វ៉ាស៊ីនតោន៖ ប្រធានាធិបតីអាម៉េរិក លោក ដូណាល់ ត្រាំ បានអះអាងកាលពីថ្ងៃសុក្រទី៣១ ខែមករាថា លោកនឹងដាក់ពន្ធ២៥ ភាគរយលើទំនិញពីម៉ិកស៊ិក និងកាណាដា និង១០ ភាគរយលើការនាំចូលពីប្រទេសចិន ហើយប្រទេសទាំង៣ នេះមិនអាចគេចរួចឡើយ។
ពន្ធកាន់តែច្រើនលើទំនិញប្រេង និងឧស្ម័នធម្មជាតិនៅពាក់កណ្តាលខែកុម្ភៈ នឹងអាចធ្វើឱ្យតម្លៃប្រេងកាន់តែឡើងខ្ពស់។ ប្រទេសទាំងបីនឹងត្រូវបានដាក់គំនាបពន្ធចាប់ពីថ្ងៃទី១ ខែកុម្ភៈ ល្កឹកណាប្រទេសទាំងបីទប់ស្កាត់រំហូរជនចំណាកស្រុក និងសារធាតហ្វេតានីល(fentanyl) កុំឱ្យឆ្លងចូលព្រំដែនសហរដ្ឋអាម៉េរិក។
នៅពេលសួរថា តើមានឱកាសណាមួយនៅដំណាក់កាលនេះសម្រាប់ដៃគូពាណិជ្ជកម្មកំពូលទាំងបីរបស់សហរដ្ឋអាម៉េរិកដើម្បីការពន្យារពេលការដាក់ពន្ធគយទេ? លោក ត្រាំ បានឆ្លើយថា ៖«ទេ! ទេ! គ្មានផ្លូវទេ។ យើងមានឱនភាពពាណិជ្ជកម្មដ៏ធំ ជាមួយប្រទេសទាំងបី»។ លោកបន្ថែមថា ការដាក់ពន្ធបន្ថែមទៀតកំពុងដំណើរការ ហើយពន្ធនាំចូលកំពុងត្រូវបានពិចារណាលើទំនិញអឺរ៉ុបក៏ដូចជាដែកអាលុយមីញ៉ូម ទង់ដែង ថ្នាំ និងឧបករណ៍អេឡិចត្រូនិក។
ជុំវិញបញ្ហានេះ អ្នកនាំពាក្យសេតវិមានបានអះអាងថា ការដាក់ពន្ធនឹងចាប់ផ្តើមអនុវត្តពីថ្ងៃទី១ ខែកុម្ភៈ ជាមួយពន្ធ ២៥ ភាគរយលើម៉ិកស៊ិក និងកាណាដា និង១០ ភាគរយលើប្រទេសចិន។ ចំណាត់ការរបស់លោក ត្រាំ អាចប្រឈមនឹងការដាក់ពន្ធសងសឹក ដែលអាចរំខានដល់ចំនួនជាង២,១ ពាន់ពាន់លានដុល្លារក្នុងពាណិជ្ជកម្មទ្វេភាគីប្រចាំឆ្នាំរបស់សហរដ្ឋអាមេរិកជាមួយដៃគូពាណិជ្ជកម្មទាំងបី៕
