ប្រធានាធិបតីហ្វីលីពីន ប្រកាសក្តែងៗថា បើចិនចង់ឱ្យហ្វីលីពីនដកប្រព័ន្ធមីស៊ីល Typhon ត្រឡប់ទៅអាមេរិកវិញ ចិនត្រូវឈប់តាមយាយីហ្វីលីពីនជាមុន
ម៉ានីល៖ ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូនៀ បានប្រកាសក្តែងៗកាលពីថ្ងៃទី៣០មករាថា ប្រសិនបើចិនចង់ឱ្យហ្វីលីពីនដកប្រព័ន្ធមីស៊ីល Typhon ត្រឡប់ទៅសហរដ្ឋអាម៉េរិកវិញ នាគរាជអាស៊ីចិនត្រូវឈប់តាមយាយីហ្វីលីពីនជាមុន។
ថ្លែងទៅកាន់អ្នកសារព័ត៌មាន លោក ម៉ាកូស លើកឡើងថា លោកនឹងប្រគល់ប្រព័ន្ធមីស៊ីល Typhon ទៅសហរដ្ឋអាម៉េរិកវិញ ប្រសិនបើចិនបញ្ឈប់អាកប្បកិរិយាឈ្លានពាន និងការទាមទារទឹកដីនៅសមុទ្ទចិនខាងត្បូង។ លោកបន្តថា«ខ្ញុំមិនយល់ពីការអត្ថាធិប្បាយរបស់ចិនលើប្រព័ន្ធមីស៊ីល Typhon សោះឡើយ។ យើងមិនបានរិះគន់លើប្រព័ន្ធមីស៊ីលរបស់ពួកគេទេ ហើយប្រព័ន្ធមីស៊ីលរបស់ពួកគេមានថាមពលខ្លាំងជាងអ្វីដែលយើងមានដល់រាប់ពាន់ដង»។
ប្រមុខរដ្ឋហ្វីលីពីនរូបនេះបន្ថែមថា«នេះជាកិច្ចព្រមព្រៀងជាមួយចិន៖ ឈប់ទាមទារទឹកដីរបស់យើង ឈប់យាយីអ្នកនេសាទរបស់យើង ឈប់បើកបុកកប៉ាល់របស់យើង ឈប់ប្រើកាណុងបាញ់ទឹក និងបាញ់ឡាស៊ែរលើប្រជាជនយើង ហើយបញ្ឈប់អាកប្បកិរិយាឃោរឃៅ និងបង្ខិតបង្ខំរបស់អ្នក នោះខ្ញុំនឹងដកប្រព័ន្ធមីស៊ីល Typhon ចេញវិញ»។
រដ្ឋធានីប៉េកាំងដែលទាមទារអធិបតេយ្យភាពលើសមុទ្ទចិនខាងត្បូង ស្ទើរតែទាំងអស់ បានចោទប្រកាន់នាវាហ្វីលីពីនម្ដងហើយម្ដងទៀតថា បានរំលោភបំពានលើទឹកដីរបស់ខ្លួន។ ទំនាក់ទំនងទ្វេភាគីរវាងចិន និងហ្វីលីពីន ស្ថិតក្នុងស្ថានភាពអាក្រក់បំផុតក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីមានការប្រឈមមុខដាក់គ្នាម្ដងហើយម្ដងទៀត និងការតវ៉ាការទូតដ៏ក្ដៅគគុក។
គួររំឭកថា ប្រព័ន្ធមីស៊ីល Typhon ត្រូវបានដាក់ពង្រាយដោយកងកម្លាំងសហរដ្ឋអាម៉េរិកទៅកាន់ប្រទេសហ្វីលីពីន កាលពីខែមេសាឆ្នាំមុន ជាផ្នែកមួយនៃសមយុទ្ធយោធា Balikatan។ ទីភ្នាក់ងារសារព័ត៌មានរ៉យទ័រ បានរាយការណ៍កាលពីសប្តាហ៍មុនថា ប្រព័ន្ធមីស៊ីលនេះ ត្រូវផ្លាស់ទីទៅកាន់ទីតាំងថ្មីនៅក្នុងប្រទេសហ្វីលីពីន ដែលកៀកទៅនឹងកោះតៃវ់ាន់៕
