អភិបាលខេត្តបន្ទាយមានជ័យ ទទួលបដិសណ្ឋារកិច្ចគណៈកម្មការទី២ នៃព្រឹទ្ធសភា ដើម្បីពិភាក្សា និងឈ្វេងយល់ពាក់ព័ន្ធទៅនឹងវិស័យពាក់ព័ន្ធមួយចំនួន

បន្ទាយមានជ័យ៖ ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត ទទួលបដិសណ្ឋារកិច្ចគណៈកម្មការទី២ នៃព្រឹទ្ធសភា ដឹកនាំដោយឯកឧត្តម យស ផានីត្តា ប្រធានគណៈកម្មការទី២ នៃព្រឹទ្ធសភា រួមនឹងប្រតិភូអមដំណេីរ ដើម្បីពិភាក្សា និងឈ្វេងយល់ពាក់ព័ន្ធទៅនឹងវិស័យពាក់ព័ន្ធ ដែលជាសមត្ថកិច្ចរបស់គណៈកម្មការទី២ នៃព្រឹទ្ធសភា។ កិច្ចប្រជុំនេះធ្វេីឡេីងសាលប្រជុំ ខ សាលាខេត្តបន្ទាយមានជ័យ នាព្រឹកថ្ងៃទី១៩ ខែកុម្ភៈ ឆ្នាំ ២០២៥ ។

ព្រមជាមួយគ្នានោះ ឯកឧត្ដម អ៊ុំ រាត្រី ក៏បានទទួលស្វាគមន៍យ៉ាងកក់ក្តៅចំពោះ ឯកឧត្តម យស ផានីត្តា ប្រធានគណៈកម្មការទី២នៃព្រឹទ្ធសភា និងប្រតិភូ ដែលបានអញ្ជើញមកបំពេញបេសកកម្មនៅខេត្តបន្ទាយមានជ័យ ក្នុងគោលបំណងដើម្បីឈ្វេងយល់អំពីវិស័យពាក់ព័ន្ធ នឹងសមត្ថកិច្ចរបស់គណៈកម្មការ ក្នុងនោះរួមមាន វិស័យសេដ្ឋកិច្ចនិងហិរញ្ញវត្ថុ វិស័យគយនិងរដ្ឋាករ វិស័យពន្ធដារវិស័យរតនាគារ វិស័យធនាគារ និងការងារសវនកម្មនៅថ្នាក់ក្រោមជាតិ នៅរដ្ឋបាលខេត្ត។

ក្នុងនោះដែរឯកឧត្តម អភិបាល បាលខេត្តក៏បានបង្ហាញវឌ្ឍនភាពរបស់ខេត្ត ក៏ដូចជាតំបន់សេដ្ឋកិច្ចដែលមាននៅក្នុងខេត្ត និងច្រកទ្វាសំខាន់ៗដូុចជា ច្រកទ្វារព្រំដែនអន្តរជាតិប៉ោយប៉ែត ដែលជាមធ្យមភ្ញៀវជាតិចូលក្នុង ១ថ្ងៃចំនួន១០.១៩៨នាក់ និងចេញចំនួន ១០.២៣១នាក់ រីឯភ្ញៀវអន្តរជាតិចូលក្នុង ១ថ្ងៃចំនួន ១៣.៩៩៥នាក់ និង ចេញ ១៣.៨៨៥នាក់។ ច្រកទ្វារព្រំដែនអន្តរជាតិស្ទឹងបត់ សម្រាប់ ដឹក ទំនិញចេញ-ចូល តាមរថយន្ដធុនធ្ងន់ជាមធ្យម ២៤០គ្រឿង ក្នុង ១ថ្ងៃ។ ច្រកទ្វារតំបន់ព្រំដែនម៉ាឡៃ និងច្រកទ្វារតំបន់ព្រំដែនបឹងត្រកួនសម្រាប់ប្រជាពលរដ្ឋចេញ ចូល ដោះ ដូរទំនិញ និង នាំចេញទំនិញកសិផលប្រចាំថ្ងៃ។

នាឱកាសនោះឯកឧត្តម យស ផានីត្តា ប្រធានគណៈកម្មការទី២ នៃព្រឹទ្ធសភា ក៏បានថ្លែងនូវការកោតសរសេីរចំពោះរដ្ឋបាលខេត្ត ដែលបានខិតខំប្រឹងប្រែង បំពេញកិច្ចការងារនាពេលកន្លងមកបានយ៉ាងប្រសេីរ តាមរយៈ របាយការសង្ខេបរបស់រដ្ឋបាលខេត្ត។

ឯកឧត្ដមបន្តថា ការដែរគណៈកម្មការទី២ នៃព្រឹទ្ធសភា ចុះមកបំពេញបេសកកម្មគឺ ដេីម្បីភ្ជាប់ទំនាក់ទំនងល្អរវាង ស្ថាប័នថ្នាក់ជាតិ និងថ្នាក់ក្រោមជាតិ ជួយគ្នា ក្នុងការអភិវឌ្ឍសង្គមមូលដ្ឋាន តាមរយៈ គោលនយោបាយរបស់ប្រមុខរាជរដ្ឋាភិបាល ក្នុងអាណត្តិទី៦ ក៏ដូចជានីតិកាលទី៧ ក្រោម ការដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា។

ទន្ទឹមជាមួយគ្នានោះឯកឧត្តម ក៏បានសំណូមបន្ថែមទៅដល់រដ្ឋបាលខេត្ត បន្តរួមគ្នាអភិវឌ្ឍមូលដ្ឋានឱ្យបានល្អ ជាពិសេសទៅលើការផ្តល់សេវាសាធារណៈផ្សេងៗ ជូនដល់ប្អូនប្រជាពលរដ្ឋនៅមូលដ្ឋាន ឱ្យកាន់តែមានភាពល្អប្រសេីរបន្ថែមទៀត ដូចអ្វីដែលរដ្ឋបាលខេត្តបានធ្វើកន្លងមក។ ក៏ដូចជាវិស័យពាក់ព័ន្ធ នឹងសមត្ថកិច្ចរបស់គណៈកម្មការ ដូចជា វិស័យសេដ្ឋកិច្ចនិងហិរញ្ញវត្ថុ វិស័យគយនិងរដ្ឋាករ វិស័យពន្ធដារវិស័យរតនាគារ វិស័យធនាគារ និងការងារសវនកម្មនៅថ្នាក់ក្រោមជាតិជាដេីម៕