ប្រាស៊ីលីយ៉ា៖ ប្រធានាធិបតីប្រេស៊ីល លោក លូអ៊ីស អ៊ីណាស៊ីយ៉ូ លូឡា ដា ស៊ីលវ៉ា បានចុះហត្ថលេខាលើច្បាប់រឹតបន្តឹងការប្រើប្រាស់ស្មាតហ្វូននៅសាលារៀន បន្ទាប់ពីនិន្នាការជាសកល ឆ្ពោះទៅរកការហាមប្រាមស្មាតហ្វូន។
ការផ្លាស់ប្ដូរនេះ នឹងប៉ះពាល់ដល់សិស្សនៅសាលាបឋមសិក្សា និងវិទ្យាល័យនៅទូទាំងប្រទេសអាម៉េរិកខាងត្បូង ដោយចាប់ផ្តើមពីខែកុម្ភៈ ឆ្នាំ២០២៥។ វាផ្តល់នូវក្របខ័ណ្ឌច្បាប់ ដើម្បីធានាថាសិស្សប្រើប្រាស់ស្មាតហ្វូនតែក្នុងករណីមានអាសន្ន និងគ្រោះថ្នាក់ សម្រាប់គោលបំណងអប់រំ ឬប្រសិនបើពួកគេមានពិការភាព និងត្រូវប្រើជាចាំបាច់។ រដ្ឋមន្ត្រីក្រសួងអប់រំ លោក ខេមីឡូ សាន់តាណា (Camilo Santana) បានប្រាប់អ្នកសារព័ត៌មានថា បច្ចុប្បន្ន..ក្មេងៗប្រើអ៊ីនធឺណិតតាំងពីតូច ដែលធ្វើឱ្យឪពុកម្តាយពិបាកតាមដានសកម្មភាពអនឡាញរបស់ពួកគេ ហើយការដាក់កម្រិតលើស្មាតហ្វូននៅសាលារៀននឹងជួយដោះស្រាយបញ្ហានេះ។ លោកបន្តថា៖«ដូចនៅក្នុងប្រទេសជាច្រើនផ្សេងទៀត យើងចង់ឱ្យឧបករណ៍ទាំងនោះត្រូវបានប្រើប្រាស់តែក្នុងថ្នាក់រៀន សម្រាប់គោលបំណងរៀនសូត និងដោយមានការណែនាំពីគ្រូ»។
ច្បាប់ថ្មីនេះ មានការគាំទ្រដ៏កម្រនៅទូទាំងវិសាលគមនយោបាយ ទាំងពីសម្ព័ន្ធមិត្តឆ្វេងនិយម និងគូរប្រជែងស្តាំនិយម គឺអតីតប្រធានាធិបតី យ៉ែរ បូលសូណារ៉ូ (Jair Bolsonaro)។ ឪពុកម្តាយ និងសិស្សជាច្រើននាក់ ក៏បានយល់ព្រមលើការចំណាត់ការនេះផងដែរ។ ការស្ទង់មតិដែលបានចេញផ្សាយនៅក្នុងខែតុលាឆ្នាំមុន បានបង្ហាញថា ស្ទើរតែ២ភាគ៣ នៃអ្នកឆ្លើយតបគាំទ្រការហាមឃាត់ការប្រើប្រាស់ស្មាតហ្វូនដោយកុមារ និងក្មេងជំទង់នៅសាលារៀន។ ជាងបីភាគបួនបាននិយាយថា ឧបករណ៍ទាំងនោះមានគ្រោះថ្នាក់ច្រើនជាងផលល្អដល់កូនៗរបស់ពួកគេ។ គិតត្រឹមឆ្នាំ២០២៣ សាលារៀនប្រេស៊ីលប្រហែល២ភាគ៣ បានដាក់កំហិតមួយចំនួនលើការប្រើប្រាស់ទូរសព្ទដៃ ខណៈដែល២៨ភាគរយ បានដាក់ការហាមប្រាមទាំងស្រុង។ នេះបើយោងតាមការស្ទង់មតិដែលបានចេញផ្សាយនៅក្នុងខែសីហាឆ្នាំ២០២៤ ដោយគណៈកម្មាធិការដឹកនាំអ៊ីនធឺណិតប្រេស៊ីល។
