មេដឹកនាំបក្សប្រឆាំងថៃ ដាក់សំណើទៅប្រធានសភា ដើម្បីបោះឆ្នោតដកសេចក្តីទុកចិត្ត ក្នុងគោលបំណងទម្លាក់លោកស្រី ផែថងថាន ស៊ីណាវ៉ាត្រា ចេញពីតំណែង
បាងកក៖ មេដឹកនាំគណបក្សប្រឆាំងថៃ លោក ណាតតាផុង រឿនបញ្ញាវុទ្ធ កាលពីថ្ងៃព្រហស្បតិ៍ទី២៧កុម្ភៈ បានដាក់សំណើទៅប្រធានសភា ដើម្បីបោះឆ្នោតដកសេចក្តីទុកចិត្ត ក្នុងគោលបំណងទម្លាក់នាយករដ្ឋមន្រ្តី លោកស្រី ផែថងថាន ស៊ីណាវ៉ាត្រា ចេញពីតំណែង។
មេដឹកនាំគណបក្សប្រជាជនថៃ លោក ណាតតាផុង បានលើកឡើងពីភាពបរាជ័យរបស់នាយករដ្ឋមន្ត្រី ក្នុងការគ្រប់គ្រងរាជរដ្ឋាភិបាលចម្រុះឱ្យមានប្រសិទ្ធភាព ជាមូលហេតុដែលខ្លួនបានស្នើបោះឆ្នោតទម្លាក់តំណែងលោកស្រី។ ជាក់ស្តែង លោក ណាតតាផុង បានកត់សម្គាល់ថា៖«យើងមិនអាចជឿទុកចិត្តលើរាជរដ្ឋាភិបាលបច្ចុប្បន្នដើម្បីគ្រប់គ្រងប្រទេសបានទេ ដោយសារនាយករដ្ឋមន្រ្តីខ្វះលក្ខណៈសម្បត្តិ ចំណេះដឹង និងឆន្ទៈក្នុងការដោះស្រាយបញ្ហារបស់ប្រជាជន»។ លើសពីនេះ លោក ណាតតាផុង ក៏បានរិះគន់ការអនុវត្តសកម្មភាពសេដ្ឋកិច្ចរបស់រាជរដ្ឋាភិបាល ដោយចង្អុលបង្ហាញថា កំណើនGDPរបស់ប្រទេសថៃ ស្ថិតក្នុងចំណោមកម្រិតទាបបំផុតក្នុងតំបន់អាស៊ាន។
លោកបានថ្កោលទោសការតែងតាំងរដ្ឋមន្ត្រី ដោយផ្អែកលើសំណើនយោបាយ និងបានចោទប្រកាន់នាយករដ្ឋមន្ត្រីថា ខ្វះភាពជាអ្នកដឹកនាំក្នុងការគ្រប់គ្រងប្រទេស។ បញ្ហាសំខាន់ដែល លោក ណាតតាផុង បានសង្កត់ធ្ងន់ គឺការយល់ព្រមរបស់នាយករដ្ឋមន្ត្រីក្នុងការអនុញ្ញាតឱ្យឪពុករបស់ខ្លួន ជាអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា មានឥទ្ធិពល និងពាក់ព័ន្ធក្នុងកិច្ចការរាជរដ្ឋាភិបាល។ ជាងនេះទៅទៀត លោកបានលើកឡើងពីបញ្ហាពុករលួយ ដោយអះអាងថា ការជជែកដេញដោលដកសេចក្តីទុកចិត្តពីលោកស្រី ផែថងថាន នឹងរូតវាំងននខ្មៅ ដើម្បីបង្ហាញពីការគ្រប់គ្រងមិនបានល្អរបស់រាជរដ្ឋាភិបាល។
បន្ទាប់ពីទទួលបានសំណើនេះ ប្រធានសភាថៃ លោក វ៉ាន់ មូហាម៉ាដ ន័រម៉ាតា បានបញ្ជាក់ថា ខ្លួននឹងពិនិត្យតាមដាននីតិវិធី។ ការផ្ទៀងផ្ទាត់ឈ្មោះ និងខ្លឹមសារនឹងត្រូវបញ្ចប់ក្នុងរយៈពេលប្រាំពីរថ្ងៃ ហើយការកែប្រែចាំបាច់ណាមួយនឹងត្រូវធ្វើឡើង។ ពេលសម្រេចហើយ សំណើនឹងត្រូវបញ្ជូនទៅរាជរដ្ឋាភិបាល។ ប្រធានសភារូបនេះ ក៏បានបញ្ជាក់ដែរថា រាជរដ្ឋាភិបាលបានត្រៀមខ្លួនសម្រាប់ការជជែកដេញដោល ដែលគ្រោងធ្វើនៅថ្ងៃទី២៤ ខែមីនា។ រយៈពេល និងពេលវេលានៃការជជែកដេញដោលនឹងត្រូវពិភាក្សារវាងមេដឹកនាំបក្សប្រឆាំង និងប្រមុខរាជរដ្ឋាភិបាល ស្របតាមច្បាប់ និងនីតិវិធីរបស់សភា៕
