ឥណ្ឌា ប្រារព្ធទិវាសាធារណរដ្ឋលើកទី៧៦ ជាមួយក្បួនដង្ហែចម្រុះពណ៌ បង្ហាញពីកម្លាំងយោធា និងភាពចម្រុះនៃវប្បធម៌របស់ខ្លួន

ញូវដេលី៖ ឥណ្ឌាបានប្រារព្ធទិវាសាធារណរដ្ឋលើកទី៧៦របស់ខ្លួន កាលពីថ្ងៃអាទិត្យទី២៦មករា ជាមួយក្បួនដង្ហែចម្រុះពណ៌ បង្ហាញពីកម្លាំងយោធា និងភាពចម្រុះនៃវប្បធម៌របស់ខ្លួន នៅលើមហាវិថីមួយនៅចំកណ្តាលរដ្ឋធានី ខណៈប្រធានាធិបតីឥណ្ឌូណេស៊ី គឺជាភ្ញៀវកិត្តិយសដ៏ខ្ពង់ខ្ពស់បំផុត។

មនុស្សរាប់ម៉ឺននាក់បានតម្រង់ជួរតាមដងផ្លូវដ៏ត្រជាក់ កាលពីព្រឹកថ្ងៃអាទិត្យទី២៦មករា ដើម្បីទស្សនាក្បួនដង្ហែដ៏វែងអន្លាយ លើការប្រារព្ធខួបនៃការអនុម័តជាផ្លូវការនៃរដ្ឋធម្មនុញ្ញរបស់ប្រទេសឥណ្ឌានាថ្ងៃទី២៦មករា ឆ្នាំ១៩៥០ ពោលគឺជិតបីឆ្នាំបន្ទាប់ពីទទួលបានឯករាជ្យពីអាណានិគមអង់គ្លេស។ យោធា និងទាហានប៉ារ៉ារបស់ប្រទេសឥណ្ឌា រួមជាមួយក្រុមរបស់ពួកគេ បានដើរដង្ហែក្បួន ខណៈមេដឹកនាំមកពីបណ្តាប្រទេសផ្សេងៗ និងភ្ញៀវកិត្តិយសផ្សេងទៀត បានគយគន់ក្បួនដង្ហែដ៏ឱឡារិកនេះ។

ក្បួនដង្ហែធ្វើឡើងនៅលើមហាវិថី Rajpath Avenue ដែលសាងសង់ដោយអតីតមេដឹកនាំអង់គ្លេស ខណៈមនុស្សសម្រុកតម្រង់ជួរលើវាលស្មៅដ៏ធំក្រោមដើមឈើ។ មហាវិថីនេះ ត្រូវបានអភិវឌ្ឍឡើងវិញនៅពេលប្រារព្ធខួបលើកទី៧៥ នៃឯករាជ្យភាពរបស់ឥណ្ឌា និងប្តូរឈ្មោះទៅជា មហាវិថី Kartavayapath ឬ Boulevard of Duty ក្នុងឆ្នាំ២០២២។

ទស្សនកិច្ច របស់ ប្រធានាធិបតី ឥណ្ឌូណេស៊ី លោក ប្រាបូវ៉ូ ស៊ូបៀនតូ បាន ចូលរួម ក្នុង ព្រឹត្តិការណ៍ នេះ ក្នុង នាម ជា «ភ្ញៀវ កិត្តិយសដ៏ខ្ពង់ខ្ពស់បំផុត» ហើយ ត្រូវបាន អមដោយ ប្រធានាធិបតី និង នាយករដ្ឋមន្ត្រី ឥណ្ឌា។ ក្រុមតន្ត្រី និងក្រុមអ្នកហែរក្បួនមកពីកងកម្លាំងប្រដាប់អាវុធជាតិឥណ្ឌូណេស៊ី ចំនួន៣៤២នាក់ បានចូលរួមក្នុងក្បួនដង្ហែខ្នាតយក្សមួយនេះ។ នេះជាលើកទីមួយហើយដែលកងទ័ពរបស់ប្រទេសអាស៊ាន ចូលរួមក្នុងក្បួនដង្ហែបរទេស។

មែនទែនទៅ ឥណ្ឌា តែង អញ្ជើញ មេដឹកនាំ បរទេស ទៅធ្វើជា សាក្សី ក្នុង ទស្សនីយភាពដ៏អស្ចារ្យ នេះ។ ជាក់ស្តែង ប្រធានាធិបតីបារាំង លោក អេម៉ានូអែល ម៉ាក្រុង គឺជាភ្ញៀវកិត្តិយសខ្ពស់បំផុតកាលពីឆ្នាំមុន ហើយក្នុងឆ្នាំ២០១៥ អតីតប្រធានាធិបតីសហរដ្ឋអាម៉េរិក លោក បារាក់ អូបាម៉ា ជាអធិបតីភាព។ ជាងនេះទៅទៀត មេដឹកនាំអាស៊ីអាគ្នេយ៍ចំនួនដប់នាក់ បានទៅទស្សនាក្បួនដង្ហែក្នុងឆ្នាំ២០១៨។

សូមរំឭកថា លោក ស៊ូកាណូ ជាប្រធានាធិបតីទីមួយរបស់ប្រទេសឥណ្ឌូណេស៊ី និងជាមេដឹកនាំនៃការតស៊ូទាមទារឯករាជ្យរបស់ប្រទេស គឺជាភ្ញៀវដ៏សំខាន់នៅក្នុងពិធីអបអរសាទរទិវាសាធារណរដ្ឋ លើកដំបូងរបស់ប្រទេសឥណ្ឌាក្នុងឆ្នាំ១៩៥០។ មនុស្សប្រុសស្រីរាប់ពាន់នាក់ស្លៀកសម្លៀកបំពាក់ចម្រុះពណ៌ បានដើរដង្ហែក្បួន សំដែងរបាំប្រពៃណី ជាមួយនឹងការ បង្ហាញ ផងដែរ នូវ ឧបករណ៍ និង ប្រព័ន្ធ ការពារជាតិ ដែល ផលិត ក្នុងស្រុក របស់ ឥណ្ឌា រួមទាំង រថក្រោះ រថពាសដែក ប្រយុទ្ធ ថ្មើរជើង ប្រព័ន្ធ រ៉ាដា និង ប្រព័ន្ធ មីស៊ីល។ គួរបញ្ជាក់ថា សិល្បករប្រមាណ៥០០០នាក់ កាន់ឧបករណ៍បុរាណដូចជា៖ លំពែង ដាវ និងស្គរ បានសំដែងទម្រង់របាំជាង៤០ប្រភេទផ្សេងៗគ្នា៕