តំណែងជានាយករដ្ឋមន្រ្តីថៃរបស់លោកស្រី ផែថងថាន ស៊ីណាវ៉ាត្រា កំពុងស្ថិតនៅមាត់ជ្រោះហានិភ័យ នៃការជ្រុះចេញពីតំណែង

បាងកក៖ តំណែងជានាយករដ្ឋមន្រ្តីថៃរបស់លោកស្រី ផែថងថាន ស៊ីណាវ៉ាត្រា កំពុងស្ថិតនៅមាត់ជ្រោះហានិភ័យនៃការជ្រុះចេញពីតំណែង ចំពេលប្រជាជនថៃភាគច្រើនបង្ហាញពីភាពអស់ជំនឿ និងគ្មានទំនុកចិត្តលើរាជរដ្ឋាភិបាលរបស់នាយករដ្ឋមន្ត្រីថៃទី៣១រូបនេះ។ ជាមួយគ្នាមេបក្សប្រឆាំង ក៏បានដាក់សំណើបោះឆ្នោតដកសេចក្តីទុកចិត្តទៅប្រធានសភា។

ភាពបរាជ័យរបស់មេដឹកត្រកូលស៊ីណាវ៉ាត្រា ក្នុងការស្តារឡើងវិញនៃសេដ្ឋកិច្ចដែលកំពុងដាំក្បាលចុះក្រោមក្នុងរយៈពេល៦ខែកន្លងមក បានក្លាយភាពអស់សង្ឃឹមរបស់ពលរដ្ឋថៃភាគច្រើនផងដែរ។ ទន្ទឹមនឹងការធ្លាក់ប្រជាប្រិយភាពបែបនេះ ជួនចំពេលមេបក្សប្រឆាំងថៃ បានដាក់សំណើទៅប្រធានសភា ដើម្បីបោះឆ្នោតដកសេចក្តីទុកចិត្តទម្លាក់លោកស្រី ផែថងថាន ចេញពីតំណែង។ ជាក់ស្តែង ប្រហែល៦៣ភាគរយនៃអ្នកឆ្លើយតបទៅនឹងការស្ទង់មតិមួយបង្ហាញថា ពួកគេអស់ជំនឿចិត្តទាំងស្រុង ឬគ្មានទំនុកចិត្តទាល់តែសោះអំពីសមត្ថភាពដឹកនាំរបស់រាជរដ្ឋាភិបាលថៃបច្ចុប្បន្ន លើការដោះស្រាយបញ្ហារបស់ប្រទេស ដោយសារតែមិនមានការផ្លាស់ប្ដូរជាដុំកំភួន ឬលទ្ធផលផ្លែផ្កាច្បាស់លាស់ ចាប់តាំងពីលោកស្រីឡើងកាន់អំណាចជានាយករដ្ឋមន្រ្តី។ គួរជម្រាបថា ការស្ទង់មតិនេះ ធ្វើឡើងលើជនជាតិថៃ១៣១០នាក់ មានអាយុចាប់ពី១៨ឆ្នាំឡើងទៅ។

តើនាយករដ្ឋមន្រ្តីថៃទី៣១រូបនេះ អាចរអិលធ្លាក់ចេញពីកៅអីដែរឬទេ? កូនស្រីពៅរបស់អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត្រា នឹងត្រូវប្រឈមការបោះឆ្នោតដកសេចក្តីទុកចិត្តនៅចុងខែមីនា ចំពេលជំហរសេដ្ឋកិច្ចរបស់ប្រទេសនេះកំពុងទន់ជ្រាយ ស្របពេលផលិតផលក្នុងស្រុកសរុប (GDP) បានកើនឡើងត្រឹមតែ២,៥ភាគរយក្នុងឆ្នាំ២០២៤ ពោលគឺតិចជាងការរំពឹងទុក។ ក្រោយត្រូវគ្រាប់ព្រួញរិះគន់ដូចព្យុះពីសំណាក់ប្រជាជន និងឥស្សរជនជាន់ខ្ពស់ថៃមួយចំនួនកាលពីថ្ងៃទី២ ខែមីនា ឆ្នាំ២០២៥ នាយករដ្ឋមន្ត្រីវ័យក្មេងរូបនេះអះអាងថា ខ្លួនកំពុងត្របាញ់ជើងស្វែងរកកិច្ចសហប្រតិបត្តិការពីគ្រប់ភាគី ដើម្បីជួយគាំទ្រសេដ្ឋកិច្ច ដោយហេតុថា រាជរដ្ឋាភិបាលតែម្នាក់ឯងមិនអាចធ្វើទៅរួចនោះទេ។

