គ្រោះរញ្ជួយដីកម្រិត ៦,៨ រ៉ិចទ័រ វាយប្រហារតំបន់ទីបេ បង្ហាញពីហានិភ័យនៃការសាងសង់ ទំនប់វារីអគ្គិសនីដោយក្រុមហ៊ុនយក្សអាស៊ី ចិន និងឥណ្ឌា
ទីបេ៖ អ្នកជំនាញបានលើកឡើងថា គ្រោះរញ្ជួយដីកម្រិត៦,៨ រ៉ិចទ័រដែលបានវាយប្រហារតំបន់ទីបេ សម្លាប់មនុស្ស១២៦នាក់ និងបំផ្លាញអាងស្តុកទឹកចំនួន៤ នៅសប្តាហ៍នេះ បង្ហាញពីហានិភ័យនៃការសាងសង់ទំនប់វារីអគ្គិសនីដោយក្រុមហ៊ុនយក្សអាស៊ី ចិន និងឥណ្ឌា នៅក្នុងតំបន់ដាច់ស្រយាលបំផុតមួយរបស់ពិភពលោក ដែលងាយនឹងរងការវាយប្រហារពីគ្រោះរញ្ជួយដី។
អ្នកស្រាវជ្រាវបានឱ្យដឹងថា ទំនប់ធំៗចំនួន៦៨ នៅក្នុងតំបន់ហិម៉ាឡៃយ៉ា មានសក្តានុពលថាមពលវារីអគ្គិសនីដ៏ធំសម្បើមនៃបឹង និងទន្លេដែលមានកម្ពស់ខ្ពស់ ប៉ុន្តែត្រូវប្រឈមនឹងហានិភ័យរញ្ជួយដី។ ទំនប់វារីអគ្គិសនីចំនួន១០១ ផ្សេងទៀតស្ថិតក្នុងដំណាក់កាលនៃការគ្រោងទុក ឬការសាងសង់។ សូម្បីតែមុនពេលការរញ្ជួយដីបានកើតឡើងទៅលើស្រុក Tingri ដែលជាច្រកភាគខាងជើងទៅកាន់តំបន់ភ្នំអេវឺរេស។
អ្នកជំនាញបានសម្ដែងការព្រួយបារម្ភអំពីមហិច្ឆតាថាមពលវារីអគ្គិសនីរបស់ប្រទេសចិន និងឥណ្ឌានៅទីនោះ ខណៈចិនកំពុងរៀបចំផែនការសម្រាប់ទំនប់វារីអគ្គិសនីដ៏ធំបំផុតរបស់ពិភពលោក។ គម្រោងនេះមានទំហំធំជាងបីដងនៃទំនប់ Three Gorges ដែលជាទំនប់ធំបំផុតរបស់ពិភពលោក ត្រូវបានកំណត់ថានឹងផ្តល់ថាមពលស្អាតចំនួន៣៤ ជីហ្គាវ៉ាត់ ដល់គោលដៅរបស់ប្រទេសចិនក្នុងការបំភាយកាបូនខ្ពស់បំផុតមុនឆ្នាំ២០៣០។
លោក ហ្វាន ស៊ាវ (Fan Xiao) អតីតប្រធានវិស្វករនៅក្នុងការិយាល័យភូគព្ភសាស្ត្រ និងរ៉ែនៃខេត្ត Sichuan ភាគនិរតីនៃប្រទេសចិន បានសរសេរនៅក្នុងអត្ថបទមួយកាលពីខែតុលា ឆ្នាំ២០២២ ស្តីពីគម្រោង Motuo របស់ខេត្តដែលត្រូវបានអនុម័តនៅចុងខែធ្នូថា៖ «ការរញ្ជួយដីខ្លាំងអាចបណ្តាលឱ្យខូចខាតដោយផ្ទាល់»។
គម្រោងវារីអគ្គិសនីនៅតំបន់ភ្នំដាច់ស្រយាលបង្ហាញពីភាពតានតឹងរវាងហានិភ័យនៃការសាងសង់នៅទីនោះ និងតម្រូវការថាមពលស្អាតដ៏ច្រើននៅក្នុងប្រទេសចិន និងឥណ្ឌា ដែលជាប្រទេសបញ្ចេញឧស្ម័នផ្ទះកញ្ចក់លេខ១ និងលេខ៣ របស់ពិភពលោក។ គ្រោះរញ្ជួយដីបានបំផ្លាញទំនប់នាពេលកន្លងមក ជាពិសេសដោយការបាក់ដី និងការធ្លាក់ថ្ម។
ការស្រាវជ្រាវដែលបានបោះពុម្ពផ្សាយក្នុងឆ្នាំ២០១៨ បានបង្ហាញថា ការរញ្ជួយដីដ៏ធំនៅប្រទេសនេប៉ាល់ក្នុងឆ្នាំ២០១៥ បានបិទស្ទើរតែមួយភាគប្រាំនៃវារីអគ្គិសនីអស់រយៈពេលជាងមួយឆ្នាំ។ លោក ស៊ីភី រ៉ាជិនដ្រាន (C P Rajendran) អ្នកភូគព្ភវិទូនៅវិទ្យាស្ថានជាតិសិក្សាកម្រិតខ្ពស់របស់ប្រទេសឥណ្ឌា បាននិយាយថា ការកសាងទំនប់បន្ថែមទៀតនៅហិម៉ាឡៃយ៉ា គឺមិនមាននិរន្តរភាពនោះទេ ដោយលើកឡើងពីការព្រួយបារម្ភអំពីបរិស្ថានវិទ្យា និងហានិភ័យនៃការរញ្ជួយដីពីទម្ងន់នៃអាងស្តុកទឹកដ៏ធំ៕
