លោក ប៉ុក បូរក្ស ប្រធាននាយកដ្ឋានសិល្បភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ បានមានប្រសាសន៍ ប្រាប់ឲ្យដឹងថា ដំណើរភាពយន្តចល័តកម្ពុជា-ចិន លើកទី៨ គឺជាជោគជ័យមួយទៀត លើការផ្លាស់ប្តូរវប្បធម៌ ឆ្លើយតបនឹងឆ្នាំ២០២៤ ជាឆ្នាំនៃការផ្លាស់ប្តូរប្រជាជន និងប្រជាជន។
ជាការបញ្ជាក់ ក្រោយពេលដែលដំណើរភាពយន្តចល័តកម្ពុជា-ចិន លើកទី៨ ទើបតែបានបញ្ចប់ការចាក់បញ្ចាំង នៅទីតាំងចុងក្រោយ នាពេលថ្មីៗនេះ។
«សកម្មភាពនៃការរៀបចំ លើកទី៨ ក្រោមកិច្ចសហការក្រសួងវប្បធម៌ មាននាយកដ្ឋានភាពយន្ត និងវិទ្យុមិត្តភាពកម្ពុជាចិន យើងបានចាប់ផ្តើមតាំងពីខែវិច្ឆិកា រហូតដល់ថ្ងៃទី១២ ធ្នូ ២០២៤ ដោយបានចាក់បញ្ចាំង នៅលើទីតាំងសរុប ២៥ទីតាំង ចាប់ពីខេត្តបាត់ដំបង ពោធិសាត់ កំពង់ឆ្នាំង រាជធានីភ្នំពេញ និងខេត្តកណ្តាល»
លោក ប៉ុក បូរក្ស បានបញ្ជាក់ថា ប្រជាជនខ្មែរចាប់អារម្មណ៍ ចំពោះភាពយន្តចិន ដោយបានទស្សនាយ៉ាងជក់ចិត្ត ហើយទីតាំងចុងក្រោយ គឺនៅស្រុកស្អាង ទទួលបានអ្នកទស្សនាយ៉ាងច្រើន បើទោះបីជាអាកាសធាតុ មិនអំណោយផល ក៏ដោយ។
«ឃើញថា សកម្មភាពនៃការចាក់បញ្ចាំងរបស់យើង តាមខេត្ត ក្រុង នៅជនបទ មានការចូលរួមពីប្រជាពលរដ្ឋ មកទស្សនាច្រើន ចាប់អារម្មណ៍ចំពោះ ភាពយន្តចិន ដោយបានមើលតាំងពីដើមដល់ចប់ ជាពិសេស ទីតាំងចុងក្រោយ នៅវិទ្យាល័យស្អាង ខេត្តកណ្តាល មានការចូលរួមច្រើន បើទោះមានភ្លៀង ពួកគាត់ពេញចិត្តនឹងភាពយន្តចាក់បញ្ចាំងទាំងនេះ…ហើយតាមរយៈបទពិសោធន៍ទាំងនេះ ប្រជាជនខ្មែរ ជាពិសេស យុវជន សំណូមពរចាក់បញ្ចាំង បន្តទៀត ស្នើឲ្យយករឿងបែបកប្លែង បែប Action បន្ថែមទៀត ព្រោះ ជាទូទៅ ទស្សនិកជនយើងពេញចិត្ត ច្រើន ដូច្នេះ សំណូមពរឲ្យមានភាពយន្តថ្មីៗ បន្ថែមទៀត»។
លោកថា នេះគឺជាជោគជ័យថ្មីមួយទៀត នៅក្នុងកិច្ចសហប្រតិបត្តិការ លើការផ្លាស់ប្តូរវប្បធម៌ និងឆ្លើយតបនឹងឆ្នាំផ្លាស់ប្តូរប្រជាជន និងប្រជាជន។
«អ្វីដែលជោគជ័យ គឺការយល់ដឹង និងការសប្បាយរីករាយ របស់ប្រជាជនយើង តាមរយៈសកម្មភាពដែលយើងបានធ្វើ ឆ្លុះបញ្ចាំងពីរួមសុខ រួមទុក្ខជាមួយគ្នា និងការចែករំលែក ជាមួយគ្នា រវាងប្រជាជនទាំងពីរ»
សូមបញ្ជាក់ថា ព្រឹត្តិការណ៍ «ដំណើរភាពយន្តចល័តកម្ពុជា-ចិន» បានចាប់ផ្ដើមរៀបចំធ្វើ តាំងពីឆ្នាំ២០១៦មក ក្រោមការសហការរៀបចំដោយវិទ្យុមិត្តភាពកម្ពុជាចិន នៃអគ្គស្ថានីយវិទ្យុ និងទូរទស្សន៍មជ្ឈិមចិន និង ក្រសួងវប្បធម៌ និង វិចិត្រសិល្បៈ បានធ្វើដំណើរឆ្លងកាត់ ទូទាំងប្រទេសកម្ពុជា បាននាំមកនូវភាពយន្តកម្ពុជាចិនដ៏ឆ្នើម ទៅដល់ភូមិ ស្រុក នៅប្រទេសកម្ពុជា។
សម្លេងពលរដ្ឋ…
«សម្រាប់ខ្ញុំលើកទី១ហើយចង់ឲ្យមានការចាក់បញ្ចាំងច្រើនទៀត»
«បន្ទាប់ពីបានមើល ខ្ញុំបានស្វែងយល់ពីវប្បធម៌ចិនច្រើន»
«ខ្ញុំមានអារម្មណ៍រីករាយ និងសប្បាយចិត្ត ទទួលបានការអប់រំ ពីភាពយន្តចិន»
«ការបញ្ចាំងនេះ មានសារៈប្រយោជន៍ សម្រាប់ប្រជាជនយើង ឆ្លុះបញ្ចាំងជាក់ស្តែង ពីកិច្ចសហប្រតិបត្តិការរវាងកម្ពុជានិងចិន»៕
