ស្នងការភ្នំពេញ បំភ្លឺជុំវិញការបង្ហោះវីដេអូរបស់អ្នកលេងបណ្ដាញសង្គមហ្វេសប៊ុក ដែលបង្ហោះស៊ែបន្តគ្នាមានខ្លឹមសារ “ស៊យផឹកពីកំប៉ុងអស់250000៛តើក្នុងមាត្រាទីប៉ុន្មានពិន័យ250000៛ខ្ញុំសួរអត់ឆ្លើយទេមានបងប្អូនណាដឹងជួយប្រាប់ផង”

ភ្នំពេញ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ចេញសេចក្តីបំភ្លឺជុំវិញការបង្ហោះវីដេអូរបស់អាខោនហ្វេសប៊ុកឈ្មោះ វណ្ណៈ កំពត និងអ្នកលេងតាមបណ្ដាញសង្គមហ្វេសប៊ុក យកទៅបង្ហោះស៊ែបន្តគ្នា ដែលមានខ្លឹមសារ “ស៊យចុយម្រាយផឹកពីកំប៉ុងអស់250000៛តើក្នុងមាត្រាទីប៉ុន្មានពិន័យ250000៛ខ្ញុំសួរអត់ឆ្លើយទេមានបងប្អូនណាដឹងជួយប្រាប់ផង តើមាត្រាទីប៉ុន្មានក្នុងច្បាប់ចរាចរណ៍ដែរ ផាកពិន័យជាតិអាកុល0,25ccជួយប្រាប់” នៅខណ្ឌព្រែកព្នៅ។

ជុំវិញករណីខាងលើនេះ បើយោងតាមរបាយការណ៍អធិការដ្ឋាននគរបាលខណ្ឌព្រែកព្នៅ កាលពីយប់ថ្ងៃទី០៤ ខែមករា ឆ្នាំ២០២៥ វេលាម៉ោង២៣:០០នាទី កម្លាំងអធិការដ្ឋាននគរបាលខណ្ឌព្រែកព្នៅ សហការជាមួយកម្លាំងចម្រុះ បានចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិស្រវឹង នៅចំណុចគោលដៅផ្លូវ២០១១ (កែងវត្តជុំ) ភូមិធ្លក សង្កាត់គោករកា ខណ្ឌព្រែកព្នៅ។

លុះវេលាម៉ោង២៣:៣៦នាទី មានម៉ូតូ០១គ្រឿង ម៉ាក ហុងដា សេ១២៥ ពណ៌ខ្មៅ ពាក់ផ្លាកលេខ កំពត 1T.9544 បើកបរដោយបុរសម្នាក់ឈ្មោះ គូ វិរះ ភេទប្រុស ឆ្លងកាត់គោលដៅត្រួតពិនិត្យ ទើបសមត្ថកិច្ចឱ្យអ្នកបើកបរម៉ូតូសហការដើម្បីធ្វើតេស្តបឋមរាប់លេខ ប្រើម៉ាសុីនធ្វើតេស្តជាតិអាល់កុល ជាលទ្ធផលមានជាតិស្រវឹង ក្រោយពីមានជាតិស្រវឹង សមត្ថកិច្ចបានឱ្យគាត់ផ្តុំវាស់រកកម្រិតជាតិអាល់កុល ជាលទ្ធផលឃើញមានកម្រិតជាតិអាល់កុល ០.២៥ mg/L ហើយសមត្តកិច្ចបានផាកពិន័យតាមច្បាប់កំណត់ចំនួន២៥០,០០០រៀល (ម្ភៃប្រាំម៉ឺនរៀល) ដោយពេលនោះ អ្នកបើកបរម៉ូតូមិនមានការតវ៉ា និងសមត្ថកិច្ចបានពន្យល់ណែនាំអំពីច្បាប់ចរាចរណ៍ផ្លូវគោក។

ដោយឃើញគាត់មានកម្រិតជាតិអាល់កុល និងគាត់បានធ្វើការផាកពិន័យរួចរាល់ សមត្ថកិច្ចមិនទាន់អនុញ្ញាតឱ្យគាត់ធ្វើដំណើរទៅមុខទៀតទេ ឱ្យគាត់សម្រាកជិតមួយម៉ោងដើម្បីកាត់បន្ថយជាតិស្រវឹងក្នុងខ្លួន លុះបន្ទាប់មកឃើញមានភាពស្វាងស្រវឹង ទើបអនុញ្ញាតឱ្យគាត់បន្តដំណើរទៅមុខ។

សូមបញ្ជាក់ថា បើយោងតាមអនុក្រិត្យលេខ៣៩ អនក្រ.បក ស្តីពីការផាកពិន័យអន្តរការណ៍ចំពោះអំពើល្មើស និងច្បាប់ចរាចរណ៍ផ្លូវគោក ការផាកពិន័យយោងទៅតាម មាត្រា ៦(ថ្មី) មាត្រា ៧(ថ្មី) មាត្រា ១០ (ថ្មី) និងមាត្រា ៧៧ (ថ្មី) នៃច្បាប់ស្តីពី ចរាចរណ៍ផ្លូវគោក បានចែងថា អ្នកបើកបររថយន្ត ម៉ូតូ ម៉ូតូកង់បី និងរ៉ឺម៉ក ដែលស្ថិតក្នុងស្ថានភាពស្រវឹង នឹងត្រូវទទួលទោសតាមច្បាប់ស្តីពី ចរាចរណ៍ផ្លូវគោក ដូចខាងក្រោម៖
ចំពោះអ្នកមានជាតិស្រវឹងក្នុងខ្លួន កម្រិតជាតិអាល់កុលចាប់ពី ០.២៥-០.៣៩
–សម្រាប់អ្នកបើកបរម៉ូតូ ត្រូវផាកពិន័យចំនួន ២៥ម៉ឺនរៀល។
–សម្រាប់អ្នកបើកបររថយន្តធុនស្រាល ត្រូវផាកពិន័យចំនួន ៤០ម៉ឺនរៀល។
–សម្រាប់អ្នកបើកបររថយន្តធុនធ្ងន់ ត្រូវផាកពិន័យចំនួន ៨០ម៉ឺនរៀល។

#ដោយឡែកចំពោះអ្នកមានជាតិស្រវឹងក្នុងខ្លួន កម្រិតជាតិអាលកុលចាប់ពី ០.៤០ឡើងទៅ
–សម្រាប់អ្នកបើកបរម៉ូតូ ត្រូវផាកពិន័យចំនួន ១លានរៀល។
–សម្រាប់អ្នកបើកបររថយន្តធុនស្រាល ត្រូវផាកពិន័យចំនួន ២លានរៀល។
-សម្រាប់អ្នកបើកបររថយន្តធុនធ្ងន់ ត្រូវផាកពិន័យចំនួន ៤លានរៀល៕