លោក ត្រាំ អាចនឹងដាក់ពន្ធលើប្រេងរុស្ស៊ី ប្រសិនបើរុស្ស៊ី មិនឈានដល់បទឈប់បាញ់ជាមួយអ៊ុយក្រែន
វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានឲ្យដឹងថា លោកអាចនឹងដាក់ពន្ធ លើប្រេងរុស្ស៊ី ប្រសិនបើលោកជឿថា រុស្ស៊ីមានកំហុស ចំពោះការមិនឈានដល់បទឈប់បាញ់ជាមួយអ៊ុយក្រែន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
នៅក្នុងបទសម្ភាសន៍តាមទូរស័ព្ទជាមួយ NBC News លោក ត្រាំ បានឲ្យដឹងថា លោកពិតជាខឹងខ្លាំងណាស់ នៅពេលដែលប្រធានាធិបតីរុស្ស៊ីលោក វ្លាឌីមៀ ពូទីន បានរិះគន់ភាពជឿជាក់នៃការដឹកនាំរបស់ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី ដោយបន្ថែមថាការអត្ថាធិប្បាយនេះ “មិនស្ថិតនៅក្នុងទីតាំងត្រឹមត្រូវ”។
លោក ត្រាំ បានលើកឡើងថា “ប្រសិនបើរុស្ស៊ី និងខ្ញុំមិនអាចធ្វើកិច្ចព្រមព្រៀង ស្តីពីការបញ្ឈប់ការបង្ហូរឈាមនៅអ៊ុយក្រែន ហើយប្រសិនបើខ្ញុំគិតថា វាជាកំហុសរបស់រុស្ស៊ី ខ្ញុំនឹងដាក់ពន្ធបន្ទាប់បន្សំលើប្រេង លើប្រេងទាំងអស់ដែលចេញពីប្រទេសរុស្ស៊ី”។ លោកបានបន្តថា “នោះគឺថាប្រសិនបើអ្នកទិញប្រេងពីរុស្ស៊ី អ្នកមិនអាចធ្វើអាជីវកម្មនៅសហរដ្ឋអាមេរិកបាននោះទេ។ “វានឹងមានពន្ធ ២៥ ភាគរយលើប្រេងទាំងអស់ ដែលជាពន្ធពី ២៥ ទៅ ៥០ភាគរយលើប្រេងទាំងអស់”។
លោក ត្រាំ បានកត់សម្គាល់ថា ពន្ធលើរុស្ស៊ី នឹងមកដល់ក្នុងខែក្រោយ ប្រសិនបើទីក្រុងម៉ូស្គូ មិនចុះហត្ថលេខាលើបទឈប់បាញ់ជាមួយអ៊ុយក្រែន។ លោក ត្រាំ បានបន្ថែមថាលោក ពូទីន ដឹងថាលោកខឹង ប៉ុន្តែលោកមាន “ទំនាក់ទំនងល្អ” ជាមួយលោក ពូទីន ហើយនឹងនិយាយទៅកាន់មេដឹកនាំរុស្ស៊ីរូបនេះ ម្តងទៀតនៅសប្តាហ៍នេះ។
គួរបញ្ជាក់ថា ក្នុងអំឡុងពេលសន្ទនាតាមទូរស័ព្ទកាលពីថ្ងៃទី ១៨ ខែមីនា លោក ត្រាំ និងលោក ពូទីន បានព្រមព្រៀងគ្នាថាសន្តិភាពនៅអ៊ុយក្រែន “នឹងចាប់ផ្តើមជាមួយនឹងបទឈប់បាញ់ថាមពល និងហេដ្ឋារចនាសម្ព័ន្ធ”។
