ឯកឧត្ដម ហ្សង់ហ្វ្រង់ស័រ តាន់៖ ពេលធ្វើការជាមួយសម្ដេចធិបតី នៅក្រៅប្រទេសបានមើលឃើញពីគុណសម្បត្តិដ៏វិសេសវិសាលក្នុងនាមជាអ្នកដឹកនាំ គឺសម្តេចមានសមត្ថភាពខ្ពស់ណាស់
ភ្នំពេញ៖ ឯកឧត្ដម ហ្សង់ហ្វ្រង់ស័រ តាន់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានបញ្ជាក់ថា នៅក្នុងរយៈពេល១៨ខែចុងក្រោយនេះ ក្រោយពេលធ្វើការ និងរួមដំណើរជាមួយសម្ដេចជាពិសេសនៅពេលទស្សនកិច្ចនៅក្រៅប្រទេសម្ដងៗ លោក ហ្សង់ហ្វ្រង់ស័រ តាន់ បានមើលឃើញពីគុណសម្បត្តិដ៏វិសេសវិសាលមួយ ក្នុងនាមជាអ្នកដឹកនាំ គឺសម្តេចនាយករដ្ឋមន្ត្រី មានសមត្ថភាពខ្ពស់ណាស់ និងស្រូបយកព័ត៌មានពហុវិស័យ ព្រមជាមួយនឹងការស្ដាប់ច្រើន សួរច្រើនជាងនិយាយ ហើយសួរលម្អិតថែមទៀតផង។
នៅក្នុងវេទិកាសារព័ត៌មានលើកទី៦ ដែលរៀបចំដោយអង្គភាពអ្នកនាំពាក្យរាជរដ្ឋាភិបាល ស្ដីពី «រាជរដ្ឋាភិបាល នីតិកាលទី៧ នៃរដ្ឋសភា ជាក្ដីសង្ឃឹមរបស់ប្រជាពលរដ្ឋខ្មែរ» នៅសាលសេរីភាព អគារមិត្តភាព ទីស្ដីការគណៈរដ្ឋមន្រ្តី នាព្រឹកថ្ងៃទី២៧ ខែកុម្ភៈ ឆ្នាំ២០២៥ ឯកឧត្ដម ហ្សង់ហ្វ្រង់ស័រ តាន់ បានបង្ហាញការពេញចិត្តជាខ្លាំងចំពោះចរិយាមាយាថប្រកបដោយគុណធម៌របស់ម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
សេចក្តីពេញចិត្តនេះ បានក្លាយជាអន្ទាក់បេះដូង ទាញឯកឧត្ដមឱ្យសម្រេចចិត្តមកចូលរួមជីវភាពនយោបាយជាមួយគណបក្សប្រជាជនកម្ពុជា និងរដ្ឋាភិបាលនីតិកាលទី៧ ដែលដឹកនាំដោយសម្ដេចមហាបវរធិបតី។
បើតាមឯកឧត្ដមហ្សង់ហ្វ្រង់ស័រ តាន់ លោកបានស្គាល់ និងផ្ដើមមានទំនាក់ទំនងជាមួយសម្ដេចមហាបវរធិបតី នៅឆ្នាំ២០២២ ពោលមួយឆ្នាំមុនសម្ដេចឡើងកាន់តំណែងជានាយករដ្ឋមន្រ្តី៕
