រដ្ឋបាលខេត្តស្ទឹងត្រែង បើកកិច្ចប្រជុំស្តីពីការកាត់ចំណីផ្លូវ អូរ និងប្រឡាយ ក្នុងតំបន់វិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ

ភ្នំពេញ៖ លោក ព្រំ វណ្ណៈ អភិបាលរងខេត្តស្ទឹងត្រែង នៅរសៀលថ្ងៃទី០៩ ខែធ្នូ ឆ្នាំ២០២៤ បានបើកកិច្ចប្រជុំស្តីពីការកាត់ចំណីផ្លូវ អូរ និងប្រឡាយ ក្នុងតំបន់វិនិច្ឆ័យចុះ បញ្ជីដីធ្លីមានលក្ខណៈជាប្រព័ន្ធ ក្នុងភូមិកាតូត ឃុំកំភុន ស្រុកសេសាននិង ភូមិលើ ភូមិ អន្លង់ស្វាយ ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង។

ថ្លែងដឹកនាំកិច្ចប្រជុំ លោក ព្រំ វណ្ណៈ អភិបាលរងខេត្តស្ទឹងត្រែងបានមានប្រសាសន៍ថា រាជរដ្ឋាភិបាលអាណត្តិថ្មី ក៏ដូចជាក្រសួងរៀបចំដែនដីបានយកចិត្តទុកដាក់យ៉ាងខ្លាំងក្នុងការជំរុញផ្តល់សេវាដីធ្លីជូនប្រជាពលរដ្ឋឱ្យបានលឿន។ ដូចនេះការកាត់ចំណីផ្លូវ អូរ និងប្រឡាយ ក្នុងតំបន់វិនិច្ឆ័យចុះ បញ្ជីដីធ្លីមានលក្ខណៈជាប្រព័ន្ធនៅក្នុងភូមិខាងលើនេះក៏ជាផ្នែកមួយក្នុងការពន្លឿនការចុះបញ្ជីដីធ្លីជូនប្រជាពលរដ្ឋផងដែរ ម៉្យាងទៀតការកំណត់ចំណីផ្លូវ អូរ និងប្រឡាយនិងផ្តល់នូវភាពងាយស្រួលសម្រាប់ដំណើរការនៃការអភិវឌ្ឍមូលដ្ឋាននាពេលខាងមុខ។

លោក អភិបារងខេត្តស្ទឹងត្រែងបានបន្តថាគោលនយោបាយរបស់រាជរដ្ឋាភិបាលនីតិកាលទី ៧ នៃរដ្ឋសភា ក្រោមការដឹកនាំដ៏ឈ្លាសវៃ និងប៉ិនប្រសប់ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលមានក្រសួងរៀបចំដែនដីជាសេនាធិការបានដាក់ចេញនូវផែនការក្នុងការបញ្ចប់ការចុះបញ្ជីដីធ្លី មានលក្ខណៈជាប្រព័ន្ធជូនប្រជាពលរដ្ឋ ឱ្យបានអស់ក្នុងឆ្នាំ២០២៥ ខាងមុខ ដើម្បីរួមចំណែកក្នុង ការបង្កើននូវសុវត្តិភាព នៃការកាន់កាប់ដីធ្លី កាត់បន្ថយបញ្ហា ទំនាស់ និងជំរុញអភិវឌ្ឍន៍ទីផ្សារដីធ្លីប្រកបដោយប្រសិទ្ធភាពខ្ពស់ កាត់បន្ថយភាពក្រីក្រ ស្ថេរភាពសង្គម និងការអភិវឌ្ឍន៍ សេដ្ឋកិច្ចអោយបានប្រសើរឡើង។

ជាមួយគ្នានេះ លោក ព្រំ វណ្ណៈ អភិបាលរងខេត្តបានបញ្ជាក់ឡើងវិញថាការប្រជុំស្តីពីការកាត់ចំណីផ្លូវ អូរ និងប្រឡាយ ក្នុងតំបន់វិនិច្ឆ័យចុះ បញ្ជីដីធ្លីមានលក្ខណៈជាប្រព័ន្ធ ភូមិកាតូត ឃុំកំភុន ស្រុកសេសាននិង ភូមិលើ ភូមិ អន្លង់ស្វាយ ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង ជាការពិភាក្សាមួយយ៉ាងស្វិតស្វាញរវាងអាជ្ញាធរខេត្ត ជាមួយអាជ្ញាធរភូមិ ឃុំ ស្រុកនិងមន្ទីរអង្គភាពជំនាញដែលមានការពាក់ព័ន្ធ ដើម្បីធ្វើយ៉ាងឲ្យការកំណត់ចំណីផ្លូវ អូរ និងប្រឡាយ មានភាពត្រឹមត្រូវសមស្របទៅតាមស្ថានភាពជាក់ស្តែងនៅមូលដ្ឋាន និងឈរលើផលប្រយោជន៍ប្រជាជន៕