៣១ ខែមីនា សហរដ្ឋអាម៉េរិកកាលពី បានដាក់ទណ្ឌកម្មលើមន្ត្រីជាន់ខ្ពស់ចិន និងហុងកុងចំនួន៦រូប ជុំវិញការគាបសង្កត់ឆ្លងប្រទេស និងសកម្មភាពបំផ្លាញស្វ័យភាពរបស់ហុងកុង។ ការណ៍នេះគឺជាវិធានការក្ដៅដំបូងមួយរបស់រដ្ឋបាលត្រាំ ក្នុងការដាក់ទណ្ឌកម្មលើមហាយក្សចិន ជុំវិញការបង្រ្កាបអ្នកតស៊ូមតិលទ្ធិប្រជាធិបតេយ្យនៅទីក្រុងហុងកុង។
ក្រសួងការបរទេសអាម៉េរិកបានអះអាងនៅក្នុងសេចក្តីថ្លែងការណ៍មួយថា ៖«មន្ត្រីរដ្ឋាភិបាលរដ្ឋបាលប៉េកាំង និងហុងកុងបានប្រើប្រាស់ច្បាប់សន្តិសុខជាតិរបស់ហុងកុងក្រៅទឹកដី ដើម្បីបំភិតបំភ័យ បំបិទមាត់ បំបិតសិទ្ធិ និងបៀតបៀនសកម្មជនគាំទ្រលទ្ធិប្រជាធិបតេយ្យចំនួន ១៩នាក់ ដែលត្រូវបានបង្ខំឱ្យភៀសខ្លួនទៅក្រៅប្រទេស រួមទាំងពលរដ្ឋអាម៉េរិកម្នាក់ និងប្រជាជនសហរដ្ឋអាម៉េរិក ៤នាក់ផ្សេងទៀត»។
ជាការឆ្លើយតប ៖«សហរដ្ឋអាម៉េរិកកំពុងដាក់ទណ្ឌកម្មបុគ្គលចំនួន ៦នាក់ដែលបានធ្វើសកម្មភាព ឬបំពានគោលនយោបាយដែលគំរាមកំហែងដល់ការបំផ្លាញបន្ថែមទៀតនូវស្វ័យភាពរបស់ទីក្រុងហុងកុង ផ្ទុយពីការប្តេជ្ញាចិត្តរបស់ចិន និងពាក់ព័ន្ធនឹងសកម្មភាពនៃការគាបសង្កត់ឆ្លងដែន»។
តាមពិតទៅ បណ្តាប្រទេសលោកខាងលិចបានរិះគន់រដ្ឋធានីប៉េកាំងចំពោះការដាក់ច្បាប់សន្តិសុខជាតិលើទីក្រុងហុងកុង និងប្រើប្រាស់ច្បាប់នោះដើម្បីបង្ក្រាបសកម្មជនគាំទ្រលទ្ធិប្រជាធិបតេយ្យ ក៏ដូចជាបិទប្រព័ន្ធផ្សព្វផ្សាយសេរី និងក្រុមសង្គមស៊ីវិលផងដែរ។ យ៉ាងណា អាជ្ញាធរចិន និងហុងកុងបានលើកឡើងថា ច្បាប់ដែលដាក់ទណ្ឌកម្មលើការវិទ្ធង្សនា ការគប់គិត ជាមួយកងកម្លាំងបរទេស និងអំពើភេរវកម្ម ដោយជាប់ពន្ធនាគាររហូតដល់មួយជីវិត បាននាំមកនូវស្ថិរភាពដល់ទឹកដីដែលគ្រប់គ្រងដោយចិន បន្ទាប់ពីមានការតវ៉ាប្រឆាំងរដ្ឋាភិបាលទ្រង់ទ្រាយធំក្នុងឆ្នាំ ២០១៩។
ទណ្ឌកម្មដែលបានប្រកាសកាលពីថ្ងៃចន្ទបានបង្កកទ្រព្យសម្បត្តិរបស់បុគ្គលទាំងនោះនៅក្នុងសហរដ្ឋអាម៉េរិក រួមទាំងលោក ដុង ជីងវៃ (Dong Jingwei) អតីតមន្ត្រីជាន់ខ្ពស់នៅទីភ្នាក់ងារស៊ើបការណ៍សម្ងាត់ស៊ីវិលដ៏សំខាន់របស់ប្រទេសចិនផងដែរ ដោយឥឡូវនេះ លោកជានាយកការិយាល័យរបស់រដ្ឋធានីប៉េកាំងសម្រាប់ការការពារសន្តិសុខជាតិនៅហុងកុង។
គួរជម្រាបថា លោក ដុង ពីមុនគឺជាអ្នកចាប់ចារកម្មកំពូលរបស់ប្រទេសចិនដែលមានការត្រួតពិនិត្យការប្រឆាំងការស៊ើបការណ៍សម្ងាត់៕
