ប្រជាជនថៃ ភាគច្រើនប្រឆាំងនឹងផែនការរបស់រាជរដ្ឋាភិបាល ក្នុងការធ្វើឱ្យកាស៊ីណូ និងល្បែងអនឡាញបង្កើតឡើង ក្នុងប្រទេសស្របច្បាប់
បាងកក៖ ការស្ទង់មតិមួយ រកឃើញកាលពីថ្ងៃអាទិត្យទី២៦មករាថា ប្រជាជនថៃភាគច្រើនប្រឆាំងនឹងផែនការរបស់រាជរដ្ឋាភិបាល ក្នុងការធ្វើឱ្យកាស៊ីណូ និងល្បែងអនឡាញបង្កើតឡើងនៅក្នុងប្រទេសស្របច្បាប់។
រាជរដ្ឋាភិបាលថៃ ក្នុងខែនេះបានអនុម័តសេចក្តីព្រាងច្បាប់មួយ ដើម្បីអនុញ្ញាតឱ្យការបើកកាស៊ីណូក្នុងកន្លែងកម្សាន្ត និងលេងល្បែងតាមអ៊ីនធឺណិត។ ល្បែងស៊ីសងស្របច្បាប់តែមួយគត់នៅក្នុងប្រទេសថៃ គឺនៅការប្រណាំងសេះ និងឆ្នោតដែលគ្រប់គ្រងដោយរដ្ឋ ប៉ុន្តែការចាក់បាល់ទាត់ និងការលេងល្បែងច្រើនប្រភេទទៀត គឺមានការពេញនិយមខ្លាំង។ នៅក្នុងការស្ទង់មតិរបស់វិទ្យាស្ថានជាតិគ្រប់គ្រងការអភិវឌ្ឍ អ្នកឆ្លើយសំណួរចំនួន៦៩ភាគរយ បានជំទាស់នឹងការលេងល្បែងអនឡាញ ហើយ៥៩ភាគរយមិនយល់ស្របនឹងទាំងកន្លែងកម្សាន្ត ដែលមានបើកកាស៊ីណូ ខណៈ២៩ភាគរយពេញចិត្តទាំងពីរ។
ការស្ទង់មតិនេះ ត្រូវបានធ្វើឡើងក្នុងចំណោមមនុស្សចំនួន១៣១០នាក់។ ប្រទេសជិតខាងថៃដូចជា៖ កម្ពុជា សិង្ហបុរី ហ្វីលីពីន ឡាវ និងមីយ៉ាន់ម៉ា បានទទួលផលប្រយោជន៍ពីកាស៊ីណូធំៗ ហើយរាជរដ្ឋាភិបាលថៃអះអាងថា អវត្តមានកាស៊ីណូស្របច្បាប់មានន័យថា ខ្លួនកំពុងខាតបង់ប្រាក់ចំណូល និងមិនឈានដល់សក្តានុពលទេសចរណ៍របស់ខ្លួន។ អ្នកតស៊ូមតិដ៏សំខាន់នៃល្បែងស៊ីសងស្របច្បាប់ គឺឪពុករបស់នាយករដ្ឋមន្ត្រី ផែថងថាន ស៊ីណាវ៉ាត្រា ដែលជាមហាសេដ្ឋី និងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា។ លោកអះអាងក្នុងខែនេះថា ការធ្វើឱ្យស្របច្បាប់អាចរកប្រាក់ចំណូលដល់រាជរដ្ឋាភិបាល បានរហូតដល់ទៅ១០០ពាន់លានបាត ឬស្មើនឹង៣ពាន់លានដុល្លារក្នុងមួយឆ្នាំ៕
