ឯកឧត្ដម សាយ សំអាល់៖ រដ្ឋាភិបាលបានបង្កើនផ្តល់លទ្ធភាពទាំងធនធនថវិកានិងធនធានមនុស្ស ដើម្បីពន្លឿនក្នុងការវាស់វែង ដើម្បីដោះស្រាយវិវាទដីធ្លី

បន្ទាយមានជ័យ៖ នៅរសៀលថ្ងៃទី៩ ខែធ្នូ ឆ្នាំ២០២៤ ឯកឧត្តម សាយ សំអាល់ ឧបកនាយករដ្ឋមន្ត្រី រដ្ឋមន្ត្រីក្រសួងរៀបចំ ដែនដី នគររូបនីយកម្ម និងសំណង់ បានអញ្ជើញជាអធិបតីភាពដ៏ខ្ពង់ខ្ពស់ចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន១០១៥៨បណ្ណ ស្ថិតនៅក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

បើតាមឯកឧត្ដម អ៊ុំ រាត្រី បានឱ្យដឹងថា លទ្ធផលនៃការចុះបញ្ជីសរុបទូទាំងខេត្ត គិតចាប់ពីពេលចាប់ផ្តើមនៅថ្ងៃទី០១ ខែវិច្ឆិកា ឆ្នាំ២០២៣ រហូតដល់ថ្ងៃទី០៦ ខែធ្នូ ឆ្នាំ២០២៤ បានប្រកាសតំបន់វិនិច្ឆ័យ បានចំនួន១៧៤ភូមិ, វាស់វែង បានចំនួន ១២៨១៦៦ក្បាលដី, ប្រមូលទិន្នន័យ បានចំនួន ៨៨២៩២ ក្បាលដី, បិទផ្សាយទិន្នន័យ បានចំនួន១៥ភូមិ ស្មើនឹង៩៦៣៩ក្បាលដី, ក្បាលដីដែលត្រូវវាស់វែងបន្ត មានចំនួន ១៩៥៩៧១ក្បាលដី។ ចំពោះក្រុងប៉ោយប៉ែតមានក្បាលដីប៉ាន់ស្មានចំនួន ៩៣០៣១ក្បាលដី វាស់វែង និងប្រមូល ទិន្នន័យបានចំនួន ៥៦០៩៦ក្បាលដី ក្នុងនោះបានចេញវិញ្ញាបនបត្រសម្គាល់ម្ចាស់អចលនវត្ថុរួច ចំនួន ៣៧១១៧ បណ្ណ (គិតរួមទាំងភូមិផ្សារកណ្តាល ចំនួន ១០១៥៨ បណ្ណ) និងក្បាលដីនៅសល់ត្រូវបន្ត វាស់វែង ចំនួន៣៦៩៣៥ក្បាលដី។

ថ្លែងនាឱកាសនោះឯកឧត្តម សាយ សំអាល់ ក៏បានថ្លែងអរគុណ និងកោតសរសើរចំពោះមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តបន្ទាយមានជ័យ ក្រុមការងារវាចុះវាស់វែង ដែលបានខិតខំយ៉ាងសស្រាក់សស្រាំ ដើម្បីចុះវាស់វែងដីជូនដល់បងប្អូនប្រជាពលរដ្ឋ ឱ្យទទួលបានប្លង់កម្មសិទ្ធិស្របច្បាប់។

ឯកឧត្ដមបន្តថា ប្រមុខរាជរដ្ឋាភិបាល នីតិកាលទី៧នេះ បានរៀបចំនូវគោលនយោបាយដ៏ត្រឹមត្រូវ និងបានផ្តល់លទ្ធភាពដល់ប្រជាពលរដ្ឋ ក្នុងការចុះបញ្ជីដីធ្លី ដែលមានលក្ខណៈជាប្រព័ន្ធ ក៏ដូចជាក្រសួង បានដាក់គោលដៅបញ្ចប់ការវាស់វែងចុះបញ្ជីដីធ្លីទាំងអស់នៅឆ្នាំ២០២៥ សំដៅដោះស្រាយបញ្ហាទំនាស់វិវាទដីធ្លីទាំងអស់ តាមរយៈការពង្រឹងសិទ្ធិ និងការគ្រប់គ្រងដីធ្លីបានល្អ និងមានប្រសិទ្ធភាព។ ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានបង្កើនផ្តល់លទ្ធភាពទាំងធនធនថវិកា និងធនធានមនុស្ស ដើម្បីពន្លឿនក្នុងការវាស់វែង បោះបង្គោលកំណត់ព្រំដីដើម្បីដោះស្រាយវិវាទដីធ្លីទាំងអស់នោះឱ្យបានចប់នៅមុនដាច់ឆ្នាំ២០២៧ខាងមុខនេះ៕