ចលនាតស៊ូប្រដាប់អាវុធប្រឆាំងនឹងរដ្ឋាភិបាលយោធាមីយ៉ាន់ម៉ា បានរិះគន់របបយោធាឥតសំចៃមាត់ ជុំវិញការវាយប្រហារគ្មានធម៌មេត្តាតាមផ្លូវអាកាសលើភូមិ និងទីក្រុងនានា បើទោះបីជាប្រទេសកំពុងជួបគ្រោះរញ្ជួយដី
ណៃពិដោ៖ ចលនាតស៊ូប្រដាប់អាវុធប្រឆាំងនឹងរដ្ឋាភិបាលយោធាមីយ៉ាន់ម៉ាបានរិះគន់របបយោធាឥតសំចៃមាត់ ជុំវិញការវាយប្រហារគ្មានធម៌មេត្តាតាមផ្លូវអាកាសលើភូមិ និងទីក្រុងនានា បើទោះបីជាប្រទេសកម្សត់មួយនេះកំពុងជួបមហន្តរាយនៃគ្រោះរញ្ជួយដី ដែលបានសម្លាប់មនុស្សប្រហែល១៧០០នាក់ក៏ដោយ។
ក្រុមប្រដាប់អាវុធជនជាតិភាគតិចការ៉ែន អះអាងនៅក្នុងសេចក្តីថ្លែងការណ៍មួយថា រដ្ឋាភិបាលយោធាបន្តវាយប្រហារតាមផ្លូវអាកាសសំដៅលើតំបន់ជនស៊ីវិល ទោះបីជាប្រជាជនកំពុងរងគ្រោះយ៉ាងខ្លាំងដោយសារគ្រោះរញ្ជួយដីក៏ដោយ។
ក្រុមចលនាប្រដាប់អាវុធប្រឆាំងរបបសឹកមួយអះអាងថា៖«ក្នុងកាលៈទេសៈដ៏ស្មុគស្មាញ និងវេទនាបែបនេះ របបយោធា គួរតែផ្តល់អាទិភាពដល់កិច្ចខិតខំប្រឹងប្រែងជួយសង្គ្រោះ ប៉ុន្តែផ្ទុយទៅវិញ គឺរបបនេះផ្តោតលើការដាក់ពង្រាយកងកម្លាំង ដើម្បីវាយប្រហារប្រជាជនរបស់ខ្លួនឯងទៅវិញ»។ ភ្លាមៗបន្ទាប់ពីសោកនាដកម្មនៃគ្រោះរញ្ជួយដីដ៏សាហាវ យន្តហោះយោធាបានបើកការវាយប្រហារតាមអាកាស និងការវាយប្រហារដោយយន្តហោះគ្មានមនុស្សបើកនៅក្នុងរដ្ឋការ៉ែន។
ជុំវិញបញ្ហានេះ រដ្ឋមន្ត្រីការបរទេសសិង្ហបុរី លោក វីវៀន បាឡាគ្រិស្ហនន្ទ បានអំពាវនាវឱ្យមានបទឈប់បាញ់ជាបន្ទាន់ ដើម្បីជួយដល់ការចែកចាយជំនួយ បន្ទាប់ពីកិច្ចប្រជុំតាមប្រព័ន្ធអនឡាញជាមួយសមភាគីអាស៊ានស្ដីពីគ្រោះមហន្តរាយ។
ជាក់ស្តែង ក្រសួងការបរទេសសិង្ហបុរីបញ្ជាក់ក្នុងសេចក្តីថ្លែងការណ៍មួយថា៖«[លោក បាឡាគ្រីស្ហនន្ទ]បានអំពាវនាវឱ្យមានបទឈប់បាញ់ជាបន្ទាន់ និងមានប្រសិទ្ធភាពនៅក្នុងប្រទេសមីយ៉ាន់ម៉ា ដែលនឹងជួយសម្រួលដល់កិច្ចខិតខំប្រឹងប្រែងក្នុងការផ្ដល់ជំនួយមនុស្សធម៌ និងការបង្រួបបង្រួមជាតិរយៈពេលវែង សន្តិភាព និងការកសាងជាតិឡើងវិញ»។
គួរជម្រាបថា មីយ៉ាន់ម៉ាបានផុងខ្លួនកាន់តែជ្រៅទៅក្នុងវិបត្តិសង្គ្រាមស៊ីវិលជាមួយក្រុមប្រឆាំងប្រដាប់អាវុធជនជាតិភាគតិចជាច្រើន ចាប់តាំងពីរដ្ឋប្រហារឆ្នាំ២០២១ នៅពេលដែលរបបយោធាបានដណ្តើមអំណាចពីរដ្ឋាភិបាលជាប់ឆ្នោត លោកស្រី អ៊ុងសាន ស៊ូជី ។ កាលពីចុងសប្តាហ៍មុន គ្រោះរញ្ជួយដីកម្រិត៧,៧រ៉ិចទ័របានអង្រួនប្រទេសមីយ៉ាន់ម៉ាដោយបានបំផ្លិចផ្លាញយ៉ាងខ្លាំងខ្លាដល់ប្រទេសកំពុងជួបវិបត្តិមួយនេះ ដោយមនុស្សប្រមាណ១៧០០នាក់ស្លាប់ ហើយ ៣៤០០នាក់រងបួស ខណៈមនុស្សជាង៣០០នាក់កំពុងកប់នៅក្រោមសំណង់អាគារបាក់បែកនៅឡើយ៕
