ក្រសួងប្រៃសណីយ៍ នឹងសហការជាមួយក្រុមហ៊ុនតិកតុ រៀបចំសិក្ខាសាលាផ្សព្វផ្សាយ ពីសុវត្ថិភាពលើប្រព័ន្ធអនឡាញ

ភ្នំពេញ៖ ក្រសួងប្រៃសណីយ៍ និងទូរគមនាគមន៍កម្ពុជា(ក.ប.ទ.) នឹងសហការជាមួយក្រុមហ៊ុនតិកតុ (TikTok) រៀបចំសិក្ខាសាលាផ្សព្វផ្សាយ ពីសុវត្ថិភាពលើប្រព័ន្ធអនឡាញ និងគោលការណ៍ណែនាំរបស់ក្រុមហ៊ុននេះ ពាក់ព័ន្ធនឹងការរកចំណូលសម្រាប់អ្នកផលិតមាតិកាខ្មែរ។ នេះបើតាមសេចក្តីជូនដំណឹងរបស់ ក្រសួងប្រៃសណីយ៍ និងទូរគមនាគមន៍ នៅថ្ងៃទី១៥ ខែមីនា ឆ្នាំ២០២៥។

តាមក្រសួង សិក្ខាសាលានេះ នឹងប្រព្រឹត្តទៅ នៅថ្ងៃទី១៩ ខែមីនា ឆ្នាំ២០២៥ ចាប់ពីម៉ោង៩ព្រឹកទៅ នៅសាលប្រជុំជាន់ទី៣ ទីស្តីការក្រសួងផ្ទាល់តែម្តង ហើយគោលបំណង គឺដើម្បីចែករំលែកព័ត៌មាន ឱកាសរកប្រាក់ចំណូល (TikTok Monetization) សម្រាប់អ្នកផលិតមាតិកា។ បន្ថែមពីនេះ សិក្ខាសាលា ក៏នឹងចែករំលែកពីការការពារសុវត្ថិភាពលើប្រព័ន្ធអនឡាញ និងការប្រើប្រាស់បណ្តាញសង្គម TikTok ប្រកបដោយប្រសិទ្ធភាពផងដែរ។

ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នឹងចូលរួមបើកសិក្ខាសាលានេះ និងមានការចូលរួមពីតំណាងក្រសួង ស្ថាប័ន និងក្លឹបអ្នកកាសែតកម្ពុជា។ មិនតែប៉ុណ្ណោះ សិក្ខាសាលានេះ ក៏នឹងបើកឱកាសដល់អ្នកផលិតមាតិកា វិស័យឯកជន សាធារណជន ចូលរួមផងដែរ ដោយកំណត់ឱ្យចុះឈ្មោះឱ្យបានមុនថ្ងៃទី១៨មីនា៕