គ្រោះរញ្ជួយដីកម្រិត៧,៤រ៉ិចទ័រ វាយប្រហារប្រទេសដែនកោះវ៉ានូទូ បំផ្លាញអគារ និងយ៉ាងហោចណាស់មានមនុស្សម្នាក់បានស្លាប់

ព័រវីឡា៖ ការរញ្ជួយដីកម្រិត៧,៤រ៉ិចទ័រ បានវាយប្រហាររដ្ឋធានីព័រវីឡារបស់ប្រទេសវ៉ានូទូ នៅថ្ងៃអង្គារទី១៧ ខែធ្នូ ដោយបានបំផ្លាញអគារ និងយ៉ាងហោចណាស់មានមនុស្សម្នាក់បានស្លាប់។

ការរញ្ជួយដីដ៏ខ្លាំងមួយបានវាយប្រហារលើកោះប៉ាស៊ីហ្វិកនៃប្រទេសវ៉ានូទូ នៅថ្ងៃអង្គារនេះ ដោយបានបំផ្លាញអគារយ៉ាងធ្ងន់ធ្ងរនៅក្នុងរដ្ឋធានីព័រវីឡា រួមទាំងស្ថានទូតបរទេស។ ប៉ូលិសបានបញ្ជាក់ថា យ៉ាងហោចណាស់មនុស្សម្នាក់បានស្លាប់ និងមនុស្សរងរបួសត្រូវបានបញ្ជូនទៅមន្ទីរពេទ្យ។

លោក ដាន ម៉ាកហ្គារី ( Dan McGarry) ជាអ្នកសារព័ត៌មានបានពិពណ៌នាថា៖«វាគឺជាការរញ្ជួយដីដ៏ខ្លាំងបំផុតដែលខ្ញុំបានជួបប្រទះក្នុងរយៈពេល២១ឆ្នាំរបស់ខ្ញុំ ដែលរស់នៅក្នុងប្រទេសវ៉ានូទូ និងនៅកោះប៉ាស៊ីហ្វិក។ ខ្ញុំបានឃើញការរញ្ជួយដីដ៏ធំជាច្រើន ប៉ុន្តែមិនដែលជួបការរញ្ជួលខ្លាំងបែបនេះទេ»។ លោក បាន បន្ថែម ថា ផ្លូវ តភ្ជាប់ កំពង់ផែ Vila ទៅ ស្ថានីយ ដឹក ជញ្ជូន អន្តរជាតិ ត្រូវ បាន បិទ ដោយ ការ បាក់ ដី។

អគារដែលទទួលបេសកកម្មបរទេសនៅក្នុងរដ្ឋធានី រួមទាំងស្ថានទូតសហរដ្ឋអាម៉េរិក អង់គ្លេស បារាំង និងនូវែលសេឡង់ ក៏រងផលប៉ះពាល់ផងដែរ។

អ្នកនាំពាក្យស្ថានទូតអាម៉េរិកប្រចាំនៅប្រទេសប៉ាពួញូហ្គីណេ បានឱ្យដឹងថា ស្ថានទូតរបស់ខ្លួននៅរដ្ឋធានីព័រវីឡារងការខូចខាតយ៉ាងដំណំ ហើយត្រូវបានបិទរហូតដល់មានការជូនដំណឹងបន្ថែម។ ទីភ្នាក់ងារស្ទាបស្ទង់ភូមិសាស្ត្រអាម៉េរិក (USGS) បានបង្ហាញថា ការរញ្ជួយដីនេះមានជម្រៅ១០គីឡូម៉ែត្រ។ មុននេះ ប្រព័ន្ធព្រមានរលកយក្សស៊ូណាមិរបស់សហរដ្ឋអាម៉េរិកបានលុបចោលការព្រមានអំពីរលកយក្សស៊ូណាមិដំបូងសម្រាប់វ៉ានូទូ។ យោងតាមអាជ្ញាធរនៅសហរដ្ឋអាម៉េរិក អូស្ត្រាលី និងនូវែលសេឡង់ មិនមានការគំរាមកំហែងពីរលកយក្សស៊ូណាមិមកលើទឹកដីវ៉ានូទូទេ។

រដ្ឋមន្ត្រីការបរទេសអូស្ត្រាលី លោកស្រី ផេននី វង្ស (Penny Wong) បាននិយាយថា អូស្ត្រាលីកំពុងតាមដានយ៉ាងដិតដល់នូវស្ថានភាពបន្ទាប់ពីការរញ្ជួយដីដ៏បំផ្លិចបំផ្លាញ។ លោកស្រីបាននិយាយនៅក្នុងសេចក្តីថ្លែងការណ៍មួយថា៖«យើងត្រៀមខ្លួនរួចជាស្រេចដើម្បីគាំទ្រដល់ប្រទេសវ៉ានូទូ ខណៈដែលទំហំនៃការខូចខាតកំពុងត្រូវបានវាយតម្លៃ។ វ៉ានូទូ គឺជាគ្រួសារ ហើយយើងនឹងនៅទីនោះជានិច្ចនៅពេលមានតម្រូវការ»៕