ភ្នំពេញ៖ យុវជនម្នាក់កាប់សង្សារដាច់ជើងនៅផ្សារច្បារអំពៅ រួចហើយបានជិះម៉ូតូទៅលោតទឹកនៅស្ពានព្រែកសំរោង តែត្រូវបានប្រជាពលរដ្ឋជួយទាន់ពេលវេលា រួចសាច់ញាតិក៏បានបញ្ជូនទៅកាន់មន្ទីរពេទ្យជ័យជំនះ នាថ្ងៃ១៣ ខែកុម្ភៈ ឆ្នាំ២០២៥ ។
ជនរងគ្រោះឈ្មោះ វែង ស្រីឡែន ភេទ ស្រី អាយុ ១៧ឆ្នាំ ជនជាតិ ខ្មែរ មុខរបរ បុគ្គលិកហាងចរណៃ ស្នាក់នៅ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។ ជនសង្ស័យឃាត់ខ្លួនឈ្មោះ ភ័ក្រ្ត សុវណ្ណារ៉ា ភេទ ប្រុស អាយុ ២១ឆ្នាំ ជនជាតិ ខ្មែរ មុខរបរ កម្មកររោងចក្រ ស្នាក់នៅភូមិចុងព្រែក សង្កាត់ព្រែកឯង ខណ្ឌច្បារអំពៅ។
កាលពីអំឡុងឆ្នាំ២០២៣ ជនរងគ្រោះ និងជនសង្ស័យមានទំនាក់ទំនងស្នេហានឹងគ្នា។ បន្ទាប់មក ជនសង្ស័យក៏ឱ្យជនរងគ្រោះទៅរស់នៅជាមួយគ្នានៅផ្ទះជនសង្ស័យ តែជនរងគ្រោះពុំព្រម ហើយក៏មានទំនាស់ពាក្យសម្តីគ្នា ពេលនោះជនសង្ស័យគម្រាមជនរងគ្រោះថា បើចង់បែកពីខ្ញុំមានអ្នកថ្មី ខ្ញុំនឹងកាប់សម្លាប់ចោល។
រហូតដល់ថ្ងៃទី ១៣-០២-២០២៥ ម៉ោង១៣និង០០នាទី ជនរងគ្រោះកំពុងធ្វើការនៅហាងចរណៃ (ចំនុចកើតហេតុ) ជនសង្ស័យបានទាក់ទងទូរស័ព្ទមកជនរងគ្រោះ ២ដង តែជនរងគ្រោះមិនលើកនិយាយ ធ្វើឱ្យជនសង្ស័យខឹង ក៏ជិះម៉ូតូម៉ាកហុងដាស្កូបពីពណ៌ខ្មៅ ផ្លាកលេខ ភ្នំពេញ 1HR-3210 មកឈប់មុខហាងចរណៃ រួចចាប់ទាញជនរងគ្រោះមកក្រៅ រួចយកកាំបិតប៉័ងតោកាប់ជនរងគ្រោះត្រូវចំក្បាល និង កាប់ជើងឆ្វេងដាច់ឆ្អឹង (របួសធ្ងន់) រួចជិះម៉ូតូគេចខ្លួន។ ចំណែកជនរងគ្រោះត្រូវបានក្រុមគ្រួសារនាំទៅព្យាបាលនៅមន្ទីរពេទ្យមិត្តភាព ខ្មែរ-សូវៀត។
លុះដល់ម៉ោង១៥និង៣០នាទី ថ្ងៃដដែល សមត្ថកិច្ចយើងឃាត់ខ្លួនជនសង្ស័យនៅភូមិចុងព្រែក សង្កាត់ព្រែកឯង រួមនិងវត្ថុតាងកាំបិតប៉័ងតោ១, ម៉ូតូ ១គ្រឿង (របស់ជនសង្ស័យ) បញ្ជូនមកអធិការដ្ឋាន នគរបាលខណ្ឌច្បារអំពៅសាកសួរ៕
