ក្រសួងពាណិជ្ជកម្ម ប្រកាសដាក់ដំណើរការជាផ្លូវការនូវប្រព័ន្ធតម្កល់លិខិតជូនដំណឹង នៃប្រតិបត្តិការដែលមានកិច្ចធានា ២.០ (SETFO 2.0)

ភ្នំពេញ៖ ក្រសួងពាណិជ្ជកម្ម សូមជូនដំណឹងដល់សាធារណជនមេត្តាជ្រាបថា ប្រព័ន្ធតម្កល់លិខិតជូនដំណឹងនៃប្រតិបត្តិការ ដែលមានកិច្ចធានា ២.០ (Secured Transactions Filing Office-SETFO 2.0) ត្រូវបានដាក់ឱ្យដំណើរការជាផ្លូវការចាប់ពី ពេលនេះតទៅ ក្រោយពីត្រូវបានកែសម្រួល និងរៀបចំនិម្មាបនកម្មថ្មីឡើងវិញ តាមរយៈកិច្ចសហការជាមួយមជ្ឈមណ្ឌល បណ្តុះធុរកិច្ចថ្មី “តេជោ” នៃក្រសួងសេដ្ឋកិច្ច និងហិរញ្ញវត្ថុ។

ប្រព័ន្ធ SETFO គឺជាប្រព័ន្ធស្វ័យប្រវត្តិកម្មសម្រាប់ផ្តល់សេវាសាធារណៈរបស់ក្រសួងពាណិជ្ជកម្ម ដែលត្រូវបាន បង្កើតឡើង និងដាក់ឱ្យដំណើរការតាំងពីឆ្នាំ២០០៨ ដោយផ្អែកលើច្បាប់ស្តីពីប្រតិបត្តិការដែលមានកិច្ចធានា។

ប្រព័ន្ធនេះ គឺជា មធ្យោបាយដ៏ងាយស្រួលសម្រាប់គ្រឹះស្ថានធនាគារ ឬមីក្រូហិរញ្ញវត្ថុ ក៏ដូចជាសាធារណជនទូទៅក្នុងការតម្កល់ ស្វែងរកកំណត់ត្រា និងព័ត៌មានពាក់ព័ន្ធនឹងលិខិតជូនដំណឹង សម្រាប់ជាមូលដ្ឋានក្នុងការសម្រេចចិត្ត និងកាត់បន្ថយហានិភ័យ និងព្យសនកម្មនានា មុននឹងផ្តល់ឥណទានចំពោះកូនបំណុល ដែលប្រើប្រាស់ទ្រព្យធានាជាចលនវត្ថុ។

លើសពីនេះ ប្រព័ន្ធ SETFO 2.0 នេះ នឹងផ្តល់ភាពងាយស្រួលដល់ធុរជន សហគ្រាសធុនតូច និងមធ្យម ក៏ដូចជាកសិករ ផលិតករ ក្នុងការទទួលបាននូវឥណទាន ឆាប់រហ័ស ដោយប្រើប្រាស់ចលនទ្រព្យ ឬកសិផលរបស់ខ្លួនជាទ្រព្យធានា។

ដើម្បីផ្តល់ភាពងាយស្រួលដល់អ្នកប្រើប្រាស់ ប្រព័ន្ធថ្មី SETFO 2.0 នេះ ក៏ត្រូវបានបន្ថែមមុខងារថ្មីមួយចំនួនផងដែរ រួមមាន៖ (១)-មុខងារសុវត្ថិភាពបច្ចេកវិទ្យា ដែលផ្តល់ភាពងាយស្រួលក្នុងការប្រើប្រាស់ប្រព័ន្ធ, (២)-មុខងារចុះឈ្មោះ និង ចូលប្រើប្រាស់ប្រព័ន្ធ តាមរយៈកម្មវិធីទូរសព្ទដៃ CamDigiKey, (៣)-មុខងារបង់ប្រាក់តាមអនឡាញទាំងស្រុង, (៤)-មុខងារ ស្នើសុំ និងទាញយករបាយការណ៍ស្រាវជ្រាវដែលមានការបញ្ជាក់ត្រឹមត្រូវតាមអនឡាញ, (៥)-មុខងារទាញយករបាយការណ៍ ស្រាវជ្រាវដែលមានការបញ្ជាក់ និងផ្ទៀងផ្ទាត់តាមថ្នាល verify.gov.kh និង (៦)-មុខងារពង្រឹងសុក្រឹតភាពលើលិខិតជូន ដំណឹងដោយការប្រើប្រាស់បច្ចេកវិទ្យាប្លុកឆេន (Cambodia Digital Ledger – CamDL)។

សម្រាប់ព័ត៌មានពាក់ព័ន្ធនឹងនីតិវិធីប្រើប្រាស់ផ្សេងៗនៃប្រព័ន្ធ SETFO សូមទាក់ទងមកកាន់ក្រុមការងារការិយាល័យ តម្កល់លិខិតជូនដំណឹងនៃប្រតិបត្តិការដែលមានកិច្ចធានានៃក្រសួងពាណិជ្ជកម្ម តាមរយៈគេហទំព័រ www.setto.moc.gov.kh /www.setfo.gov.kh ទូរសព្ទលេខ 089 510 600 ឬ Hotline: 1266 ឬ អ៊ីមែល [email protected] ៕