សម្តេចធិបតី៖ ក្រុមប្រឆាំងតែងលើកចំណុចអវិជ្ជាមាន និងចោទរាជរដ្ឋាភិបាល ធ្វើបាបប្រជាជន ប្លន់ដីធ្លីប្រជាជន ប៉ុន្ដែមិនដែលលើកឡើងរឿង យើងចុះចែកបណ្ណកម្មសិទ្ធិដីធ្លីជូនប្រជាពលរដ្ឋ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ក្រុមប្រឆាំងតែងតែលើកពីចំណុចអវិជ្ជាមាន និងចោទរាជរដ្ឋាភិបាលប្លន់ដីប្រជាពលរដ្ឋ ប៉ុន្ដែពួកគេមិនដែលលើកឡើងរឿងរាជរដ្ឋាភិបាលចែកបណ្ណកម្មសិទ្ធិដីធ្លីជូនប្រជាពលរដ្ឋម៉ឺនក្បាលដីឡើយ។

ក្នុងឱកាសអញ្ជើញ ប្រកាសខេត្តកំពង់ចាម បញ្ចប់ការវាស់វែងដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធិដីធ្លី នៅថ្ងៃទី២១ ខែធ្នូ ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា រាជរដ្ឋាភិបាល អាណត្តិថ្មី មិនមានអ្វីក្រៅពីការប្ដេជ្ញាចិត្ត នឹងបន្ដខិតខំធ្វើការងារ ដើម្បីបម្រើប្រជាពលរដ្ឋ នឹងផ្ដល់ផលឱ្យកាន់តែច្រើនជូនប្រជាពលរដ្ឋគ្រប់ទីកន្លែង។

សម្តេចធិបតី បានថ្លែងឱ្យដឹងថា រាជរដ្ឋាភិបាល នឹងខិតខំធ្វើកំណែទម្រង់លើវិស័យដីធ្លីបន្ថែមទៀត តាមរយៈការវាស់វែងដីធ្លី ចុះបញ្ជី និងផ្ដល់បណ្ណកម្មសិទ្ធិដីធ្លីជូនប្រជាពលរដ្ឋ ក៏ដូចជាដោះស្រាយបញ្ចប់ទំនាស់ដីធ្លី។

សម្តេចធិបតី បញ្ជាក់ថា ការបញ្ចប់ការវាស់វែងដីធ្លីមានលក្ខណៈជាប្រព័ន្ធជូនប្រជាពលរដ្ឋ ធ្វើយ៉ាងណាធានាបានកម្មសិទ្ធិកាន់កាប់ដីធ្លីមានលក្ខណៈយូរអង្វែង តជំនាន់ផងដែរ៕