សមាជិកសភាអឺរ៉ុប៖ បារាំងគួរតែយករូបសំណាកសេរីភាពមកវិញ ព្រោះសហរដ្ឋអាម៉េរិក លែងមានតម្លៃសមនឹងទទួលបានសំណាកនេះទៀតហើយ

ប៉ារីស៖ សមាជិកសភាអឺរ៉ុបមកពីប្រទេស បារាំង លោក រ៉ាហ្វាអែល គ្លូកម៉ាន់ បាននិយាយ កាលពី ថ្ងៃអាទិត្យទី១៦ ខែមីនាថា បារាំង គួរតែ យក រូបសំណាក សេរីភាព មកវិញ ព្រោះ សហរដ្ឋអាម៉េរិក លែងមានតម្លៃ សមនឹងទទួលបានសំណាក នេះ ទៀតហើយ ។

លោក គ្លូកម៉ាន់ បាននិយាយនៅក្នុងសន្និបាតមួយថា៖«សូមផ្ដល់ឱ្យយើងមកវិញនូវរូបសំណាកសេរីភាព»។ លោកបន្តថា ៖«យើងនឹងនិយាយទៅកាន់ជនជាតិអាម៉េរិកដែលបានជ្រើសរើសនៅខាងពួកជនផ្តាច់ការ ទៅកាន់ជនជាតិអាម៉េរិកដែលបានបណ្តេញអ្នកស្រាវជ្រាវសម្រាប់ការទាមទារសេរីភាពខាងវិទ្យាសាស្ត្រថា សូមផ្ដល់ឱ្យយើងវិញនូវរូបសំណាកសេរីភាព»។

លោក គ្លូកម៉ាន់ បន្ថែមថា៖«យើង បាន ឱ្យ វា ទៅ អ្នក ជា អំណោយ ប៉ុន្តែ ជាក់ស្តែង អ្នក មើលងាយ វា ។ ដូច្នេះ វាគួរត្រឡប់មកផ្ទះវិញ »។

រូបសំណាកសេរីភាពត្រូវបានបង្ហាញនៅក្នុងកំពង់ផែទីក្រុងញូវយ៉កនៅថ្ងៃទី២៨ ខែតុលាឆ្នាំ១៨៨៦ សម្រាប់ខួបមួយរយឆ្នាំនៃការប្រកាសឯករាជ្យរបស់អាម៉េរិកជាអំណោយពីប្រជាជនបារាំងដល់អាម៉េរិក។ វារចនាដោយជនជាតិបារាំងឈ្មោះ អាហ្គូស្តេ បារថុលឌី (Auguste Bartholdi)។ បារាំងក៏មានរូបសំណាកសេរីភាពតូចមួយនៅលើទន្លេសែន (Seine) ក្នុងរដ្ឋធានីប៉ារីសដែរ។

លោក គ្លូកម៉ាន់ ដែលមាននិន្នាការគាំទ្រអ៊ុយក្រែន បានរិះគន់យ៉ាងខ្លាំងចំពោះការផ្លាស់ប្ដូរដ៏ខ្លាំងក្លារបស់លោកប្រធានាធិបតី ដូណាល់ ត្រាំ លើគោលនយោបាយអាម៉េរិកស្តីពីសង្រ្គាម។

លោកក៏បានរិះគន់លើការកាត់បន្ថយរបស់លោក ត្រាំ ចំពោះស្ថាប័នស្រាវជ្រាវរបស់សហរដ្ឋអាម៉េរិក ដែលបានជំរុញឱ្យមានការផ្តួចផ្តើមគំនិតរបស់រដ្ឋាភិបាលបារាំងរួចហើយ ដើម្បីទាក់ទាញពួកគេមួយចំនួនឱ្យទៅធ្វើការនៅប្រទេសបារាំង។

ចាប់តាំងពីលោក ត្រាំ ត្រលប់មកជាចាហ្វាយសេតវិមានវិញក្នុងខែមករា រដ្ឋាភិបាលរបស់លោកបានកាត់បន្ថយមូលនិធិស្រាវជ្រាវសហព័ន្ធ និងបានស្វែងរកការបណ្តេញបុគ្គលិកសហព័ន្ធរាប់រយនាក់ដែលធ្វើការលើការស្រាវជ្រាវសុខភាព និងអាកាសធាតុ។ មិនត្រឹមតែប៉ុណ្ណោះ លោក គ្លូកម៉ាន់ ក៏បានរិះគន់មេដឹកនាំស្តាំនិយមជ្រុលនៅក្នុងប្រទេសបារាំងផងដែរ ដោយចោទប្រកាន់ពួកគេថាជាក្រុមអ្នកគាំទ្រលោក ត្រាំ និងមហាសេដ្ឋីអេឡុន ម៉ាសក៍ ដែលកំពុងដឹកនាំកិច្ចខិតខំប្រឹងប្រែងរបស់ប្រធានាធិបតីក្នុងការកាត់បន្ថយការចំណាយ៕