ឯកឧត្តមរដ្ឋមន្ត្រី ជា សុមេធី៖ រាជរដ្ឋាភិបាល បាននិងកំពុងខំប្រឹងប្រែងប្តូរផ្តាច់ទោះក្នុងតម្លៃណាក៏ដោយ ការពារសុខសន្តិភាពឱ្យខានតែបាន

ភ្នំពេញ៖ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារគណបក្សចុះមូលដ្ឋានស្រុកពាមជរ ខេត្តព្រៃវែង បានលើកឡើងថា រាជរដ្ឋាភិបាល ក៏ដូចជាយើងទាំងអស់គ្នា បាននិងកំពុងខំប្រឹងប្រែងប្តូរផ្តាច់ទោះក្នុងតម្លៃណាក៏ដោយ ការពារសុខសន្តិភាពឱ្យខានតែបាន តែពួកប្រឆាំងនៅក្រៅប្រទេសមួយក្តាប់តូច នៅតែបន្តចលនារបស់ពួកគេ ក្នុងបំណងបង្ករភាពវឹកវរក្នុងសង្គម និងមានចេតនាផ្ដួលរំលំរាជរដ្ឋាភិបាលជានិច្ច ដែលកិច្ចការនេះ យើងត្រូវប្រឈម ដោះស្រាយ និងឆ្លើយតបបានទាន់ពេលវេលា។

ការលើកឡើងបែបនេះរបស់ឯកឧត្តមរដ្ឋមន្ត្រី ជា សុមេធី ធ្វើឡើងក្នុងឱកាសដែលឯកឧត្តម អញ្ជើញជាអធិបតីក្នុងពិធីអបអរសាទរទិវាជ័យជម្នះ ៧មករា ជួបសំណេះសំណាលជាមួយជ័យលាភី ទូកង លេខ១ លេខ២ និងលេខ៣ និងសំណេះសំណាលជាមួយសិស្សទទួលបាននិទ្ទេស A និងនិទ្ទេស B នៅស្រុកពាមជរ ខេត្តព្រៃវែង នាព្រឹកថ្ងៃទី៤ ខែមករា ឆ្នាំ២០២៥នេះ។

ក្នុងឱកាសនោះ ឯកឧត្តមរដ្ឋមន្ត្រី សូមឱ្យយុវជនយើងទាំងអស់ ត្រូវសិក្សាស្វែងយល់ពីប្រវត្តិសាស្ត្រ និងដំណើរឆ្លងកាត់ដ៏វែងឆ្ងាយរបស់កម្ពុជា ដើម្បីប្អូនៗ និងក្មួយៗ អាចធ្វើការសម្រេចចិត្តបានយ៉ាងត្រឹមត្រូវក្នុងការជួយអភិវឌ្ឍន៍សង្គម និងគ្រួសាររបស់យើងទាំងអស់គ្នា សម្រាប់រយៈពេលយូរអង្វែងទៅមុខ។ យើង ត្រូវរៀនហាត់ពត់ចិត្តគំនិតរបស់យើងតាមគំរូវីរភាពរបស់ថ្នាក់ដឹកនាំគណបក្សប្រជាជនកម្ពុជា ដែលលោកហ៊ាន ទទួលខុសត្រូវចំពោះជោគវាសនារបស់ប្រទេសជាតិ មានទឹកចិត្តស្នេហាជាតិ និងស្រឡាញ់ប្រជាជន។ ហេតុនេះ ឯកឧត្តមរដ្ឋមន្ត្រី សូមឱ្យស្មាតីនេះ រស់នៅស្ថិតស្ថេរជាមួយមន្ត្រីគណបក្សគ្រប់ថ្នាក់ និងយុវជនកម្ពុជារបស់យើង។

ដោយឡែក ការគិតគូរដល់ប្រជាពលរដ្ឋដែលជួបការលំបាក ឯកឧត្តមរដ្ឋមន្ត្រី បានបញ្ជាក់ថា យើងបន្តជួយដល់ការងារគាំពារសង្គមនានា ដែលចុងក្រោយនេះ យើងបានដាក់ឱ្យដំណើរការកម្មវិធីជាតិជំនួយសង្គមក្នុងកញ្ចប់គ្រួសារនៅខែមេសាឆ្នាំ២០២៤ ក្រោយពីយើងបានបិទបញ្ចប់កម្មវិធីប្រយុទ្ធនឹងជំងឺកូវីដ-១៩។ កម្មវិធីជាតិជំនួយក្នុងកញ្ចប់គ្រួសារ បានផ្តោតការយកចិត្តទុកដាក់គិតគូរដល់មាតាទារក ការខ្វះអាហារូបត្ថម្ភ ការសិក្សារៀនសូត្ររបស់កុមារនិងសិស្ស ការជួយដល់ ជនមានពិការភាព ជនចាស់ជរាអាយុលើសពី៦០ឆ្នាំ អ្នកផ្ទុកមេរោគអេដស៍ និងជំងឺអេដស៍ នៃគ្រួសារក្រីក្រនៅតាម មូលដ្ឋាន និងការបណ្តុះបណ្តាលជំនាញវិជ្ជាជីវៈដល់យុវជនដើម្បីទទួលបានការងារល្អជាដើម ៕