រដ្ឋប្រេស៊ីល ដូចជា Rio de Janeiro, Maranhao និង Goias បានអនុម័តច្បាប់ក្នុងរដ្ឋរបស់ពួកគេរួចរាល់ហើយ ដើម្បីហាមឃាត់ការប្រើប្រាស់ស្មាតហ្វូននៅសាលារៀន ប៉ុន្តែអាជ្ញាធរប្រឈមនឹងបញ្ហាក្នុងការអនុវត្តច្បាប់ទាំងនេះ។ អាជ្ញាធរនៅក្នុងរដ្ឋ Sao Paulo ជារដ្ឋមានប្រជាជនច្រើនជាងគេក្នុងប្រទេសប្រេស៊ីល កំពុងពិភាក្សាថា តើស្មាតហ្វូនគួរតែត្រូវបានហាមឃាត់ទាំងនៅក្នុងសាលារដ្ឋ និងឯកជនឬយ៉ាងណា? អស់រយៈពេលជាច្រើនឆ្នាំ អង្គការ រដ្ឋាភិបាល ឪពុកម្តាយ បានភ្ជាប់ការប្រើប្រាស់ស្មាតហ្វូនរបស់កុមារទៅនឹងការគំរាមកំហែង ការប៉ុនប៉ងធ្វើអត្តឃាត ការថប់បារម្ភ និងកង្វះការផ្តោតអារម្មណ៍ដែលចាំបាច់សម្រាប់ការសិក្សា ខណៈប្រទេសបារាំងបានហាមឃាត់ទូរសព្ទដៃនៅក្នុងសាលារៀនសម្រាប់សិស្សដែលមានអាយុពី៦ទៅ១៥ឆ្នាំ។ ប្រទេសមានសេដ្ឋកិច្ចធំបំផុតទី២របស់ពិភពលោកចិន បានចាត់វិធានការកាលពីឆ្នាំមុនដើម្បីរឹតបន្តឹងការប្រើប្រាស់ស្មាតហ្វូនរបស់កុមារ។
ការហាមប្រាមលើទូរសព្ទចល័តទទួលបានភាពទាក់ទាញនៅទូទាំងសហរដ្ឋអាម៉េរិក ដែលរដ្ឋចំនួន៨បានអនុម័តច្បាប់ ឬគោលនយោបាយហាមប្រាម ឬរឹតបន្តឹងការប្រើប្រាស់ទូរសព្ទដៃ ដើម្បីព្យាយាមទប់ស្កាត់ការចូលប្រើទូរសព្ទរបស់សិស្ស និងកាត់បន្ថយការរំខាននៅក្នុងថ្នាក់រៀន។ ការប្រើប្រាស់ស្មាតហ្វូនក្នុងចំណោមកុមារតូចៗអាចធ្វើឱ្យប៉ះពាល់ដល់សុវត្ថិភាព និងសុខភាពផ្លូវចិត្តរបស់ពួកគេ នៅទូទាំងទ្វីបអឺរ៉ុបបានកើនឡើងគួរឱ្យកត់សម្គាល់។ របាយការណ៍ដែលបានចេញផ្សាយនៅក្នុងខែកញ្ញាឆ្នាំ២០២៤ ដោយអង្គការយូណេស្កូ ដែលជាអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ បានបង្ហាញថា ប្រទេសមួយក្នុងចំណោមប្រទេសចំនួន៤ បានរឹតបន្តឹងការប្រើប្រាស់ស្មាតហ្វូននៅសាលារៀនរួចហើយ។ កាលពីឆ្នាំមុន នៅក្នុងសវនាការរបស់ព្រឹទ្ធសភាអាម៉េរិក លោក ម៉ាក ហ្ស៊ាក់ឃឺប៊ឺក (Mark Zuckerberg) នាយកប្រតិបត្តិក្រុមហ៊ុនមេតា បានសុំទោសដល់ឪពុកម្តាយរបស់កុមារ ដែលត្រូវបានរំលោកបំពាន គំរាមកំហែង ឬជំរុញឱ្យធ្វើបាបខ្លួនឯងតាមរយៈប្រព័ន្ធផ្សព្វផ្សាយសង្គម។ លោក ក៏បានកត់សម្គាល់ផងដែរនូវគោលការណ៍របស់មេតាក្នុងកិច្ចខិតខំប្រឹងប្រែងដើម្បីការពារកុមារ៕
