អភិបាលខេត្តបន្ទាយមានជ័យ អញ្ជើញបើកសន្និបាតបូកសរុបលទ្ធផលការងារ របស់មន្ទីរកសិកម្ម រុក្ខាប្រមាញ់ និងនេសាទខេត្ត

ភ្នំពេញ៖ នៅថ្ងៃទី១៤ ខែមករា ឆ្នាំ ២០២៥ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញអធិបតីបើកសន្និបាតបូកសរុបលទ្ធផលការងារកសិកម្ម រុក្ខាប្រមាញ់ និងនេសាទ ឆ្នាំ២០២៤ និងលើកទិសដៅការងារឆ្នាំ២០២៥ ប្រារព្ធនៅសាលមន្ទីកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។

នាឱកាសនោះ ឯកឧត្តម អ៊ុំ រាត្រី បានថ្លែងនូវការកោតសរសើរ ចំពោះការខិតខំរួមគ្នារវាងថ្នាក់ដឹកនាំមន្ទីរ និងមន្រ្តីគ្រប់ជាន់ថ្នាក់ក្រោមឱវាទមន្ទីរ ដែលបានរៀបចំកិច្ចប្រជុំបូកសរុបលទ្ធផលការងារដែលសម្រេចបានក្នុងឆ្នាំ២០២៤កន្លងទៅនេះ ដើម្បីធ្វការឆ្លុះបញ្ចាំងពីបញ្ហាប្រឈម ស្វែងរកដំណោះស្រាយ បទពិសោធន៍ និងសំណូមពរ ដែលជាមូលដ្ឋានដ៏សំខាន់សម្រាប់លើកទិសដៅអនុវត្តក្នុងឆ្នាំបន្ត ឱ្យមានប្រសិទ្ធភាព។

ឯកឧត្ដមអភិបាលខេត្ត បានមានប្រសាសន៍ថា ដើម្បីឱ្យការអភិវឌ្ឍការងារកសិកម្ម រុក្ខាប្រមាញ់ និងនេសាទ ប្រព្រឹត្តទៅ បានរលូនប្រកបដោយជោគជ័យ ការចូលរួមរបស់វិស័យ ឯកជន ក៏ដូចជាដៃគូអភិវឌ្ឍន៍ គឺជាកត្តាចាំបាច់មិនអាចខ្វះបាន ដោយសារវិស័យសាធារណៈ (រដ្ឋ) មិនអាចគ្របដណ្តប់លើសេវាផ្សព្វផ្សាយបណ្តុះបណ្តាល និងការផ្តួចផ្តើមគំនិតថ្មីៗបានទាំងស្រុងនោះទេ។

ក្នុងន័យនេះ ឯកឧត្ដមអភិបាលខេត្ត បានលើកទឹកចិត្តដល់មន្ទីរកសិកម្ម រុក្ខាប្រមាញ់ និងនេសាទខេត្ត ក៏ដូចជាខណ្ឌរដ្ឋបាលទាំងពីរ និងការិយាល័យចំណុះមន្ទីរទាំងអស់ត្រូវរក្សាទំនាក់ទំនង និងបន្តកិច្ចសហការជិតស្និទ្ធបន្ថែមទៀត ជាមួយអង្គភាពស្រាវជ្រាវកសិកម្ម ក្រុមហ៊ុន កម្មវិធីគម្រោងផ្សេងៗ និងដៃគូអភិវឌ្ឍន៍នានា៕