ក្រសួងអប់រំកម្ពុជា និងអង្គការសកម្មភាពដើម្បីកុមារ (APLE) ចុះអនុស្សរណៈនៃការយោគយល់គ្នា លើគម្រោង «លើកកម្ពស់សុវត្ថិភាពអ៊ីនធឺណិតក្នុងការអប់រំ»

ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១៣ ខែធ្នូ ឆ្នាំ២០២៤ បានអញ្ជើញចុះអនុស្សរណៈនៃការយោគយល់គ្នា រវាង ក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងអង្គការសកម្មភាពដើម្បីកុមារ (APLE) លើគម្រោង”លើកកម្ពស់សុវត្ថិភាពអ៊ីនធឺណិតក្នុងការអប់រំ” និងមានការចូលរួមពី ប្រតិភូអង្គការសកម្មភាពដើម្បីកុមារ ដឹកនាំដោយ លោក សំលៀង សីលា នាយកប្រតិបត្តិអង្គការសកម្មភាពដើម្បីកុមារ(APLE) ឯកឧត្តម លោកជំទាវ ថ្នាក់ដឹកនាំក្រសួង និងមន្រ្តីពាក់ព័ន្ធក្រោមឱវាទ។

គម្រោងនេះរៀបចំឡើងក្នុងគោលបំណង ពង្រឹងសមត្ថភាព និងធនធាន ដើម្បីលើកកម្ពស់ការអប់រំអំពីសុវត្ថិភាពអ៊ីនធឺណិតនៅក្នុងសាលារៀន សំដៅចូលរួមបង្ការ-ទប់ស្កាត់ការរំលោភបំពាននិងកេងប្រវ័ញ្ចផ្លូវភេទកុមារតាមប្រព័ន្ធអនឡាញ ក៏ដូចជា ជំរុញការចូលរួមយ៉ាងសកម្មរបស់ភាគីពាក់ព័ន្ធដូចជា គ្រូបង្រៀន បុគ្គលិកអប់រំ ឪពុកម្តាយ សហគមន៍ និងកុមារ ក្នុងការធានាឱ្យបាននូវបរិយាកាសឌីជីថលប្រកបដោយសុវត្ថិភាព និងការគាំពារ។

មានប្រសាសន៍ក្នុងឱកាសនេះ លោកជំទាវ រដ្ឋលេខាធិការប្រចាំការ បានកោតសរសើរ និងវាយតម្លៃខ្ពស់ចំពោះអង្គការសកម្មភាពដើម្បីកុមារ ដែលបានសហការជាមួយក្រសួងអប់រំលើគម្រោងជាច្រើននាពេលកន្លងមក ជាពិសេសទៅលើគម្រោងនេះផ្ទាល់ ដែលបានបង្ហាញពីការប្តេជ្ញាចិត្តដ៏រឹងមាំក្នុងការប្រយុទ្ធប្រឆាំងនឹងការជួញដូរមនុស្សតាមប្រព័ន្ធអ៊ីនធឺណិតដែលជាបញ្ហាសំខាន់មួយនៅក្នុងសង្គមបច្ចុប្បន្ន។ ជាមួយនេះដែរ លោកជំទាវ រដ្ឋលេខាធិការប្រចាំការ បានលើកទឹកចិត្តដល់ក្រុមការងារពាក់ព័ន្ធទាំងអស់ ឱ្យរៀបចំផ្សព្វផ្សាយចំណេះដឹង និងមាតិកាសំខាន់ៗដែលខ្លីហើយខ្លឹម ដោយអាចផលិតជាខ្លឹបវីដេអូខ្លីៗដែលមានអត្ថន័យពេញលេញ ដើម្បីផ្សព្វផ្សាយនៅក្នុងបណ្ដាញសង្គមឱ្យបានទូលំទូលាយ ជាពិសេសទៅដល់ភាគីពាក់ព័ន្ធដូចជា គ្រូបង្រៀន បុគ្គលិកអប់រំ ឪពុកម្តាយ សហគមន៍ និងកុមារ ដើម្បីឱ្យពួកគាត់ទទួលបានចំណេះដឹង និងយល់ដឹងកាន់តែច្បាស់ពីបញ្ហានេះ ក៏ដូចជាវិធានការបង្ការផ្សេងៗ ក្នុងគោលដៅធានាបាននូវនិរន្តភាពនៅក្នុងការអនុវត្ត។

សារជាថ្មីម្តងទៀត តាងនាមក្រសួងអប់រំ យុវជន និងកីឡា លោកជំទាវ រដ្ឋលេខាធិការ បានថ្លែងអំណរគុណ និងវាយតម្លៃខ្ពស់ដល់ថ្នាក់ក្រសួងអប់រំ និងក្រុមការងារអង្គការសកម្មភាពដើម្បីកុមារ ដែលបានខិតខំប្រឹងប្រែង សហការគ្នាបានយ៉ាងល្អរហូតដល់សម្រេចបាននូវការចាប់ផ្តើមនៃគម្រោងដ៏មានសារៈសំខាន់នេះ និងបានគូសបញ្ជាក់ថា គម្រោងនេះបានឆ្លុះបញ្ចាំងពីឆន្ទៈរួមគ្នា រវាងក្រសួងអប់រំ យុវជន និងកីឡា និងអង្គការសកម្មភាពដើម្បីកុមារ(APLE) ក្នុងការពង្រឹងការអប់រំអំពីសុវត្ថិភាពអ៊ីនធឺណិតដើម្បីបង្ការទប់ស្កាត់ការរំលោភបំពាន និងកេងប្រវ័ញ្ចផ្លូវភេទកុមារលើប្រព័ន្ធអនឡាញ៕