អភិបាលរងខេត្តបន្ទាយមានជ័យ ណែនាំដល់ភ្នាក់ងារ បង្ការ និងពន្លត់អគ្គីភ័យ ត្រូវប្រុងប្រយ័ត្ន និងពង្រឹងតាមរយៈយន្តការត្រៀមបង្ការ ផ្សព្វផ្សាយឆ្លើយតប និងសង្គ្រោះបន្ទាន់ឱ្យបានទាន់ពេលវេលា ប្រកបដោយប្រសិទ្ធភាពខ្ពស់

បន្ទាយមានជ័យ៖ នៅព្រឹកថ្ងៃទី២៨ ខែមីនា ឆ្នាំ២០២៥ ឯកឧត្ដម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ លោក លី សុវណ្ណារិទ្ធ អភិបាលរង នៃគណៈអភិបាលខេត្ត តំណាងឯកឧត្តម អ៊ុំ រាត្រី អភិបាលនៃគណៈអភិបាលខេត្ត អញ្ជើញជាអធិបតីក្នុង “ទិវាជាតិ បង្ការ និងពន្លត់អគ្គីភ័យ ២២ កុម្ភៈ ២០២៥” ដែលពិធីនេះក៏មានការចូលរួមពីអភិបាលរងខេត្ត កងកម្លាំងទាំង៣ វិស័យឯកជន សិស្សានុសិស្ស អធិការក្រុង-ស្រុក កងកម្លាំងនគរបាលប៉ុស្តិ៍រដ្ឋបាលឃុំ -សង្កាត់ បានចូលរួម ប្រារព្ធ ធ្វេីឡេីងនៅសាលប្រជុំ ធំ សាលាខេត្តបន្ទាយមានជ័យ ។

នាឱកាសនោះលោក លី សុវណ្ណារិទ្ធ អភិបាលរង នៃគណៈអភិបាលខេត្ត លេីកឡេីងពីគ្រោះមហន្តរាយដែលបង្កឡើងដោយអគ្គីភ័យ បានជះឥទ្ធិពលខ្លាំងណាស់ដល់ជីវភាពរស់នៅរបស់ប្រជាពលរដ្ឋ ដែលបានបំផ្លាញទ្រព្យសម្បត្តិ សម្ភារ មាសប្រាក់ និងផ្ទះសម្បែង អាចនឹងត្រូវបំផ្លាញត្រឹមតែមួយប៉ព្រិចភ្នែក ដោយសារករណីអគ្គីភ័យនេះ ប្រសិនបើយើងខ្វះការប្រុងប្រយ័ត្ន និងមិនមានវិធានការទប់ស្កាត់ឲ្យបានត្រឹមត្រូវ និងទាន់ពេលវេលាទេនោះ។

ទន្ទឹមនេះដើម្បីចូលរួមកាត់បន្ថយហានិភ័យដែលបង្កឡើងដោយគ្រោះ អគ្គីភ័យ លោក ណែនាំដល់ភ្នាក់ងារ បង្ការ និងពន្លត់អគ្គីភ័យ ត្រូវតែប្រុងប្រយ័ត្ន និងពង្រឹងតាមរយៈយន្តការ ត្រៀមបង្ការ ផ្សព្វផ្សាយ ត្រៀមរៀបចំឆ្លើយតប និងសង្គ្រោះបន្ទាន់ឱ្យបានទាន់ពេលវេលា ប្រកបដោយប្រសិទ្ធភាពខ្ពស់។

លោកអភិបាលរងខេត្តក៏បានបញ្ជាក់ថា ទិវានៅថ្ងៃនេះ នឹងក្លាយទៅជាកម្លាំងចលករដ៏មានសារៈសំខាន់ ក្នុងការចូលរួមបំផុសស្មារតី និងក្រើនរំលឹកដាស់តឿនដល់បងប្អូនប្រជាពលរដ្ឋ ក៏ដូចជាគ្រប់អ្នកពាក់ព័ន្ធ ទាំងអស់ ឱ្យបង្កើនការប្រុងប្រយ័ត្នខ្ពស់ ចូលរួមកាន់តែខ្លាំងក្លា និងសកម្ម ថែមទៀត ក្នុងការរៀបចំ និងអភិវឌ្ឍប្រព័ន្ធសុវត្ថិភាពសង្គម ព្រមទាំង ការ គ្រប់គ្រងគ្រោះមហន្តរាយ ដែលបង្កឡើងដោយអគ្គីភ័យនេះបានកាន់តែល្អ ប្រសើឡើង៕