ឥណ្ឌូណេស៊ី-វៀតណាម ព្រមព្រៀងគ្នា ដំឡើងកម្រិតទំនាក់ទំនងទៅជាភាពជា «ដៃគូយុទ្ធសាស្ត្រគ្រប់ជ្រុងជ្រោយ»
ហ្សាការតា៖ ឥណ្ឌូណេស៊ី និងវៀតណាម កាលពីថ្ងៃចន្ទទី១០មីនា បានព្រមព្រៀងគ្នា ដំឡើងកម្រិតទំនាក់ទំនងទៅជាភាពជា «ដៃគូយុទ្ធសាស្ត្រគ្រប់ជ្រុងជ្រោយ» ខណៈមេដឹកនាំនៃប្រទេសបងធំប្រចាំតំបន់អាស៊ីអាគ្នេយ៍ទាំង២ បានជួបប្រជុំគ្នានៅរដ្ឋធានីហ្សាការតា ដើម្បីប្រារព្ធខួប៧០ឆ្នាំនៃទំនាក់ទំនងការទូត។
អគ្គលេខាបក្សកុម្មុយនីស្ដវៀតណាម លោក តូ ឡាំ បានជួបពិភាក្សាជាមួយប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាតូ នៅរដ្ឋធានីហ្សាការតា ដើម្បីជំរុញកិច្ចសហប្រតិបត្តិការសេដ្ឋកិច្ច និងការពារជាតិ។ លោក ប្រាបូវ៉ូ ប្រាប់សន្និសីទសារព័ត៌មានបន្ទាប់ពីកិច្ចប្រជុំថា៖«ពួកយើងបានព្រមព្រៀងគ្នានៅក្នុងកិច្ចប្រជុំថា ពួកយើងចង់បង្កើនទំនាក់ទំនង និងកិច្ចសហប្រតិបត្តិការរបស់យើង។ យើងចង់ធ្វើឱ្យប្រសើរឡើងនូវទំនាក់ទំនងរបស់យើងទៅជាភាពជាដៃគូយុទ្ធសាស្ត្រដ៏ទូលំទូលាយ។ យើងពិតជាចង់ពង្រឹង និងសហការលើស្ទើរតែគ្រប់វិស័យទាំងអស់»។
លោក ប្រាបូវ៉ូ ក៏នឹងទៅបំពេញទស្សនកិច្ចនៅប្រទេសវៀតណាមក្នុងពេលឆាប់ៗនេះ ដើម្បីចុះហត្ថលេខាលើកិច្ចព្រមព្រៀងអនុវត្តកិច្ចសហប្រតិបត្តិការនៅក្នុងតំបន់សេដ្ឋកិច្ច ហើយលោកបង្ហាញក្ដីសង្ឃឹមថា សភាឥណ្ឌូណេស៊ីនឹងផ្តល់សច្ចាប័នលើកិច្ចព្រមព្រៀងនេះនៅខែក្រោយ។
យ៉ាងណា ឥណ្ឌូណេស៊ី និងវៀតណាម បានទាមទារតំបន់ជម្លោះសមុទ្ទចិនខាងត្បូង ហើយនាវារបស់ប្រទេសទាំងពីរ បានជាប់ពាក់ព័ន្ធក្នុងការប៉ះទង្គិចដ៏កម្រ។ រដ្ឋធានីហ្សាការតា បានកោះហៅឯកអគ្គរដ្ឋទូតវៀតណាមក្នុងឆ្នាំ២០១៩ បន្ទាប់ពីបានចោទប្រកាន់ឆ្មាំសមុទ្ទវៀតណាមថា បានបុកនាវារបស់ខ្លួន ដើម្បីរារាំងការស្ទាក់ចាប់ទូកនេសាទខុសច្បាប់។ ឥណ្ឌូណេស៊ី ជាប្រទេសប្រជុំកោះធំជាងគេលើពិភពលោក ចង់បញ្ឈប់ទូកនេសាទខុសច្បាប់ក្នុងទឹកដីរបស់ខ្លួន ដោយចំណាយរាប់ពាន់លានដុល្លារក្នុងមួយឆ្នាំៗ៕