ងាកត្រឡប់មកវិញ! ហេតុអ្វីបានជានាយករដ្ឋមន្រ្តីត្រូកូលស៊ីណាវ៉ាត្រាប្រឈមនឹងការជ្រុះចេញពីតំណែង? ជាការពិតណាស់ ក្រៅតែពីប្រជាជនភាគច្រើនបង្ហាញពីភាពអស់ជំនឿចិត្តលើ លោកស្រី ផែថងថាន ស៊ីណាវ៉ាត្រា ទន្ទឹមនឹងនោះ ក៏មានមេដឹកបក្សប្រឆាំងថៃនៅជាឆ្អឹងទទឹង-ក ដែលអាចទាញដៃលោកស្រីជ្រុះចេញពីតំំណែងបានគ្រប់ពេលវេលាផងដែរ។ មេដឹកនាំគណបក្សប្រជាជន ដែលជាបក្សឆាំង លោក ណាតតាផុង រឿនបញ្ញាវុទ្ធ បានដាក់សំណើទៅប្រធាន​សភា​ថៃ លោក វ៉ាន់ មូហាម៉ាដ ន័រម៉ាតាន ដើម្បីរៀបចំការបោះឆ្នោតទម្លាក់តំណែងនាយករដ្ឋមន្រ្តីថៃរូបនេះ ក្រោមហេតុផលការដាំក្បាលចុះនៃសេដ្ឋកិច្ច ខ្វះលក្ខណៈសម្បត្តិជានាយករដ្ឋមន្រ្តី ខ្វះចំណេះដឹង និងមិនអាចដោះស្រាយបញ្ហាជូនជាតិ និងប្រជាជនបានក្នុងនាមជាអ្នកកាន់ចង្កូតដឹកនាំប្រទេស។

ពិភាល់ និងមន្ទិល ដែលស្អិតជាប់ក្នុងចិត្តនោះ គឺថា តើលោកស្រី ផែថងថាន អាចនឹងដើរតាមគន្លងឪពុក (លោក ថាក់ស៊ីន ស៊ីណាវ៉ាត្រា) និងម្តាយមីង (លោកស្រី យីងឡាក់ ស៊ីណាវ៉ាត្រា) ឬយ៉ាងណា? គួរបញ្ជាក់ថា តំណែងជានាយករដ្ឋមន្រ្តីរបស់លោកស្រី ផែថងថាន ស៊ីណាវ៉ាត្រា កំពុងប្រឈមនឹងហានិភ័យគ្រប់ពេលវេលា ក្រោមការប្រឆាំង និងភាពបរាជ័យមួយចំនួនធំ។ ដូច្នេះ ជោគវាសនាជានាយករដ្ឋមន្រ្តីថៃរបស់លោកស្រី អាចនឹងដើរតាមគន្លងត្រកូលស៊ីណាវ៉ាត្រា ព្រោះថា ទាំងឪពុក និងម្តាយមីងសុទ្ធតែធ្លាប់ធ្វើជានាយករដ្ឋមន្រ្តីថៃ ប៉ុន្តែត្រូវបានរដ្ឋប្រហារជ្រុះចេញពីតំណែង និងចុងក្រោយបានត្រឹមក្លាយជាជនភៀសខ្លួនទៅនៅក្រៅស្រុកតែប៉ុណ្ណោះ។